Bɛ̈n 1 - JAM DE NHIALIC 2011

Yithriɛl Ayɔŋ ë Rip

¹ Kakë ee rin ke mïth ke Jakop, mïth ɣɔn lɔ Rip në yen ëtök. Ku ŋɛk ë keyiic aa cath ke baaide:

² Ruben kekë Thimion, ku Lebi, ku Juda,

³ ku Yithakar, ku Dhebulun, ku Benjamin,

⁴ ku Dan, ku Naptali, ku Gad, ku Acer.

⁵ Ku kuën ë baai de Jakop ëbɛ̈n, aaye thiërdhorou. Ku Jothep mänhëden aa yök acï kɔn lɔ Rip ɣɔn në kenïïm tueŋ.

⁶ Na ɣɔn aa cïk tɔ̈u ë Rip, ke Jothep ë thou, ku thou wɛ̈ɛ̈takɛcken kedhie, ku thou rɛmden ëbɛ̈n.

⁷ Ku löök mïthken kɛɛr arëët në kecök. Gokï juëc arëët ke ke ril. Gokï Rip thiɔ̈ɔ̈ŋic.

⁸ Na ɣɔn, ke melik däŋ ë löök bɛ̈n ë bääny yic Rip, melik kuc Jothep.

⁹ Go lɛ̈k kɔcke, an, “Tiëŋkï, kɔc ke Yithriɛl acïk juëc arëët, acïk wook wöör nyïïn.

¹⁰ Ka week, bäk luiku keek kiɛɛr cïï ke bï bɛ tɔ kɛɛr. Na cuku ke lui kiɛɛr, abïk juëc arëët. Na wadäŋ aa de tɔŋ bɔ̈, abïk mat në kɔc ke ater, ku gɔ̈mkï në wook, ku pälkï wut ku jëlkï.”

¹¹ Go kɔc ke Rip keek kuɛ̈ny bäny ke lïïm bïk keek miɛn në luɔi tuc thok bïk aa looi. Gokï kɔc ke Yithriɛl tɔ yïk melik pɛ̈ɛ̈nydït kaarou, pɛ̈ɛ̈nydït cɔl Pithom kekë Ramethith, ke bï melik kacaamke aa tɔ̈ɔ̈u thïn.

¹² Ku ëtɛ̈ɛ̈n, të cïï kɔc ke Yithriɛl miɛn, ayek jɔ kɛɛr arëët, ku jɔkï lɔ ke ke thiëi wut ëbɛ̈n. Go kɔc ke Rip riɔ̈ɔ̈c në keek.

¹³ Ku yek keek tɔ loi luɔɔi tuc thok.

¹⁴ Ku tɔkï pïïrden rac në luɔɔi tuc thok. Ku yek keek tɔ yïk ɣööt, ku tɔkï ke lui në duumiic. Aake yek tɔ loi luɔɔi tuc thok ke ke cïï piɔ̈ɔ̈th kok në keek.

¹⁵ Na ɣɔn, ke melik ë jiëëm amadhiëëth ke diëër ke Ɣeberuu, yï Cipera kekë Puwa.

¹⁶ Lëk keek an, “Të dhiëëth wek në diëër ke Ɣeberuu, ke we ye meth tïŋ. Na ee mɛwä yen ë dhiëëth, ke näkkï. Na ye duet ke pälkï apïïr.”

¹⁷ Ku amadhiëëth acïk bɛ̈n riɔ̈ɔ̈c në Nhialic, gokï jam de melik kɛ̈n bɛ̈n gam. Acïk mïthwät bɛ̈n aa puɔ̈l apïïr.

¹⁸ Na ɣɔn, ë kööl tök, ke melik ë cɔl amadhiëëth, ku lop keek an, “Eeŋö ee kë luɔikï yë? Eeŋö päl wek mïthwät ke Ɣeberuu apïïr?”

¹⁹ Gokï puk nɔm an, “Diäär ke Ɣeberuu acïkï cït diëër ke Rip.” Ayek dap dhiëth ëthiäu, ka yek mïthken guɔ dhiëëth ke cïn raan tök në woyiic cï kɔn ɣet të nu kek thïn.

²⁰ Go Nhialic amadhiëëth ŋiëc luööi apiɛth. Go kɔc ke Yithriɛl jɔ kɛɛr, ku jɔkï juëc arëët.

²¹ Ku Nhialic amadhiëëth bɛ̈n gäm bɛ̈i ke nïïmken, në luɔi ë cï kek Nhialic riëëu guöp.

²² Na ɣɔn, ke lëk ë Melik de Rip kɔcke kedhie an, “Cuatkï mïthwät Kiir kedhie abïï ciën tök, mïthwät thiik ke Ɣeberuu, ku pälkï duet apïïr.”