Bɛ̈n 23 - JAM DE NHIALIC 2011

Yic ku Kïït de Kɔc

¹ “Du tör ee caath, ku du raan de guöp awäc ee kuɔny në gɛm gɛm yïn löŋ lueth.

² Du ee mat wekë kɔc juëc të cïï kek wööc, ku të gɛm kek löŋ lueth mɛ̈ɛ̈r kek yic.

³ Duökï ee kuum ke we kuëëny kɔciic të kuööm wek raan kuany nyin.

⁴ “Të cïn weŋ ë raan dɛ wek ater yök acï yiëëm, ku nɔn ee yen muulde, ke dɔm ku yiɛ̈nkï yen.

⁵ Ku na cï muulde wïïk ke de kɔ̈u käŋ, ke du winythok, kuɔnyë jatkï muul nhial.

⁶ “Du yic de raan kuany nyin jiɛi në gööny nɔm.

⁷ Du raan ciëk thok ë lueth, ku du raan cïn guöp awäc näk. Raan ëbɛ̈n, raan ee kërɛɛc cït ee kënë looi acä bï puɔ̈l.

⁸ Du yïthok ee tɔ kum, kumthok ee raan tɔ bai yic, ku mɛ̈ɛ̈r yic de kɔc cïn guöp awäc.

⁹ “Du raan lei kuc luööi. Täu de raan lei aŋiɛckï, në luɔi ɣɔn cä wek kɔn aa kɔc lei paan ë Rip.

Ruöön ye Run Dhorou ku Kööl ye Akööl Dhorou

¹⁰ “Yak duumkun com në runiic kadhetem, ku määtkï ka cï luɔkiic.

¹¹ Ku në ruöön ye run dhorou, ke we tɔ duum lɔ̈ŋ. Ku duökï aröl cï luɔk thïn tem. Abï kɔc kuanynyïïn keek cam. Ku ka cï döŋ piny abï läi roor ke lɔ̈ɔ̈k nyuööth. Yak duumkuön ke enap looi ayadäŋ, ayï duum ke olip.

¹² “Yak luui në akööliic kadhetem, ku duökï ee luui në kööl ye akööl dhorou, ke ɣɔ̈kkun ku mulkun ku lïïmkun, ayï kɔc lɛɛn luui week ke ke bï lɔ̈ŋ.

¹³ “Piŋ kë lɛ̈k yïn ëbɛ̈n, Yɛn Bɛ̈nydït. Du yiëth kɔ̈k ee lam, ayï rinken du ke ee lueel.

Dhuëŋ Dït Kadiäk

¹⁴ “Yak dhuëŋ dït looi kadiäk në ruöönic dhuɛ̈ɛ̈ŋ wek Ɛn.

¹⁵ Ku yak Dhuëëŋ de kuïn cïnic luɔu looi cït man cän e thɔ̈n week. Yak Dhuëëŋ de Kuïn Cïnic Luɔu looi cït man cän e thɔ̈n week në pɛɛi de Abib, pɛɛi wään jäl wek Rip. Yak kuïn cï pam cïnic luɔu cam në nïn ke dhuëëŋiic kadhorou. Ku raan ëbɛ̈n ë weyiic ë lam Ɛn në miɔ̈c.

¹⁶ “Yak dhuëëŋ de tëm looi, në baŋ de ka cï kɔn luɔk të cä wek tëm de ka cï luɔk gɔl ë duumkun yiic. “Yak Dhuëëŋ de Kɛ̈ɛ̈t looi, të ye käŋ määt yiic, kakuön cï luɔk ë duumiic në thök ë ruöön.

¹⁷ Röör kedhie abïk aa bɛ̈n në Bɛ̈nydït Nhialic nɔm bïk En bɛ̈n lam raandiäk në ruöönic ëbɛ̈n në ee dhuëŋkë yiic kadiäk.

¹⁸ “Të gëm yïn Ɛn miɔ̈c de yic riɛm, ke du mat kekë kë mäth. Ku kɔl de kë ë nɛ̈kë Yɛn në ee dhuëŋkë yiic ë cïï tɛ̈uwë miäk.

¹⁹ “Yak kë tueŋ de ka cï kɔn luɔk domdun bɛ̈ɛ̈i ɣön ë Bɛ̈nydït Nhialicdun. Duökï amɛthɔ̈k ee thaal në ciɛk ke man yiic.”

Thön ku Lëk

²⁰ “Tunynhial abä tuɔɔc në wenïïm tueŋ, gël week në cäthdunic abä wek ɣet të cä kiëët në këdun.

²¹ Döt ee cökë ë gɔk, ku ye kë cï lueel piŋ. Du keek reec, ee Yɛn ë toc en. Ku acï we bï päl reec rɛɛc wek jamde, në baŋ nu rinkï ë yeyic.

²² Na lak gam thok, ku luɔikï këriëëc thɔ̈n week ëbɛ̈n, Yɛn bï gɔ̈m wokë kɔc de ater në week kedhie.

²³ Tunynhialdï abï cath ë wenïïm tueŋ, ku abï we lɛɛr piny de Amor, ku Ɣit, ku Peridh, ku Kanaan, ku Ɣib, ku Jebuth, ku abäk keek riɔ̈ɔ̈k.

²⁴ Duökï wenïïm gut piny në yiëthken nïïm ku duökï ke lam. Ku duökï kuɛɛrkɛn ke läm dɔmiic. Riäkkï yiëthken ku dhuööŋkï kur ke yïïkken.

²⁵ Të la wek Ɛn aa lam, Yɛn Bɛ̈nydït Nhialicdun, wek bä thiëi kacaam ku pïïu, ku nyaai jɔɔkkun.

²⁶ Acïn tiiŋ bï bɛ wääc pinydun, ku cïn tiiŋ be rol. Ku wek bä aa tɔ ciëŋ aläl ke we pïïr.

²⁷ “Kɔc ee week kaaŋ nïïm abä keek aa riääc, ku nuɔɔn kɔc gɔ̈m në week. Ku kɔc de ater në week abä keek aa tɔ kɔt në week.

²⁸ Ku yɛn bï abulbuul tuɔɔc në wenïïm tueŋ, Yɛn bï kɔc ke Ɣib cuɔp wei kueer, ayï kɔc ke Kanaan, ku kɔc ke Ɣit.

²⁹ Ku acä ke bï guɔ cuɔp wei në ruöön tökic. Na cuɔp ke wei në ruöön tökic, piny acïn raan duëër tɔ̈u thïn, ku aduëër läi roor ɣap ku nuankï week.

³⁰ Abä ke cuɔp wei ë mäth ë mäth, agut të bä wek kɔn juëc ku lɛ̈ukï pinyic.

³¹ Ku pinydun abï rɔt gɔl në Wɛ̈ɛ̈r Thith agut cï Wɛ̈ɛ̈rdïït ɣer. Ku gɔl në wɛ̈ɛ̈r ë Yuparat ale guööt ë jɔ̈ɔ̈ric. Ku wek bä gäm riɛl bä wek kɔc cieŋ ee pinyë cuɔp wei.

³² Duökï de män matkï në keek, ayï yiëthken.

³³ Duökï keek tɔ rɛ̈ɛ̈r pinydun. Të la we ke tɔ rɛ̈ɛ̈r pinydun, abïk week meet në läm de yiëthken, ku tɔkï we lui Ɛn kërac. Të la wek yiëthken lam, abï aa dɛ̈p dïït deepë week.