Bɛ̈n 15 - JAM DE NHIALIC 2011

Din ë Mothe

¹ Na wën, ke Mothe kekë kɔc ke Yithriɛl ë ke piɔny Bɛ̈nydït në ee dinë an, “Yɛn piɔny Bɛ̈nydït në yöŋ cï Yen dhuëëŋ yök, në tiëm dïït cï Yen tiam. Ë jöŋgöör cuat wïïr, në kɔc cath në kekɔ̈ɔ̈th.

² Bɛ̈nydït yen aye riɛldï, ee yen ë kony ɛn. Ee yen ee Nhialicdï, ka abä leec. Ee Nhialic de awuur, ka abä piɔ̈ny dhuëëŋde.

³ Bɛ̈nydït aŋic tɔŋ biök. Rinke acɔl ke Bɛ̈nydït.

⁴ “Ë rem de Rip cuat wïïr, në abëëlkɛn ke tɔŋ, rem piɛthdɛn ë tɔŋ, acï cuat në Wɛ̈ɛ̈r Thithic.

⁵ Go lil ë wɛ̈ɛ̈r ke mou, Agokï dïïr cït man ë kuur.

⁶ “Ciin cuënydu Bɛ̈nydït, acath ke riɛl dïït agök, ee kɔc de wek ater riäär piny.

⁷ Yïn ë kɔc de wek ater tiaam, në dhuëëŋduön dïït de tiëm, Yïn ë gɔ̈th, go ke nyop cït wal ril.

⁸ Yïn aa tɔ yom put wïïr, go pïïu kenïïm thɔɔc, agokï röt ciɛi nhial cït päny, ago lil ë wɛ̈ɛ̈r koth abï lɔ gaŋgaŋ.

⁹ Alueel ë kɔckuɔn ke ater an, ‘Abuk keek kuany cök ku dɔmku keek, wok bï abätɛ̈ɛ̈ukuɔ wɛ̈ɛ̈th bei, ku pecku ka cath në keek kedhie.’

¹⁰ Go ke mou wïïr në wëiduön tök Bɛ̈nydït, gokï dïïr në pïïuwiic cït wënh thiek.

¹¹ “Eeŋa kït ke Yïn Bɛ̈nydït, në yiëthiic ëbɛ̈n? Eeŋa kït ke yïn në dhuëëŋ de ɣɛɛrë piɔ̈u? Eeŋa duëër ka dït ke gäi looi cït man ë Yïn?

¹² Yïn aa yɛɛk ciin cuënydu nhial, go piny kɔckuɔn ke ater tuiic.

¹³ Yïn ë nhiëërduön agɔk döt apiɛth, go kɔc cï luök kuaath, ku wat keek në riɛldu, abïk ɣet piny ɣeric.

¹⁴ Na wën, aa piŋ juöör, ke ke lɛth ë riɔ̈ɔ̈c keek, ku riɔ̈c kɔc ke Pilithtia kedhie aya.

¹⁵ Go bäny ke Edom riɔ̈ɔ̈c aläl, ku lɛthë jööt ke Mowap, ku pɛ̈l kɔc ke Kanaan röt wei.

¹⁶ Aake tïŋ riɛldu Bɛ̈nydït, gokï riɔ̈ɔ̈c arëët, ku kɛ̈ɛ̈ckï ke ke thany kethäär atëëk ë kɔcku. Kɔc ɣɔn lunyë bei në lïïmic.

¹⁷ Ku bä ke bɛ̈n piith në kuur nɔm, tëduön cï lɔc Bɛ̈nydït an bïï aa ɣöndu. Tëɣeric ɣɔn yïk në Yïn guöpdu.

¹⁸ Bɛ̈nydït, Yïn aye melik ë caaŋdu.”

Din ë Mariam

¹⁹ Kɔc ke Yithriɛl aake tem wɛ̈ɛ̈r ke ke cath të ril. Na wën alɔ kɔc ke Rip wïïr në abëëlken, ku jöŋgöörken, ku kɔc cath në kekɔ̈ɔ̈th, ke Bɛ̈nydït ë tɔ wɛ̈ɛ̈r mat ë yic, gokï mou kedhie.

²⁰ Go tiët Mariam, nyankënë Aron lɔ̈ɔ̈rdɛn de kɔ̈u joth nööm, ku nöm diäär lɔ̈rkɛn de kɔ̈ɔ̈th joth kedhie, ku kuanykï Mariam cök ke ke cɔ̈ŋ.

²¹ Go Mariam ke kiët dit, lueel an, “Piɔnyku Bɛ̈nydït, në baŋ cï yen dhuëëŋ yök, Në tiëm cï Yen tiam. Ë jöŋgöör cuat wïïr në kɔc cath në kekɔ̈ɔ̈th.”

Pïïu Kec

²² Na wën, ke Mothe ë wɛt kɔc ke Yithriɛl wei në Wɛ̈ɛ̈r Thith yɔu, leer keek ë jɔ̈ɔ̈r ë Curic. Gokï cath në jɔ̈ɔ̈ric në nïn kadiäk ke cïn pïïu yökkï.

²³ Na wën, ke ke ɣet të cɔl Mara. Ku pïïu ke ëtɛ̈ɛ̈n akeckï, gokï kɛ̈n bɛ̈n dek thïn. Yen kë ë ciëk ëtɛ̈ɛ̈n ka an Mara (an akec).

²⁴ Na wën, ke kɔc ë dok në Mothe, ku lopkï an, “Eeŋö buk dek?”

²⁵ Go Mothe Bɛ̈nydït lɔ̈ŋ në piɔ̈nde ëbɛ̈n, go Bɛ̈nydït e nyuöth tim. Na wën, ke Mothe ë nöm tim ku cuɛt ë pïïuwiic, go pïïu miɛt. Na wën, ke gëm ë Bɛ̈nydït ke lööŋ ëtɛ̈ɛ̈n, lööŋ ke rëër, ku them keek ëtɛ̈ɛ̈n ayadäŋ.

²⁶ Lëk keek an, “Na bäk röl de Bɛ̈nydït Nhialic gam ë yic, ku bäk yic aa looi, ku dɔ̈tkï lööŋkï, wek cä bï tuöc jɔɔk cït jɔɔk wään cä tuöc kɔc ke Rip. Ee Yɛn Bɛ̈nydït raan ee we tɔ dem.”

²⁷ Na ɣɔn, ke ke jɔ ɣet Elim, të nu awɛɛŋ ke pïïu kadhorou ku akööt kathiërdhorou, gokï piɔ̈ɔ̈t ë pïïu lɔ̈m ëtɛ̈ɛ̈n.