Bɛ̈n 21 - JAM DE NHIALIC 2011

Luui de Lïïm

¹ Na wën, ke lëk ë Bɛ̈nydït Mothe an, “Guïïrë kɔc ke Yithriɛl ee lööŋkë:

² an, Të cïï raan lïm de Ɣeberuu ɣɔɔc, ka abï ya luööi në run kadhetem. Ku në ruöön ye run dhorou, abï aa gäm nɔm lääude, ku tɔ jël ke cïn kë tɛ̈ɛ̈u piny wɛɛr en rɔt.

³ Na yë bɔ̈ yetök ke kën thiëëk, ka bï yenɔm dɔk yetök të cïn tik. Ku na ë bɔ̈ kekë tiiŋde, ka bïk jäl kekë tiiŋde ëtök.

⁴ Na yë bɛ̈nyde yen ë gëm en tik, ku cï tik mïth dhiëëth, mïthwät ku nɔn ee kek duet, ke tik kekë mïthke abïk aa kake bɛ̈nyde. Ku mony lïm abï jäl yetök.

⁵ Ku na cïï lïm lueel an nhiɛɛr bɛ̈nyde, ku nhiɛɛr tiiŋde ku mïthke, ku cïï kɔɔr nɔn bï ye gäm nɔm lääu,

⁶ ka bïï bɛ̈nyde ye jɔ lɛɛr tëde Nhialic. Ku ëtɛ̈ɛ̈n, abï jɔ tɔ kääc ɣöt thok ke kɛn rɔt në athïn, ku nɔn ee yen ɣöt thok guöpde. Ku thuth yïth në kë ye kɔc thuth yïth. Ku abï ja ye lïmde në pïïrde yic ëbɛ̈n.

⁷ “Ku na cï raan nyande ɣaac ke ye lïm, acïï bï gäm nɔmlääu cït man ë lïm moc.

⁸ Na cï ɣɔ̈c raan kɔɔr en bï ya tiiŋde, ku cï bɛ jai ke cïï kɔɔr, ke be ye ɣɔ̈c wun. Ë cïï bɛ̈nyde ye be ɣɔ̈c raan lei. Na ɣɔ̈c kɔc lei, ke duëër aa kuöc luɔi yen cï yen en kuöc looi.

⁹ Ku na cï raan nyan lïm ɣɔ̈c wënde, ka duëër aa rëër ke ye cït man ë nyande.

¹⁰ Ku na cï raan tiiŋ däŋ thiaak, tiiŋ ye diäär rou, ka abï ŋoot ke ye tiiŋ tueŋë gäm këciɛm, ku lupɔɔke ku yicde cït man wään tueŋ. Ku tɔ rɛ̈ɛ̈r ke ye tiiŋde.

¹¹ Ku na cïï lui ee kake kedhie, ke gëm nɔmlääu. Ku tɔ jäl ke cïn wëu tɛ̈ɛ̈u piny wɛɛr en ke rɔt.

Lööŋ ke Luɔi de Kërac

¹² “Raan cï raan yup nɛ̈k, abï aa nɔ̈k ayadäŋ.

¹³ Ku na de raan cï raan wääth, ku nɛ̈k ke ë cïï köör nääk, ku ee Nhialic yen ë tɔ raan wɛ̈ɛ̈th raan aduëër rɔt kual ke lɔ të bä lɔ̈c week. Ku ëtɛ̈ɛ̈n, aduëër poth.

¹⁴ Ku na tɛk raan bï raan nɔ̈k, ku nɛ̈k raan ke ŋic, ke näk, na cakaa yen ë cï kat le thiaan në yïïŋdï thar piny.

¹⁵ “Raan yup wun ku nɔn yen man ke näk.

¹⁶ “Raan kual raan le ɣaac ku nɔn le yen en tɔ ye lïmde, ke näk.

¹⁷ “Raan lɛ̈m wun kërac, ku nɔn ee yen man ke näk.

¹⁸ “Na de kɔc cï piɔ̈t ku cï raan tök në keyiic raan däŋë biök në dööt, ku nɔn cï gut në yeciin, ku cï ee yumë ye tääc ke kën nɔ̈k.

¹⁹ Raan ë yup en acïn guöp gääk. Na cï raan ë yup guöp duɛ̈ɛ̈r ŋuɛ̈ɛ̈n tëthiinakäŋ, ku cï piny gut ku thel rɔt biic, ke raan ë yup en abï wëu cuat piny në baŋ de nïn cïï raan cï gutë thöl piny ke cïï lui. Ku kony agut cï kööl bï yen guöp pial.

²⁰ “Ku na dui raan lïmde në thieec abï thou, lïm moc ku nɔn ee yen lïm tik, ke raanë ë kum.

²¹ Ku na kën lïm thou ee kööl ë dui ë yen thïnë, ku jɔ bɛ̈n thou të cït miäk ku nɔn thou en ke cï nïn aa rou, ke bɛ̈ny ë dui yen ë cïï kum. Määr bï kake määr yetök ë kuöm dït.

²² “Na piɔ̈t kɔc, ku lek tiiŋ liac wääth abï tik wääc. Ku piɛth tik ke cïn guöp tëtök dït, ke raan ë yup en ë puk meth cït man ë kë kɔɔr ë mony de tik, kë cïï luk gam.

²³ Ku na cïk tik luöi buɔ̈t dït, ke pïïr ee nɔm pïïr,

²⁴ ku nyin ee nɔm nyin, ku lëc ee nɔm lëc, ku ciin ee nɔm ciin, ku cök ee nɔm cök,

²⁵ nyup ee nɔm nyup, ku buɔ̈t ee nɔm buɔ̈t, ku piɔ̈ny ee nɔm piɔ̈ny.

²⁶ “Na cï raan lïmde yup nyin, lïm moc ku nɔn ee yen duet ku dhiɔ̈i nyin, ke lïm ë gëmë nɔmlääu ke cïn kë tɛ̈ɛ̈u piny. Nyin ee nɔn kë bï tääu piny.

²⁷ Ku na ee lëc yen ë bïï bei, ke lïm ë gëmë nɔmlääu aya ke cïn kë tɛ̈ɛ̈u piny. Lëc ee nɔm kë duëër tääu piny.

Luɔi de Kɔc de Käŋ

²⁸ “Na cï thɔn ë weŋ raan gut nɛ̈k, moc ku nɔn ee yen tik, ke thɔnë ë biöökë abï thou. Ku rïïŋde ë cuɛtë wei ke cïï cuet. Ku raan de thɔn abï nɔm ciën gääk.

²⁹ Ku na ye thɔn ee kɔc guööt, ku cï lɛ̈k raan de thɔn ku cïï thɔnde mac. Ku cï thɔn raan gut nɛ̈k, moc ku nɔn ee yen tik, ke thɔn ë biöökë abï thou. Ku raan de thɔn ë näk ayadäŋ.

³⁰ Ku na cï raan de thɔn puɔ̈l apuk, ke tɔ tɛ̈ɛ̈u kuën cï lueel piny ëbɛ̈n raantök.

³¹ Na cï thɔn mɛwä nɔ̈k, ku nɔn ee yen duet, ke kum në ee kuöm cït ee kuömë ayadäŋ.

³² Ku të cïï thɔn lïm gut ku nɛ̈k, lïm moc ku nɔn ee yen tik. Ke thɔn ë biöökë abï thou, ku raan de thɔn ë puk raan në atek kathiërdiäk gëmë keek bɛ̈ny de lïm ë näk.

³³ “Na cï raan yith liep nɔm ku pɛ̈l atuɛɛr, ku nɔn ee yen yinh ë wec ku kën kum nɔm. Ku lɔ weŋ lööny thïn, ku nɔn ee yen muul.

³⁴ Ke raan de yith ë tɛ̈ɛ̈u wëu piny cool en kë cï lööny yiith, ku nööm län cï thou.

³⁵ Na cï thɔn ë raan thɔn ë raan däŋ nɔ̈k. Ke kɔc de thön ë ke ɣɛɛc thɔn pïïrë, ku tekkï wëu, ku tekkï rïïŋ de thɔn cï nɔ̈kë ayadäŋ.

³⁶ Ku na ye thɔn ë ŋic nɔn yen thön guööt, ku kën ë raan de yen ye mac. Ke raan de thɔn ë col thɔn cï nɔ̈k, ku nööm rïŋ de thɔn cï thou.