Bɛ̈n 17 - JAM DE NHIALIC 2011

Pïïu në Kuuric

¹ Go akutnɔm de kɔc ke Yithriɛl jäl në jɔ̈ɔ̈r ë Thin kedhie, ciɛthkï ke ke ye piɔ̈ɔ̈t ku kuëthkï cït man cïï Bɛ̈nydït e lɛ̈k keek. Agokï piɔ̈ɔ̈t Repidim, ku acïn pïïu ke dëk ë nu ëtɛ̈ɛ̈n.

² Agokï dok në Mothe luelkï an, “Gämë wo pïïu dekku.” Go Mothe puk nɔm an, “Eeŋö tɔ we dok? Eeŋö thɛ̈mkï Bɛ̈nydït?”

³ Ku kɔc cïï reu ke nɔ̈k arëët, agokï ŋoot ke ke dok në Mothe luelkï an, “Eeŋö bɛ̈ɛ̈i wek wo bei Rip? Ku bäk wo bɛ̈n tɔ thou në reu në mïth ku ɣɔ̈k?”

⁴ Go Mothe Bɛ̈nydït lɔ̈ŋ në piɔ̈n tök lueel an, “Eeŋö bä jɔ luöi ee kɔckë Bɛ̈nydït? Akɔɔrkï bïk ɛn biɔ̈ɔ̈k në kur.”

⁵ Go Bɛ̈nydït lɛ̈k Mothe an, “Jɔt kɔc kɔ̈k në röördït ke Yithriɛliic, ku wat keek. Nöm thieny wään yup yïn Kiir.

⁶ Yɛn bï lɔ kɔ̈ɔ̈c në yïnɔm në kuur ë Thinai. Lɔ tɔŋ kuur kɔ̈u, ku pïïu abïk bɛ̈n bei thïn në yeyic, ke kɔc ë ke bï dek.” Go Mothe looi aya në röördït ke Yithriɛl nïïm.

⁷ Go ëtɛ̈ɛ̈n cäk an Matha ku Meriba (ku rinkë aluelkï thëm ku dok). Në luɔi ë cïï mïth ke Yithriɛl dok ku themkï Bɛ̈nydït, wën ye kek lop an, “Tɔ̈u Bɛ̈nydït ke wook ku liiu?”

Tɔŋ de Kɔc ke Amalek

⁸ Go kɔc ke Amalek kɔc ke Yithriɛl mak në Repidim.

⁹ Go Mothe lɛ̈k Jocua an, “Kuany kɔc bï lɔ biök në kɔc ke Amalek miäk. Yɛn bï lɔ kɔ̈ɔ̈c ë kuur nɔm ke ya muk thieec nhial, thieny wään lëk ë Nhialic ɛn an muɔ̈k.”

¹⁰ Go Jocua e looi cït man cïï Mothe e lɛ̈k en. Go lɔ biök kekë kɔc ke Amalek. Ku jël ë Mothe kekë Aron ku Ɣur lekkï ë kuur nɔm.

¹¹ Të muk ë Mothe yecin nhial, ke kɔc ke Yithriɛl ë ke tiëm. Na tɛ̈ɛ̈u Mothe yecin piny, ke kɔc ke Amalek ë ke tiëm.

¹² Na wën aacï Mothe cin ŋoot, ke Aron kekë Ɣur ë ke bïï kuur. Ku tɔkï Mothe nyuc në yenɔm, ku kɛ̈ɛ̈ckï në yelɔ̈ɔ̈m, ku mukkï cin nhial abï akɔ̈l lɔ piny.

¹³ Go Jocua kɔc ke Amalek jɔ tiaam taitai.

¹⁴ Go Bɛ̈nydït lɛ̈k Mothe an, “Gäär ë tiëmë, ke bï ya tak. lɛ̈kë Jocua an Yɛn bï kɔc ke Amalek jɔ riɔ̈ɔ̈k ëtaiwei.”

¹⁵ Go Mothe yïk yïk ku ciëk an, “Bɛ̈nydït Yen aye beerdï.”

¹⁶ Ku lueel an, “Jatkï beer de Bɛ̈nydït nhial! Bɛ̈nydït abï cieŋ ke gɔ̈m kekë kɔc ke Amalek anande!”