Bɛ̈n 26 - JAM DE NHIALIC 2011

Paany de Mät

¹ Na wën, ke lëk ë Bɛ̈nydït Mothe an, “Loi paany de mät në linɔn lɔ mot kathiëër, ku lupɔ aräu ku lupɔ amujuŋ, ku lupɔ thith. Ku ë ke gutë kɔ̈ɔ̈th cerubiim në atëët ŋic gut arëët.

² Loi lupɔɔ kedhie ke ke kït. Tɔ bɛ̈ɛ̈r ë kekɔ̈ɔ̈th ee mitïïr kathiëër ku rou ku biäk, ku dït ë yicden tɔ ye mitïïr kaarou.

³ Ku ye lupɔɔ kadhïc rek thook ëtök në keyiic kedhie.

⁴ Ku luöiyë lupɔ thok ka lɔ yueryuer në baŋ biicë ëbɛ̈n në lupɔ aräu, loi lupɔ në baŋ biicë ëbɛ̈n.

⁵ Loi ka lɔ yueryuer kathiërdhïc në lupɔ tueŋë thok, ku ka kɔ̈k lɔ yueryuer kathiërdhïc në baŋ däŋë ke ke tuööm nïïm.

⁶ Ku luöiyë kethook joth ke adhääp dhuɔɔk nïïm kathiërdhïc bï ke aa rek.

⁷ “Ku loi akum de Paany në lupɔ kathiëër ku tök, lupɔɔ ë cuëc në nhïm ke bɔɔth.

⁸ Loi keek ke ke kït. Tɔ bɛ̈ɛ̈r de kekɔ̈ɔ̈th ee mitïïr kathiëër ku diäk ku biäk kedhie, ku tɔ dït ë yicden ee mitïïr kaarou.

⁹ Ku rek lupɔɔ kadhïc në keyiic tëtök, ku rek dhetem cï döŋë tëtök ayadäŋ. Ku matë biäk ye kek dhetem ë Paany thok bï yic aa rou.

¹⁰ Ku luöiyë lupɔ tök thok ka lɔ yueryuer kathiërdhïc në ee lupɔɔ rɛk thookë yiic, ku luöiyë lupɔ däŋë thok ka lɔ yueryuer ayadäŋ kathiërdhïc.

¹¹ Ku luöiyë ke thook maläŋ cï dhook nïïm kathiërdhïc bïï keek aa rek ëtök.

¹² Ku kaakë lupɔ cï döŋ pinyë thok në Paany kɔ̈u ciëën.

¹³ Ku biäk de mitïr töŋ bï döŋ piny në bɛ̈ɛ̈r de Paany kɔ̈u aa kɛɛkë në Paany ŋeŋ nhial ke bï Paany kum.

¹⁴ “Ku be Paany luöi akuum kɔ̈k kaarou, akum tök në dël ke nyök amɛ̈l, dël cï tɔc në këthith. Ku loi akum däŋë në dël ke bɔɔth, bïk Paany kum nɔm nhial ë baŋ biic.

¹⁵ “Ku luöiyë Paany këŋ ke tim de aluii.

¹⁶ Ku bɛ̈ɛ̈r de këŋ tɔ ye mitïïr kaŋuan ku biäk. Ku dït de kekɔ̈ɔ̈th tɔ ke ee biäk de mitïr.

¹⁷ Ku tɔ këŋ ee thäär rou piny kedhie, ke ke bï Paany aa rek ëbɛ̈n tëtök.

¹⁸ Luöiyë Paany këŋ kathiërrou në biäk të lɔ wöuwic.

¹⁹ Ku luöiyë ke kuc ke ateek kathiërŋuan bï ke cäp thäär thïn, kuc kaarou në këŋ tök thar bïk kërke kaarou dhɔ̈ɔ̈r.

²⁰ Ku luöiyë baŋ të lɔ rut këŋ kɔ̈k kathiërrou.

²¹ Ku kuc ke ateek kathiërŋuan, kuc kaarou në këŋ tök thar.

²² Ku Paany kɔ̈u ciëën baŋ të lɔ aköl athɛ̈i luöiyë këŋ kadhetem.

²³ Ku yiëkë aguuk kaarou këŋ kaarou.

²⁴ Ku tɔ këŋ aguk ee yic rou, gɔl piny alɔ gut nhial. Ku tääuwë thar në kuny töŋ ateekic. Yen luɔi bï këŋ ke aguukiic tɔ̈u ka.

²⁵ Ku ëtɛ̈ɛ̈n, këŋ abïk jɔ aa bɛ̈t në kucken kathiëër ku dhetem, kuc ke ateek. Kuc kaarou në këŋ tök thar.

²⁶ “Luöiyë këŋ rïurïu kathiëër ku dhïc në tim de aluii. Rïurïu kadhïc në Paany baŋë,

²⁷ ku dhïc në këŋ baŋ däŋë, ku dhïc në këŋ kɔ̈u ciëën baŋ të lɔ aköl athɛ̈i.

²⁸ Ku rïurïu cil, ë ye këŋ rïïuwic gɔl ë Paany baŋë alee kɔ̈ɔ̈c ë Paany baŋ däŋë.

²⁹ Rɔth këŋ kɔ̈ɔ̈th në adhääp, ku luöiyë ke kuc ke adhääp bïk rïurïu cil aa muk. Ku rɔth rïurïu cil kɔ̈u ayadäŋ në adhääp.

³⁰ Yïk paany de mät cït man cän en nyuöth yïn ë kuur nɔm.

³¹ “Ku loi gëlgël në linɔn lɔ mot cï gut në lupɔ aräu, ku lupɔ amujuŋ, ku lupɔ thith. Ku ë gutë kɔ̈u cerubiim apiɛth në atën ŋic gut.

³² Ku kaakë në mën ke tim akacia kaŋuan kɔ̈ɔ̈th, wai cï rɔɔth kɔ̈ɔ̈th në adhääp, ku cï keek gɔn në joth cï dhook nïïm. Ku ciëpë kethäär piny në kuc ke ateek kaŋuan nïïm.

³³ Tääuwë gëlgël në joth cï dhookiic thäär piny në paanyic, joth kuɛɛr kɔ̈ɔ̈th në paany nɔm nhial në biäk thïn. Ku tääuwë athänduŋ de mät në gëlgël kɔ̈u ciëën, Athänduŋ de yic kur cï gɔ̈ɔ̈r kɔ̈ɔ̈th kaarou. Gëlgël abï tëɣeric pääk kekë tëɣeric aläl.

³⁴ Ku kum athänduŋ de mät nɔm, të tɔ̈u en tëɣeric aläl.

³⁵ Tääuwë paam biic në paanyic baŋ të lɔ rut. Ku tääuwë kë ye manyalath cäp thar thïn në paanyic biäk të lɔ wöuwic.

³⁶ “Luöiyë Paany thok gëlgël në lupɔ aräu, ku lupɔ amujuŋ, ku lupɔ thith, ku linɔn lɔ mot, cï gut apiɛth në atën ŋic gut.

³⁷ Luöiyë gëlgëlë thok wai ke akacia cï rɔɔth kɔ̈ɔ̈th në adhääp kadhïc, ku cï ke yiëk thook joth ke adhääp cï dhook nïïm. Ku lui ke kuc ke maläŋ kadhïc bïï ke cäp thäär thïn.