Bɛ̈n 12 - JAM DE NHIALIC 2011

Winythok

¹ Go Bɛ̈nydït jam kekë Mothe ku Aron ë Rip lueel an,

² “Pɛɛiyë, yen abï ya pɛɛiduön tueŋ në ruöönic.

³ Guiëërkï akutnɔm de Yithriɛl ee kakë kedhie: në kööl ye pɛɛiyë thok thiëër, raan ëbɛ̈n në weyiic ë ye baaide lɔ̈c nyɔk, nyɔɔŋ bou, ku nɔn yen nyɔɔŋ amääl.

⁴ Na koor baaide, ku cïï nyɔk bï lëu ë cuët, ke rɔm nyɔk ke raan thiëëk kek.

⁵ Aduëërë lɔc ke ye nyɔɔŋ amääl, ku nɔn ee yen nyɔɔŋ bou. Ku abï dhil aa nyɔɔŋ ee ruöön tök, nyɔɔŋ cïn kë dak në yeguöp.

⁶ Na thëën, në kööl ye pɛɛi thok thiëër ku ŋuan, ke amatnɔm de akutnɔm de Yithriɛl ëbɛ̈n ë ke jɔ näk nyök.

⁷ Ku kɔc ë ke nöm riɛm, ku wïïthkï ë ɣööt thook, ɣööt cuet kek nyök thïnë, ɣöt thok baŋ cuëc ku baŋ cam, ku yethok nhial.

⁸ Ku ë ke nyop rïŋ në ee wɛ̈ɛ̈rë yic, ku cuetkï keek në wɛ̈ɛ̈l kec, ku kuïn cï pam nyuäŋ.

⁹ Duökï ke cuet athith ku duökï ke thal në pïïu, nyuɔpkï keek në atiap, ku cuɛtkï keek ëbɛ̈n ayï nɔm, ayï kär, ayï cïïn.

¹⁰ Ku ë cïn kë bɔthkï abï ruöu. Na de kë cï ruöu, ke ɣɔ̈kkï mac.

¹¹ Ku dapkï cuet ke we cï röt duöt në kake jäl, tääukï lupɔɔ në wekɔ̈ɔ̈th ku war në wecök, ku thieec në wecin. Në luɔi yen dhuëëŋ ë Winythok bä wek Ɛn door, Yɛn Bɛ̈nydït.

¹² “Ee Yɛn Bɛ̈nydït, paan ë Rip abä caathic ëbɛ̈n në ee wɛ̈ɛ̈rë yic, ke ya näk mɛwä kɛ̈ɛ̈i ëbɛ̈n, kɛ̈i ë raan, ku kɛ̈i ë läi. Ku kuööm yiëth ke Rip kedhie në kuöm tuc. Ee Yɛn Bɛ̈nydït.

¹³ Ku riɛm nu ë ɣööt thook, abï Yɛn nyuöth ɣööt rɛ̈ɛ̈r wek thïn. Të lan riɛm tïŋ ɣöt thok, wek bä aa winythook ke cïn kërɛɛc luöi week, të näk Yɛn kɛ̈i.

¹⁴ Ku köölë, abäk döt ke ye kööl ë dhuëëŋ ë Bɛ̈nydït. Dɔ̈tkï ku yak dhuëëŋ thïn ë run ëbɛ̈n.

Dhuëëŋ de Kuïn Cïnic Luɔu

¹⁵ Wek bï kuïïn cï pam cïnic luɔu aa cam në nïn kadhorou. Kööl tueŋ, ke we kɔn kë ye kuïïn cï pam tɔ mäth nyaai në bɛ̈ikuniic. Na lɔ raan kuïn cï pam mäth cam në ee nïnkë yiic kadhorou, ka bï tɛɛm wei në kɔc ke Yithriɛliic.

¹⁶ Wek bï lɔ̈ŋ de amatnɔm ɣeric looi në kööl tueŋ, ku be amatnɔm ɣeric lɔ̈ŋ në kööl ye akööl dhorou. Acïn luɔi bï ya looi në aköölkë yiic, ee këcam yen abï ya thaal.

¹⁷ Dɔ̈tkï Dhuëëŋ de Kuïn Cïnic Luɔu, në biäk yen kööl ë bɛ̈ɛ̈i Yɛn dhiëënkun bei paan ë Rip. Dɔ̈tkï ke we bï yɛn aa dhuëëŋ thïn në ruöön thok ëbɛ̈n.

¹⁸ Wek cïï kuïn cï mäth bï ya cam, gɔl në kööl ye pɛɛi tueŋ thok thiëër ku ŋuan thëën, agut cï kööl yen thok thiërrou ku tök thëën.

¹⁹ Ë cïn kë ye kuïn cï pam tɔ mäth bï nu në bɛ̈ikuniic në ee nïnkë yiic kadhorou, ke cïn raan bï kuïn mäth cam. Na lɔ raan kuïn cï pam cï mäth cam në ee nïnkë yiic, nɔn yen raan lei, ku nɔn ee yen raan ë Yithriɛl, abï tɛɛm wei në akutnɔm de Yithriɛl yiic.

²⁰ Duökï kuïn cï pam mäth ee cam në bɛ̈ikuniic kedhie, yak kuïn cï pam nyuäŋ cam.”

Dhuëëŋ Tueŋ de Winythok

²¹ Go Mothe röördït ke Yithriɛl cɔɔl kedhie, ku lëk keek an, “Lɔ̈ckï röt nyök amɛ̈l, ku nɔn ee kek nyök bɔɔth, ku näkkï keek bïï bɛ̈ikun ke Dhuëëŋ de Winythok looi.

²² Ku nɔ̈mkï wal, në wal ke ɣathopiic, ku juɔɔlkï ke në riɛm de nyök nu abïny yic, ku wiɛ̈ɛ̈thkï riɛm në ɣööt thook, ɣöt thok baŋ cuëc, ku baŋ cam ku ɣöt thok nhial. Ku ë cïn raan lɔ biic ɣönde aruu piny.

²³ Ku të le Bɛ̈nydït Rip caathic ke näk kɔc ke Rip, abï riɛm tïŋ ɣöt thok baŋë ku baŋë, ku baŋ nhial, ka cïï tuunynhial ë thuɔɔu bï bɛ tɔ lɔ ɣöndun le we nɔ̈k.

²⁴ Dɔ̈tkï ë lööŋkë në mïthkun ë caaŋdun.

²⁵ Të la wek lɔ piny cïï Bɛ̈nydït than an bïï gäm week, ke we ye ë kënë looi.

²⁶ Na lɔ mïthkun we luɔp an, ‘Kënë ee nɔm ŋö?’

²⁷ Ke lɛ̈kkï keek an, ‘Ee miɔ̈c ë Winythok ye wok Bɛ̈nydït door, në baŋ cï En ɣöötkuɔ winythook ɣɔn piny ë Rip, ku pɛ̈l wook, ku nɛ̈k kɔc ke Rip.’ ” Go kɔc ke Yithriɛl kemiöl tuk ku lɛ̈ŋkï.

²⁸ Agokï kë cï Bɛ̈nydït lɛ̈k Mothe kekë Aron lɔ looi.

Thon ë Kɛ̈ɛ̈i

²⁹ Na ɣɔn akɔ̈u ë wɛ̈ɛ̈ric cil, ke Bɛ̈nydït ë näk kɛ̈ɛ̈i ëbɛ̈n piny ë Rip. Gɔl në kɛ̈i ë melik nu ë thööny nɔm, agut cï kɛ̈i ë raan mac aloocic. Ayï kɛ̈i ke läi acï ke bɛ̈n nɔ̈k kedhie.

³⁰ Acïn ɣön töŋ ë kën ë raan thou thïn në ee wɛ̈ɛ̈rë yic. Go kiɛɛu dïït agök lɔ nok Rip. Go melik pääc ku pääc bänyke ku kɔc ke Rip.

³¹ Na wën, ke melik ë tɔ Mothe dïcë kekë Aron në ee wɛ̈ɛ̈r manë yic, ku lëk keek an, “Jälkï pinydï wedhie ayï kɔc ke Yithriɛl. Lak läŋkï Bɛ̈nydït cït man cä wek e lueel.

³² Kuathkï ɣɔ̈kkun ku thökkun, ku jälkï. Ku lak läŋkï në biäk bï ya thieei ayadäŋ.”

³³ Go kɔc ke Rip kɔc coc cök an dapkï Yithriɛl tɔ jël pinyden luelkï an, “Të kɛ̈n we ke dap tɔ jël, wo bï thou wodhie.”

³⁴ Go diëër ke Yithriɛl guölkɛn ke wuöör thiɔ̈ɔ̈ŋ në awɛɛc nyuäŋ, ku dutkï keek në lupɔɔ, ku kɛ̈pkï ke në kekët.

³⁵ Go kɔc ke Yithriɛl kë cïï Mothe lɛ̈k keek looi, gokï kɔc ke Rip lip në aduuk ke adhääp, ku ateek, ku lupɔɔ.

³⁶ Go Bɛ̈nydït kɔc ke Rip tɔ rïïu kɔc ke Yithriɛl, gokï ke gäm kakɛn cïk lip. Yen kueer ë jɔt ë kɔc ke Yithriɛl këriëëc de Rip ka ëbɛ̈n.

Kɔc ke Yithriɛl Ajëlkï Rip

³⁷ Na wën, ke kɔc ke Yithriɛl ë ke jël në kecök Ramethith lekï Thukoth. Ku röör aake ye bot kadhetem ka aguum të cïn diäär, ku mïth.

³⁸ Go kut dïït ë kɔc lɔ ke keek, ku lɔ thök ku ɣɔ̈k.

³⁹ Acï keek bɛ̈n dap guɔ kuɛ̈ɛ̈th bei Rip ke ke kën thät, ku kën awɛɛc guɔ mäth. Gokï kuïn nyuäŋ thaal në awɛɛc awën bïïkï keek Rip.

⁴⁰ Ku kaam ë thöl ë kɔc ke Yithriɛl ke ke rɛ̈ɛ̈r piny ë Rip aaye bot kaŋuan ku thiërdiäŋ ë ruöön.

⁴¹ Ku në kööl ë thöök ë bot kaŋuan ku thiërdiäk thook, yen aa jël ë kɔc ke Bɛ̈nydït ë Rip kedhie.

⁴² Yen ee wɛ̈ɛ̈rë, abï dɔ̈t Bɛ̈nydït, në bïï cï Yen ke bɛ̈ɛ̈i bei piny ë Rip. Yen ee wɛ̈ɛ̈rë ee wɛ̈ɛ̈r de Bɛ̈nydït, abï aa döt në kɔc ke Yithriɛl ë caaŋden.

Lööŋ ke Winythok

⁴³ Go Bɛ̈nydït lɛ̈k Mothe kekë Aron an, “Lööŋ ke Winythok kï: Raan lei ë cie cam në këcam de Winythok.

⁴⁴ Ku lïïm cath në week aduëërkï cam të cä wek ke kɔn cueel.

⁴⁵ Ku duökï ee tɔ ciɛm ë kamaan, ayï raan luui në ariöp.

⁴⁶ Ku këcam abï aa cam ëbɛ̈n baai ë thɛɛl ë yen thïn, acïï bï aa lɛɛr biic. Ku duökï yom ke läi ee dhuööŋ kɔ̈ɔ̈th.

⁴⁷ Akutnɔm de Yithriɛl kedhie, ë ke ye dhuëëŋë döt.

⁴⁸ Ku raan kënë cueel ë cïï këcamë ee cam. Na de raan lei cï bɛ̈n piɔ̈ɔ̈t wundun, ku kɔɔr nɔn bï yen dhuëëŋ në dhuëëŋ ë Winythok, door en Bɛ̈nydït, ke we kɔn röör ke baaide cueel kedhie. Ku ëtɛ̈ɛ̈n, abï jɔ aa raan de Yithriɛl, ku aduëër jɔ mɛt ë dhuëëŋic.

⁴⁹ Lööŋkë aluöi ke kɔc ke Yithriɛl, ku kɔc lei, kɔc cï piɔ̈ɔ̈t në weyiic.

⁵⁰ Ago kɔc ke Yithriɛl gam kedhie, ku loikï kë cïï Bɛ̈nydït lɛ̈k Mothe kekë Aron.”

⁵¹ Bɛ̈nydït ë dhiëën ke Yithriɛl bɛ̈n bɛ̈ɛ̈i bei paan ë Rip kedhie.