Bɛ̈n 14 - JAM DE NHIALIC 2011

Tɛ̈m de Wɛ̈ɛ̈r Thith

¹ Go Bɛ̈nydït lɛ̈k Mothe an,

² “lɛ̈kë kɔc ke Yithriɛl ë ke puk röt, lek piɔ̈ɔ̈t në Pai Ɣaɣiroth nɔm tueŋ. Në kaam de Migdol kekë Wɛ̈ɛ̈r Thith, në wɛ̈ɛ̈r yɔu të tiŋ Baal Dhepon nɔm.

³ Ke bïï melik ë Rip lueel an cï kɔc ke Yithriɛl yëëm pinyde, ku lueel an cïï jɔ̈ɔ̈r ke gël nïïm.

⁴ Abä tɔ ril nɔm ka bï we kuany cök. Ku yɛn bï dhuëëŋ yök të lan melik tiaam kekë remde. Yen abïï kɔc ke Rip Ya jɔ ŋic nɔn Yan Bɛ̈nydït. Go kɔc ke Yithriɛl kë lëkë keek looi ëbɛ̈n cït man cï ye lɛ̈k keek.

⁵ Na ɣɔn, aa piŋ melik ë Rip nɔn cï kɔc röt kual, ke waar enɔm kekë bänyke, ku luelkï an, “Eeŋö cuk jɔ looi? Wok ë kɔc ke Yithriɛl tɔ jël, ku acuku ke bï bɛ yök bïk wo luööi.”

⁶ Go melik abëldɛn ë tɔŋ kiëët, ku kïït remdɛn ë tɔŋ.

⁷ Na wën, ke jɔt abëël ke tɔŋ Rip ëbɛ̈n ke ke deyiic bäny kedhie. Go kuën abëël ë jɔt aa bot kadhetem ke abëël ke tɔŋ.

⁸ Na wën, ke Bɛ̈nydït ë tɔ melik ril nɔm, go kɔc ke Yithriɛl kuany cök, kɔc gël ë Bɛ̈nydït keek.

⁹ Go rem de tɔŋ ë kɔc ke Rip ke lɔ̈ɔ̈k kuany cök, ke ke cath në jöŋgöörken, ku abëëlkɛn ke tɔŋ, ku kɔc kuath keek. Gokï ke gïth në Wɛ̈ɛ̈r Thith yɔu në Pai Ɣaɣiroth lɔ̈ɔ̈m kekë Baal Dhepon tëdɛn cï kek lɔ piɔ̈ɔ̈t thïn.

¹⁰ Na wën, aa tïŋ ë kɔc ke Yithriɛl melik ë Rip ke bɔ̈ të nu kek thïn kekë rem de tɔŋde, ke ke riɔ̈c arëët, ku cɔlkï Bɛ̈nydït an luɛ̈k keek.

¹¹ Gokï lɛ̈k Mothe an, “Cïn rɛ̈ŋ ë nu Rip? Nɔn jɔ yïn wook bɛ̈ɛ̈i buk bɛ̈n thou ë jɔ̈ɔ̈ric eenë? Tïŋ kë cï looi da, në luɔi cïn wo bɛ̈ɛ̈i bei Rip!

¹² Cie kë wään lëkku yïn ka, an abï rɔt looi, ke wo kën kɔn jäl Rip? Alëkku yïn wään an päl wook aluui kɔc ke Rip. Aŋuɛ̈ɛ̈n ë luɔi luui wok kɔc ke Rip, në luɔi bï wok bɛ̈n thou ë jɔ̈ɔ̈ric eenë.”

¹³ Go Mothe puk nɔm an, “Duökï riɔ̈c! Rɛ̈ɛ̈rkï ë lik, wek bï kuɔɔny ë Bɛ̈nydït tïŋ ee köölë. Ka kɔc ke Rip woikï keek kë, acäkkï keek bï bɛ tïŋ anandun.

¹⁴ Acïn kë kɔɔr wegup thïn, Bɛ̈nydït abï tɔŋdun biök ee köölë.”

¹⁵ Na wën, ke lëk ë Bɛ̈nydït Mothe an, “Eeŋö cɔ̈lë ya? Lɛ̈kë kɔc ke Yithriɛl ë ke lɔ tueŋ.

¹⁶ Ku yïn, yaakë thienydu nhial në wɛ̈ɛ̈r nɔm. Pïïu abïk keyiic tek, ku kɔc ke Yithriɛl abïk wɛ̈ɛ̈r teem ke ke cath tëril.

¹⁷ Ku Yɛn bï kɔc ke Rip tɔ ril nïïm, ka abïk week kuany cök wïïr. Ku Yɛn bï dhuëëŋ yök, të lan melik tiaam kekë remde, ku riääk abëëlkɛn ke tɔŋ, ku näk kɔc cath thïn.

¹⁸ Të lan keek tiaam, kɔc ke Rip abïk ɛn jɔ ŋic ëgɔk nɔn ee Yɛn Bɛ̈nydït.”

¹⁹ Na wën, ke tunynhial ë Nhialic ɣɔn nu në kɔc ke Yithriɛl nïïm tueŋë, ë wɛɛn në kecök ciëën, ku wɛɛn mën de piööl ë luät në kecök ciëën ayadäŋ.

²⁰ Go nu në kaam de kɔc ke Yithriɛl në kɔc ke Rip. Go luät tëde kɔc ke Yithriɛl tɔ ɣer, ku tɔ tëde kɔc ke Rip col. Go rɛm ke tɔŋ niin ke cïn raan lɔ të nu ŋɛk në ee wɛ̈ɛ̈rë yic ëbɛ̈n.

²¹ Na wën, ke Mothe yɔɔk yecin nhial në wɛ̈ɛ̈r nɔm, go Bɛ̈nydït wɛ̈ɛ̈r tɔ lɔ ciëën në amaŋdïït bɔ̈ në baŋ të lɔ aköl amiäk, amaŋ ruu ke put në wɛ̈ɛ̈ric ëbɛ̈n. Go pïïu tɔ tek keyiic, ku jɔ wɛ̈ɛ̈r aa tëril.

²² Go kɔc ke Yithriɛl wɛ̈ɛ̈r teem ke ke cath tëril, ku päny ke pïïu në keŋɛŋ, baŋ cuëc ku baŋ cam.

²³ Ago kɔc ke Rip ke kuany cök wïïr, në jöŋgöörken, ku abëëlkɛn ke tɔŋ, ku kɔc kuath keek.

²⁴ Ku tëthiin ye piny bɛ̈n ke ruuwë, ke Bɛ̈nydït ë luit rem de tɔŋ ë Rip ke nu në mën de biöl ë macic, ku nu në mën de piööl ë luätic, go ke tɔ riɔ̈c arëët.

²⁵ Ku riëëk cök ke abëëlkɛn ke tɔŋ, gokï cuök be cath apiɛth. Go kɔc ke Rip lueel an, “Bɛ̈nydït yen agɔ̈m ke wook, yen abiök tɔŋ ë Yithriɛl. Ka wook, wonyku röt eenë.”

²⁶ Go Bɛ̈nydït lɛ̈k Mothe an, “Yaakë yïcin nhial në wɛ̈ɛ̈r nɔm, ke pïïu ë ke bï kɔc ke Rip mät nïïm, në abëëlken, ku kɔc kuath keek.

²⁷ Go Mothe yecin yaak nhial në wɛ̈ɛ̈r nɔm, na ɣɔn amiäk, ke pïïu ë ke puk röt tëdɛn awään. Go kɔc ke Rip ë them luɔi bɛ̈n kek, go Bɛ̈nydït ke bɛ aa cuat wïïr.”

²⁸ Go pïïu röt puk, ku moukï abëël ke Rip, ku kɔc kuath ke. Ku moukï rem ë Rip ëbɛ̈n, rem de tɔŋ wään kuɛny kɔc ke Yithriɛl cök wïïr, man abï ciën raan töŋ dɔ̈ŋ në keyiic.

²⁹ Ku kɔc ke Yithriɛl aake cath në wɛ̈ɛ̈ric tëril, ku päny ke pïïu në keŋɛŋ baŋ cuëc ku baŋ cam.

³⁰ Bɛ̈nydït ë kɔc ke Yithriɛl bɛ̈n luäk bei në kɔc ke Rip cin ee köölë. Go kɔc ke Yithriɛl kɔc ke Rip bɛ̈n tïŋ acï thou piny në wɛ̈ɛ̈r yɔu.

³¹ Na wën, aa tïŋ kɔc ke Yithriɛl riɛl dïït de Bɛ̈nydït, riɛl cï Yen kɔc ke Rip tiaam, ke ke riɔ̈c në Bɛ̈nydït ku gamkï, ku gamkï Mothe lïmde ayadäŋ.