Bɛ̈n 18 - JAM DE NHIALIC 2011

Jethro Akëny Mothe

¹ Jethro, monywun ë Mothe, bɛ̈ny dïït de kake Nhialic wun ë Midian, acï këriëëc cïï Nhialic luöi Mothe piŋ ëbɛ̈n, ku piŋ ka cï luöi kɔc ke Yithriɛl ɣɔn bïï en ke bei piny ë Rip.

² Go Jethro monywun Mothe kɛ̈ny kekë Dhipoora tiiŋ ë Mothe wään cï döŋ,

³ ku lɔ wɛ̈ɛ̈t ke Mothe kaarou, Gercom kekë Eliedher. Aa cïï Mothe lueel an, “Yɛn rɛ̈ɛ̈r ke yɛn ye kaman piny lei. Go wëndɛn tök cäk an Gercom (Kaman).

⁴ Ku be lueel an, “Nhialic de wää ë ya luäk bei në melik ë Rip cin ade cï ya nɔ̈k. Go wëndɛn däŋë cäk an Eliedher (Nhialic ë ya kony).

⁵ Go Jethro lɔ ë jɔ̈ɔ̈ric në kuur ë Nhialic lɔ̈ɔ̈m të nu Mothe, ke cath kekë tiiŋ ë Mothe ku wɛ̈ɛ̈tke kaarou.

⁶ Go Jethro Mothe tɔ yïnë thok luɔi bï kek.

⁷ Go Mothe ke luɔɔr nïïm biic. Na wën ke lɔ yenɔm guöt piny në Jethro nɔm, ku ciim thok. Ku lopkï röt në pial ë guöp, ku jëlkï lekï në Paany ë Mothe yic.

⁸ Go Mothe Jethro tɛ̈t këriëëc ëbɛ̈n, ka wään cïï Bɛ̈nydït luöi melik ë Rip, kekë kɔc ke Rip ɣɔn luɛ̈k en kɔc ke Yithriɛl bei. Ku tët katuc thook wään cï ke yök kueer, ku luɔɔi cïï Bɛ̈nydït ke kony.

⁹ Na wën, aa piŋ Jethro ee kakë kedhie, ke mit piɔ̈u,

¹⁰ ku lueel an, “Lec Bɛ̈nydït ë luɛ̈k yïn bei në melik ë Rip ciin kekë kɔc ke Rip! Lec Bɛ̈nydït cï kɔc ke Yithriɛl luäk bei në lïïmic!

¹¹ Acä jɔ ŋic nɔn Yen Bɛ̈nydït Yen dït awär yiëth kedhie. Në luɔi cï yen kɔc ke Yithriɛl luök ɣɔn luui ë kɔc ke Rip keek në dhääl.”

¹² Na wën, ke Jethro bïï miɔ̈c bï bɛ̈n nyop ëbɛ̈n. Ku bïï miɔ̈c däŋ bï bɛ̈n gäm Nhialic! Go Aron lɔ ke yen ku lɔ röördït ke Yithriɛl, lek këcam cam në Nhialic nɔm.

Kuɛ̈ny de Bäny ke Luk

¹³ Na ɣɔn amiäk, ke Mothe ë nyuc ke guiir luŋ de kɔc. Go kɔc kɔ̈ɔ̈c në yelɔ̈ɔ̈m ë caŋ amiäk agut cï thëën.

¹⁴ Na wën, aa tïŋ ë Jethro këriëëc dïït looi ë Mothe, ke lop an, “Eeŋö ë kakiith luöiyë kɔcë? Eeŋö yïn ee kakiith looi yïtök, ku jɔ kɔc tɔ kääc në yïnɔm ëbɛ̈n ë caŋ amiäk agut cï thëën?”

¹⁵ Go Mothe puk nɔm an, “Ee luɔi ye kɔc këde Nhialic piɔ̈u bɛ̈n luɔp në yɛn.

¹⁶ Na de kɔc cï kɛ̈ɛ̈k, ayek bɛ̈n të nu yɛnë bä raan de nɔm yic bɛ̈n tïŋ në keyiic. Ku nyuöth keek lööŋ ke Nhialic ku ka cïï Nhialic lueel.”

¹⁷ Go Jethro lɛ̈k en an, “Kë loiyë acïï piɛth.

¹⁸ Yïn bï rɔt bääp ku bääpë kɔc aya. Acïï rɔ̈ŋ bä luɔiyë aa looi yïtök.

¹⁹ Ku ënɔɔnë, piŋ kë lɛ̈k yïn. Yïn bä nyuöth kueer, ku Nhialic abï tɔ̈u ke yïn! Ye bɛ̈n në Nhialic nɔm në nyin ë kɔciic. Ku bɛ̈ɛ̈iyë göönyden në Nhialic nɔm ayadäŋ.

²⁰ Ye ke nyuöth kë cïï Nhialic lueel. Ku wɛ̈ɛ̈rë ke rëër bï kek aa rëër, ayï kë bïk aa looi.

²¹ Ku däŋ nu aya, ee luɔi bï yïn kɔc lëu luɔɔi kuany. Ku tɔ keek ee bäny: bäny ke aguum ke kɔc, ku bäny ke bot, ku bäny ke thiërdhïc, ku bäny ke thiëër. Ke ke ye kɔc ee Nhialic riëëu, kɔc cï gam, ku cïkï kumthok bï ya nööm.

²² Ku ye ke tɔ guiir luŋ ë kɔc ë cieŋ, ye keek tɔ guiir jiɛɛm piɔliic kedhie kapäc. Na de jam rilic ke bïk aa yiɛ̈n yïn. Ku ëtɛ̈ɛ̈n, abï ŋuɛ̈ɛ̈n ë määth, abïk yïn aa kuɔny në luɔiduön dïïtë.

²³ Na loi cït man cïï Nhialic e lueel, ke yïn cïï rɔt bï bääp, ku ŋɛk abï rɔt aa puɔ̈k baai ke jamde ë cï thök në guiɛɛr.”

²⁴ Go Mothe jam de Jethro gam,

²⁵ ku kuɛny kɔc lëthiic në kɔc ke Yithriɛliic ëbɛ̈n. Kuɛny keek tɔ ke ee bäny ke aguum ke kɔc, ku bäny ke bot, ku bäny ke thiërdhïc, ku bäny ke thiëër.

²⁶ Gokï kɔc aa kuum në kueer yic, ku yek jiɛɛm riliic yiɛ̈n Mothe, ku guiirkï jiɛɛm piɔliic kapäc.

²⁷ Na wën, ke Mothe ë ruɛc Jethro cök kueer, go Jethro jäl ke lɔ wunde.