Bɛ̈n 13 - JAM DE NHIALIC 2011

Gɛm de Kɛ̈ɛ̈i

¹ Go Bɛ̈nydït lɛ̈k Mothe an,

² “Gämë Yɛn mɛnh kɛ̈ɛ̈i ëbɛ̈n. Mïth kɛ̈i ke Yithriɛl kedhie, ayï kɛ̈i ke ɣɔ̈kken ayek kakï.”

Dhuëëŋ de Kuïn Cïnic Luɔu

³ Go Mothe lɛ̈k kɔc an, “Dɔ̈tkï kööl ë jäl wek Rip, piny wään cieŋ ë week thïn. Yekï, yen kööl wään bïï ë Bɛ̈nydït we bei piny ë Rip në riɛl dïïtde. Duökï kuïn cï pam mäth cam.

⁴ Ku ee köölë, we bɔ̈ bei Rip në pɛɛi tueŋ, pɛɛi de Abib.

⁵ Bɛ̈nydït acï kuarkun thɔn ɣɔn, an bïï we gäm piny ë Kanaan, ku piny ë Ɣit, ku piny ë Amor, ku piny ë Ɣib, ku piny ë Jebuth. Miäk të cï en we lɛɛr piny ee wat ë ca ku miök ë kiëc, ke we loi ee dhuëëŋë, në pɛɛi tueŋ në run nyïïn ëbɛ̈n.

⁶ Yak kuïn cï pam nyuäŋ cam në ee nïnkë yiic kadhorou. Ku kööl ye nïn dhorou, ke we loi dhuëëŋ de Bɛ̈nydït.

⁷ Në nïnkë yiic kadhorou, wek cïï kuïn cï pam mäth bï cam, ku duökï kë ye kuïn cï pam tɔ mäth tɔ tɔ̈u paandun në ee nïnkë yiic. Ayï kuïn cï pam mäth ë cïï tɔ̈u.

⁸ Ku të cä wek dhuëëŋ gɔl, ke we ye mïthkun tɛ̈t kë yak looi ëbɛ̈n. Yak lɛ̈k keek nɔn ya wek en looi në biäk de ka wään cïï Bɛ̈nydït luöi week, ɣɔn jäl wek Rip.

⁹ Yen abï week jɔ aa täk nïïm. Ka bï ciët kë duööt ë wecin, ku cït kë cï tääu në wenyïïn tueŋ. Abï week aa täk nïïm ë cieŋ, në baŋ bä wek lööŋ ke Bɛ̈nydït aa luɛɛl aköölnyïïn, në luɔi cï Bɛ̈nydït we bɛ̈ɛ̈i bei Rip në riɛl dïïtde.

¹⁰ Ka week, dɔ̈tkï ee dhuëëŋë, ku yak looi në akööl cï nyuöth week.”

Kɛ̈ɛ̈i

¹¹ Go Mothe lueel an, “Bɛ̈nydït acï kuarkun thɔn ɣɔn, ku thɔn week aya nɔn bï Yen we lɛɛr piny ë Kanaan. Të le Yen e gäm week,

¹² ke we gëm Bɛ̈nydït mïth kɛ̈i kedhie. Mɛnh kɛ̈ɛ̈i ëbɛ̈n ee këde Bɛ̈nydït.

¹³ Ku kɛ̈i ke mul abäk keek aa waar në nyök amɛ̈l tëde Bɛ̈nydït. Na cäkï kɔɔr nɔn waar wek keek, ke dhuööŋkï keyiëth. Na mïth kɛ̈ikun abäk keek dhil aa wɛ̈ɛ̈r bei tëde Yen.

¹⁴ Na lɔ mïthkun we luɔp wadäŋ, an kë yak looiyë ee nɔm ŋö? Ke tɛ̈tkï keek an, ‘Bɛ̈nydït abïï wo bei Rip ɣɔn në riɛl dïïtde, piny ɣɔn cieŋ ë wo thïn.

¹⁵ Na ɣɔn aa tɔ melik enɔm ril, ku cïï wo tɔ jël Rip, ke Bɛ̈nydït ë näk kɛ̈ɛ̈i Rip kedhie, kɛ̈ɛ̈i ë raan, ku kɛ̈ɛ̈i ë läi. Yen aye wok kɛ̈i ke läi gäm Bɛ̈nydït, ku waarku kɛ̈ɛ̈ikuɔ kɔ̈ɔ̈th.

¹⁶ Kënë abï we jɔ aa täk nïïm, cït man ë kë cï duööt ë wecin, ku cït kë cï tääu në wenyïïn tueŋ. Abï we aa täk nïïm në bïï cïï Bɛ̈nydït wo bɛ̈ɛ̈i bei piny ë Rip në riɛl dïïtde.’ ”

Piööl ë Luät ku Biöl ë Mac

¹⁷ Na ɣɔn, apɛ̈l melik ë Rip kɔc jäl, Nhialic akën kɔc bɛ̈n tɛ̈ɛ̈k në kueer ë Pilithtia ku ee yen aye kueer thiɔ̈k. Acïï ë Nhialic bɛ̈n cät an, “Të le kɔc ë tïŋ nɔn bï kek lɔ gɔ̈m në kɔc, tɛk däŋ bïk kenïïm waar, ku pukkï kenïïm Rip. Ku acä kɔɔr aya.”

¹⁸ Go Nhialic ke tɛ̈ɛ̈k ë jɔ̈ɔ̈ric, cök kenïïm Wɛ̈ɛ̈r Thith kɔ̈u. Ku kɔc ke Yithriɛl acïk tɔɔŋken bɛ̈n kiëët ku jɔkï jäl Rip.

¹⁹ Acïï Jothep than piny ɣɔn lueel an, “Miäk të le Nhialic we luök, ke we jɔt guöpdï eenë lɛɛrkï në week ëtök.” Na ɣɔn aa jëlkï, ke Mothe ë jɔt guöp ë Jothep, cït man ɣɔn cïï Jothep ë thɔ̈n kɔc ke Yithriɛl.

²⁰ Go kɔc ke Yithriɛl jäl Thukoth, ku lek piɔ̈ɔ̈t Eetham, në jɔ̈ɔ̈r thok.

²¹ Aköl, Bɛ̈nydït aaye cath ë kenïïm tueŋ, në mën de piööl ë luätic nyuth ke kueer. Na wakɔ̈u, ke cath ë kenïïm tueŋ në mën de biöl ë macic riɛɛu keek. Gokï aa cath aköl ku wakɔ̈u.

²² Mën de piööl ë luät aaye cool në kenïïm tueŋ, na wakɔ̈u ke mën de biöl ë mac ë ruu në kenïïm.