Bɛ̈n 25 - JAM DE NHIALIC 2011

Miɔ̈c në Biäk de Paany

¹ Go Bɛ̈nydït lɛ̈k Mothe an,

² “lɛ̈kë kɔc ke Yithriɛl ë ke miɔc Ɛn. Nöm miɔ̈c cïk gäm yïn në miɛt ë piɔ̈u ëbɛ̈n.

³ Ku miɔ̈c abï adhääp, ku ateek, ku maläŋ.

⁴ Ku linɔn lɔ mot, ku lupɔɔ aräu, ku lupɔɔ thiith amujuŋ, ku lupɔɔ thith, ku lupɔɔ cï cuëëc në nhïm ke bɔɔth,

⁵ ku dël ke nyök amɛ̈l, dël cï tɔc në kë thith. Ku tim de aluii,

⁶ ku miök de olip bïï mac dɛ̈ɛ̈p. Ku wɛ̈ɛ̈l ŋïr bï ë miök looi, miök de tɔc, ku bï wal nyop ee tɔ wäu.

⁷ Ku kur läk aläl, kur tuc ë ɣööcden kur ke onik, ayï kur kɔ̈k, kur bïï rɛk ë lupɔ de ajïpɔ kɔ̈u, ayï lupɔ de yen yɔu.

⁸ Ku tɔ kɔc yïk Ɛn tëɣeric, ke Yɛn bï bɛ̈n rëër në keyiic.

⁹ Luɔikï paany ku ka ye thieth thïn cït man ë kë bä lɛ̈k week.

Athänduŋ de Mät

¹⁰ “Cuɛ̈ckï athänduk në tim de aluii. Takï bɛ̈ɛ̈r de yen kɔ̈u ee mitïr ku biäk. Ku takï dït ë yeyic ee biäk de mitïr. Ku bɛ̈ɛ̈rde ke lɔ nhial takï ee mitïr ku biäk ayadäŋ.

¹¹ Ku rathkï yic thïn ku yekɔ̈u biic në adhäm awai. Ku wiɛlkï nɔm ëbɛ̈n në atheer adhääp.

¹² Ku cuɛ̈ckï kuc ke adhääp dhuɔɔkiic kaŋuan, bï ye aa ɣääc. Ku rɛkkï keek në Athänduk thar piny në cök nïïm, rou baŋë ku rou baŋë.

¹³ Ku luöikï wai në tim de aluii bï ye aa ɣääc. Ku rathkï kekɔ̈ɔ̈th, në adhääp.

¹⁴ Ku luötkï keek në kuciic, kuc nu në athänduk thar.

¹⁵ Ku wai ë ke ye puɔ̈l arɛ̈ɛ̈r në kuc ke athändukic ëtɛ̈ɛ̈n, ë ke cie bɛ̈ɛ̈i bei.

¹⁶ Ku tääukï pam ke kuur kaarou bä ke gäm yïn në athändukic, pam cïï ë lööŋ gɔ̈ɔ̈r në kekɔ̈ɔ̈th.

¹⁷ “Ku luöiyë Athänduk nɔm akum në adhäm awai. Tɔ bɛ̈ɛ̈r de akum kɔ̈u ee mitïr ku biäk. Ku tɔ dït ë yicde ee biäk de mitïr.

¹⁸ Ku cuëc cerubiim kaarou, ku kum në adhääp,

¹⁹ cerubiim tök akum athänduk nɔm tueŋ ku tök ë baŋ däŋë. Ku nuatë në akum guöp.

²⁰ Tääuwë keek ke ke tuum kenïïm, tök ë baŋë ku däŋë ë baŋë. Ku cerubiim abïk Athänduk aa kum në wuökkɛn cïk kɔ̈ɔ̈r.

²¹ Tääuwë paam ke kuur kaarou athändukic thïn, ku kum nɔm në akum.

²² Yïn bä lɔ yök ëtɛ̈ɛ̈n, ku la yï gäm lööŋkï kedhie në biäk de kɔc ke Yithriɛl ke yï nu në akum de athänduŋ de mät nɔm në kɛm ke cerubiim.

Paam de Kuïn cï Pam cï Gäm Nhialic

²³ “Loi paam në tim de aluii. Tɔ bɛ̈ɛ̈r de yekɔ̈u ee mitïr tök. Ku dït de yic ee biäk de mitïr. Ku bɛ̈ɛ̈rde ke lɔ nhial, tɔ ee mitïr tök.

²⁴ Ku rɔth guöp në adhäm awai, ku wil nɔm ëbɛ̈n në atheer adhääp.

²⁵ Ku gël ŋeŋ ëbɛ̈n në atheer duëërë them në raan ciin, ku wiɛlë atheer piny në adhääp.

²⁶ Ku luöiyë kuc ke adhääp kaŋuan. Ku tääuwë ke në tuŋ thook kaŋuan ë cök nïïm ë gökgök.

²⁷ Ku kuc bï wai aa luöt thïn të ɣɛ̈ɛ̈cë paam ë ke tɛ̈ɛ̈uwë në atheer lɔ̈ɔ̈m.

²⁸ Loi wai ke tim de aluii ku rɔth kekɔ̈ɔ̈th në adhääp.

²⁹ Loi aduuk, ku thɛ̈k bïï wal ŋïr aa nyop. Ku loi guöl, ku abïny bï mɔ̈n cï gam aa dek. Cuëc ee kakë kedhie në adhäm awai.

³⁰ Ku paam ë tɛ̈ɛ̈uwë në athänduŋ ë mät nɔm tueŋ, ku kuïn cï pam ɣeric abï dhiɛl aa tɔ̈u në paam nɔm ë cieŋ, kuïn cï pam cï gäm Ɛn.

Kë ye Manyalath Cäp Thar Thïn

³¹ “Loi kë ye manyëalath cäp thar thïn në adhäm awai. Ku loi thar piny ayï guöpde në adhääp tei. Ku loi kakë kedhie, ayï abïïnyke, ayï akenke ke ke rɛk në yen ëtök.

³² Kër kadhetem ë ke yiël röt bei në yekɔ̈u, diäk baŋë ku diäk baŋ däŋë.

³³ Ku këër ëbɛ̈n në ee kërkë yiic kadhetem, abï nɔm dɛ aken ke wal në abïïny yiic kadiäk ke ke cï kiëët në këriëëcden ëbɛ̈n cït man akɛɛn ë tim cɔl almon.

³⁴ Ku yiëkë kë ye manyalath cäp thar thïn. Ku abïïny ke akɛɛn ë wal kaŋuan në këriëëcden ëbɛ̈n ke ke cï kiëët cït akɛɛn ë tim de almon.

³⁵ Ku tääuwë akɛɛn tök në këër thar piny ëbɛ̈n në ee kërkë yiic kadiäk.

³⁶ Ku akɛɛn kedhie, ayï kër, ayï kë ye many alath cäp thar thïn ë ke loi keek në adhäm awai ke ke rɛk tëtök kedhie.

³⁷ Ku loi mɛ̈ckealath kadhorou, ku tääuwë keek në kë ye many alath cäp thar thïn ke ke bï tueŋ riaau.

³⁸ Loi kë ye mac cuöny thok, ayï atɛ̈nyde në adhäm awai.

³⁹ Cuëc kë ye manyalath cäp thar thïn, kekë kake ëbɛ̈n në adhäm awai bur cuaalic.

⁴⁰ Loi ke cït man nyuöth Ɛn ke yïn në kuur nɔm.