Bɛ̈n 2 - JAM DE NHIALIC 2011

Dhiënh ë Mothe

¹ Ku në aköölkë yiic, raan dhiën ë Lebai ë nyan dhiënden bɛ̈n thiaak,

² go ye dhiëth mɛwä. Na wën, aacï meth en diir, ke thiɛɛn në pɛ̈i kadiäk.

³ Na ɣɔn, aa cïï be lëu ë thiën, ke nöm diöny cï cuëëc ë aguöt, ku boot kɔ̈u në wɛ̈ɛ̈r col nyin cɔl tar, gël en pïïu ë ke cï bï lɔ thïn. Ku tɛ̈ɛ̈c meth thïn, ku jɔt le tääu aguötic ë kiir yɔu.

⁴ Ku lɔ nyankënë ee meth kɔ̈ɔ̈c tëmec ë määth, kɔɔr bï tïŋ kë bï meth yök.

⁵ Ago nyan ë melik bɛ̈n ë wɛ̈ɛ̈r yɔu bï bɛ̈n waak. Na wën aciɛɛth nyan lïmde yecök ë wɛ̈ɛ̈r yɔu, ke tïŋ diöny aguötic. Go nyan lïmde tooc le bɛ̈ɛ̈i bei.

⁶ Na wën, aa liep nyan ë melik diöny nɔm, ke yök aye mɛwä thiinakäŋ yen nu thïn ke kïïu. Go piɔ̈u kok ke yen, ku lueel an, “Kënë abï dhiɛl aa mɛnh töŋ de mïth ke Ɣeberuu.”

⁷ Na wën, ke nyankënë ee meth ë bɔ̈ tëde nyan ë melik, ku lëk en an, “La yï cɔ̈l tiiŋ ë Ɣeberuu tök bï yï bɛ̈n muɔ̈k ee mɛnhë?”

⁸ Go puɔ̈k nɔm en an, “Lɔ cɔl.” Go duet man meth lɔ bɛ̈ɛ̈i guöpde.

⁹ Go nyan ë melik lɛ̈k tik an, “Nöm ee mɛnhë, lɔ muɔ̈kë yɛn ku yïn bä riɔp.” Ago tik meth jɔt le muk.

¹⁰ Na ɣɔn aacï meth dït, ke yïn nyan ë melik. Go nyan ë melik ye tɔ ye wënde ku lueel an, “Abä cäk rin an Mothe në luɔi ë lääu ɛn en bei wïïr.”

Mothe Akual Rɔt ke Lɔ Midian

¹¹ Ɣɔn cïï Mothe dhuöök, ë kɔcken bɛ̈n kɛ̈ny ë kööl tök, le luɔɔidɛn dïït ye kuɛ̈th keek tïŋ. Ago raan ë Rip lɔ yök adui raan ë Ɣeberuu, raanden ë yï Mothe guöpde.

¹² Na wën, ke Mothe ciɛɛth yenyin, go ciën raan tïŋ. Go raan ë Rip nɔ̈k, ku thiɛɛn ë liɛɛtic.

¹³ Na ɣɔn amiäk, ke be lɔ. Go kɔc ke Ɣeberuu yök apiɔ̈t ë röt kaarou. Go lɛ̈k raan de guöp awäc në keyiic an, “Eeŋö yuɔ̈p ë raandun?”

¹⁴ Go raan puɔ̈k nɔm Mothe an, “Eeŋa tɔ yï ee bɛ̈ny bä löŋda bɛ̈n guiir? Kɔɔr bä ya bɛ nɔ̈k cït man ë raan ë Rip?” Go Mothe riɔ̈ɔ̈c, ku lueel ë yepiɔ̈u an, “Luɔi cän raan nɔ̈k acï dhiɛl ŋic.”

^15-16 Na wën, aa piŋ melik ee kënë, ke kɔɔr bï Mothe nɔ̈k. Go Mothe rɔt kual ke lɔ piny ë Midian le rëër ëtɛ̈ɛ̈n. Na kööl tök, ke Mothe lɔ nyuc ë yith nɔm. Ku bɛ̈ny de kake Nhialic de piny ë Midian aa de nɔm duet kadhorou. Gokï lɔ ë yith nɔm, lek thak thɛ̈cic pïïu ke thök ke wuönden ë ke bï dek.

¹⁷ Go tïït kɔ̈k bɛ̈n, ku copkï duet wei ë yith nɔm. Go Mothe rɔt jɔt ku kony keek, ku tɔ thök ke wuönden dëk.

¹⁸ Na wën, aa pukkï kenïïm wuönden Rewel, ke lop ë wuönden keek an, “Eeŋö dïït cä wek wenïïm dap guɔ lɔ puk aya ee köölë?”

¹⁹ Agokï lueel an, “Ade raan ë Rip cï wo lɔ kony wën në tïït, ku gëm thök pïïu tɔ ke dëk në yen.”

²⁰ Go duɛtke luɔp an, “Ka cï döŋ ë nou? Eeŋö nyääŋ wek raan piny? Lak calkï bï bɛ̈n cam ke wook.”

²¹ Go Mothe gam nɔn bï yen rëër ke yen. Go Mothe gäm Dhipoora nyande, thiɛɛk.

²² Go Dhipoora mɛwä dhiëëth, go Mothe cäk an Gercom lueel an, “Yɛn ee kaman ee pinyë.”

²³ Ku në ee runkë yiic, melik ë Rip ë bɛ̈n thou, ku ŋoot kɔc ke Yithriɛl ke ke dhiau piɔ̈ɔ̈th në ciɛɛŋ cieŋ ë keek, ku yek kuɔɔny dhiëëu. Go Nhialic dhiënden piŋ.

²⁴ Na wën, aacï Nhialic dhiënden piŋ, ke tak mändɛn ɣɔn cï looi kekë Abraɣam, ku Yithaak, ku Jakop.

²⁵ Go Nhialic ciɛɛŋ cieŋ ë kɔc ke Yithriɛl tïŋ, ku tïŋ Nhialic täuden.