Bäny 9 - JAM DE NHIALIC 2011

Abimelek

¹ Na wën, ke Abimelek wën ë Gidiɔn lɔ wun ë Cekem ku lëk kɔc dhiën nëërden rɛ̈ɛ̈r ëtɛ̈ɛ̈n kedhie an

² thiëckï wun ë Cekem an, “Ee kënou ŋuän? Ee luɔi bïï wɛ̈ɛ̈t ke Gidiɔn kathiërdhorou we mac ku ee luɔi bïï raan tök we mac? Takkï wënïïm Abimelek ee guöpdun ku ee riɛmdun.”

³ Na wën cï kɔcken ë man Abimelek jam në kɔc ke Cekem në biäkde, go kɔc ke Cekem gam bïk Abimelek kuany cök në baŋ rɛɛn kek.

⁴ Ku gɛmkï atek kathiërdhorou në wëu ke luaŋ de Baal Berith yic, ago Abimelek ke nööm riɔp en ke kɔc cï gam bïk en kuany cök.

⁵ Go lɔ wun ë yï wun në Opera, ku nɛ̈k mïthëkɔcken kathiërdhorou ëtɛ̈ɛ̈n ë kuur tök nɔm, na wën ke Jotham wën ë Gidiɔn thiinë thiaan go kën nɔ̈k.

⁶ Na wën ke kɔc ke Cekem ku Bethmilo, ke ke mat kenïïm, në tim de ɣok thar ë wai ë Cekem lɔ̈ɔ̈m, bïk Abimelek tɔ ye bɛ̈nyden.

⁷ Na wën aa piŋ Jotham ee kënë, go kɛɛc nhial ë kuur ë Geridhim nɔm, ku yöök keek an, “Piɛŋkï kë luɛɛl, wek kɔc ke Cekem, ago Nhialic kë luɛlkï piŋ!

⁸ Ɣɔn ë kööl tök tiim acïk lɔ biic lek röt kuëny bɛ̈ny, gokï tim de olip yɔ̈ɔ̈k an, ‘Yïn bï aa bɛ̈nyda.’

⁹ Go tim de olip bɛ̈ɛ̈r an, ‘Në baŋ bän we mac, yɛn bï dhil kɔ̈ɔ̈c ku cä be ŋuɔl në mïth ye miök looi, miök ye yiëth luöi dhuëëŋ ku kɔc, ku ja bɛ̈n aa bɛ̈ny de tiim.’

¹⁰ Na wën ke tiim ë ke yɔ̈ɔ̈k ŋaap an, ‘Bäär, yïn bï aa bɛ̈nyda.’

¹¹ Go tim ë ŋaap bɛ̈ɛ̈r an, ‘Në baŋ bän we mac, yɛn bï dhil kɔ̈ɔ̈c ku cä be ŋuɔl në mïthkiën piɛth mit, ku ja bɛ̈n aa bɛ̈ny de tiim.’

¹² Na wën ke tiim ë ke yöök enap an, ‘Bäär yïn bï aa bɛ̈nyda.’

¹³ Go tim de enap bɛ̈ɛ̈r an, ‘Në baŋ bän we mac, yɛn bï kɔ̈ɔ̈c ku cä be ŋuɔl në mïthkiën ye ke mɔ̈u looi, mɔ̈n ee yiëth miët piɔ̈u ku kɔc, ku ja bɛ̈n aa bɛ̈ny de tiim.’

¹⁴ Na wën ke tiim kedhie ë ke yöök but an, ‘Bäär yïn bï aa bɛ̈nyda.’

¹⁵ Go but bɛ̈ɛ̈r an, ‘Na kaarkï ë yic në baŋ bän aa bɛ̈ny në wënïïm, bäkkï rɛ̈ɛ̈rkï në atïmdï yic. Ku na cäkkï bɔ̈, ke mac abï bɛ̈n bei ë ya yic, ku ciɛm tiim ke thidar ke Lebanɔn.’

¹⁶ Ago Jotham aŋoot ke jam an, “Yak tak ë we loi yic wään kuany wek Abimelek ke ye bɛ̈ny? Ë we cï baai de Gidiɔn riëëu guöp ku luöikï kë rɔ̈ŋ ke yen?

¹⁷ Takkï we nïïm nɔn cï wäär thɔ̈ɔ̈r në biäkdun, ku leer tɔŋ ke cïï diɛɛr ë wëike në luɔi bï yen we luök në kɔc ke Midian cin.

¹⁸ Ku köölë, we cï tɔŋ wɛ̈l nɔm baai de wäär, näkkï wɛ̈ɛ̈tke kathiërdhorou në kuur tök nɔm, ku takkï Abimelek, wën ë nyan lïm de bɛ̈ny nu ë kɔc ke baai de Cekem nïïm, ee bɛ̈ny, në baŋ ee yen mɛnhë nyandun.

¹⁹ Ku ënɔɔnë, na ye këpiɛth ku ee kë rɔ̈ŋ yen cäk luöi Gidiɔn kekë baaide, ke we jɔ piɔ̈ɔ̈th miɛt në Abimelek, ku Abimelek abï piɔ̈u miɛt ke week.

²⁰ Ku na kɛ̈nkï yic looi, ke mac abï bɛ̈n bei tëde Abimelek ku ciɛm week, wek kɔc ke Cekem ku Bethmilo, ku bïï bei tëde week ciɛm Abimelek.”

²¹ Go Jotham kat ke lɔ Beer, ku lee rëër ëtɛ̈ɛ̈n në baŋ riɔ̈ɔ̈c en në mɛnhkënë Abimelek.

²² Ɣɔn cïï Abimelek kɔc ke Yithriɛl kuum në run kadiäk.

²³ Go Nhialic jɔŋ rac tuɔɔc ë kaam de Abimelek kekë kɔc ke Cekem, agokï Abimelek rɛɛc.

²⁴ Kënë aa loi rɔt ke Abimelek kekë kɔc ke Cekem bï ariöp de kërɛɛcden yök, kɔc ɣɔn rit yepiɔ̈u agokï wɛ̈ɛ̈t ke Gidiɔn kathiërdhorou nɔ̈k.

²⁵ Në wën kɔc ke Cekem ë ke tɛ̈ɛ̈u kɔc në kur nïïm bïk Abimelek buuth, ku yek kɔc ee tëëk ëtɛ̈ɛ̈n rum. Go jamë lɛ̈k Abimelek.

²⁶ Go Gaal wën de Ebed bɛ̈n Cekem kekë mïthëkɔcken, go kɔc ke Cekem yen gäm aŋäth.

²⁷ Kɔc acïk lɔ ë duumken yiic kedhie lek mïth ke enap tet ku loikï mɔ̈u. Gokï dhuëëŋ jɔ looi në luaŋdɛn ë yathic të wën ciëm kek ku dëkkï aake ye Abimelek läät në acieer piny.

²⁸ Na wën ke lueel Gaal wën de Ebed ë röldït an, “Abimelek eeŋa? Ku yok yïï ŋa wok kɔc ke Cekem? Eeŋö duëër wok aa lïïm ke? Cie wën ë Gidiɔn kekë Dhebul raan lɔ ë yecök? Ka eeŋö duëër wok Abimelek luööi? Luöikï Ɣamor wun Cekem raan ɣɔn gɔl dhiëndun!

²⁹ Na tɔ̈u kɔckë në yacin ke yɛn duëër Abimelek nyaai nyin, aduɛ̈ɛ̈r lɛ̈k en an cöölë kɔckuön ke tɔŋ bei buk thɔ̈ɔ̈r!”

³⁰ Na wën aa lɔ Dhebul bɛ̈ny de pänydït kë cïï Gaal wën ë Ebed lueel piŋ, go piɔ̈u diu aläl.

³¹ Ku tooc kɔc lek Abimelek lɛ̈k në Aruma an, ‘Gaal wën ë Ebed kekë mïthëkɔcken acïk bɛ̈n Cekem, ku acïk kɔc ke wut lom thook bïk gɔ̈th në yïn.

³² Ëlë wakɔ̈u yïn duëër bɛ̈n wek ë kɔcku ku täckï ë duumiic.

³³ Na miäk ë run ë piny të ye akɔ̈l thok bɛ̈n, jɔ wut mɔɔk piny. Na lɔ Gaal bɛ̈n kekë kɔcke an mɛkkï week luöi ë keek këduön kɔɔr!”

³⁴ Go Abimelek kekë kɔckɛn ke tɔŋ kedhie lɔ wakɔ̈u ku tookkï Cekem ke ke cï röt thiaan në akuut ee yiic ŋuan.

³⁵ Na wën aa tïŋ Abimelek Gaal ke cï bɛ̈n bei kekë kɔc, ku akɛ̈ɛ̈ckï në kal ë wut thok biic, gokï röt gap nhial të wën cïï kek thiaan thïn.

³⁶ Na wën aa tïŋ Gaal keek go lɛ̈k Dhebul an, “Tïŋ kɔc abïkï piny në kur nïïm nhial!” Go Dhebul bɛ̈ɛ̈r an, “Kakë acïkï ee kac, ayek atïïp nu ë kur nïïm!”

³⁷ Ago Gaal bɛ lueel an, “Tïŋ! Kɔc abïkï piny në kuur nɔm, ku akut tök abɔ̈ të lɔ wut baŋ de tim de ɣok ë tït!”

³⁸ Go Dhebul jɔ yɔ̈ɔ̈k an, “Tɔ̈u jamduön dïïtë ë nou ënɔɔnë? Ee yïn ee ye lueel an, eeŋö ya wek Abimelek luööi? Kakë ayek kɔc wään ye cieer. Lɔɔr tueŋ thäärë we keek.”

³⁹ Na wën, ke Gaal ë wat kɔc ke Cekem lek thɔ̈ɔ̈r në Abimelek.

⁴⁰ Ago Abimelek Gaal tiaam, go kat. Kɔc juëc acïk bɛ̈n wïïk ke ke de gup bɔ̈ɔ̈t ë kuɛɛr yiic alɔ gut ë kal ë wut thok biic.

⁴¹ Go Abimelek lɔ rëër në Aruma, ago Dhebul Gaal kekë mïthëkɔcken cuɔp wei në Cekem.

⁴² Na ɣɔn ë kööl däŋë go Abimelek piŋ nɔn bïï kɔc ke Cekem lɔ ë duumiic.

⁴³ Ago kɔcke tɛ̈ɛ̈k yiic në diäk ku le ke buuth ë duumiic. Na wën aa lɔ Abimelek kɔc tïŋ ke ke bɔ̈ bei wutic, go rɔt gap nhial tëdɛn cï kek thiaan kekë kɔcke ku mɛkkï keek.

⁴⁴ Të wën jɔ Abimelek kekë kɔcke röt baan lek wut gël thok. Go akuut kaarou röt baan të tɔ̈u ë kɔc ë duumiic ku nɛ̈kkï keek ëbɛ̈n.

⁴⁵ Go tɔŋ rɔt cuuth në ee köölë yic ëbɛ̈n. Ago Abimelek wut peec, ku nɛ̈k kɔcke, ku jɔ wut riɔ̈ɔ̈k ku weer amilɔ në yeyic.

⁴⁶ Na wën aa piŋ ë kɔc rɛ̈ɛ̈r ë aloocdïït bɛ̈ɛ̈r de Cekem ee kënë. Gokï lɔ thiaan në kɛ̈l ke luaŋ ë Baal Berith yiic.

⁴⁷ Go raan tök Abimelek lɔ lɛ̈k nɔn cïï kɔc ke aloocdïït bɛ̈ɛ̈r de Cekem kenïïm lɔ kut ëtɛ̈ɛ̈n.

⁴⁸ Ago Abimelek lɔ kekë kɔcke lee në kuur ë Dhalmon nɔm, ku nööm yiëp ku yep kër ke tiim, ku tɛ̈ɛ̈u ke në yeyeth. Ku yöök kɔc cath në yen bïk këdɛn cï looi looi aya.

⁴⁹ Go kɔc kedhie kër ke tiim yep ku kuɛnykï Abimelek cök, ku lek keek kut nïïm ë kal de luaŋdït kɔ̈u ku ɣökkï mac, ke ke ë ke nu thïn. Go kɔc tɔ̈u në aloocdïït bɛ̈ɛ̈r de Cekem thou kedhie, aake cït agum de kɔc röör ku diäär.

⁵⁰ Go Abimelek bɛ lɔ wun cɔl Thebedh, ku took piny ku peec.

⁵¹ Wut aa de yic aloocdïït bäär ril, yen aacï diäär ku röör ku kɔc ke wut kedhie lɔ thïn. Acïk röt guöör thïn ku jɔkï lɔ nhial ë yenɔm.

⁵² Go Abimelek lɔ në kecök ke lɔ aloocdïït bäär mak, na wën aacï rɔt jɔ kiɛm piny ɣöt thok, ku an bïï aloocdïït bäär jɔ ɣök mac.

⁵³ Go tik kuur ë guär guɔ laar në Abimelek nɔm go ɣäär nɔm piny.

⁵⁴ Go dhuŋ ee kakɛn ë tɔŋ muk cɔɔl an, “Bɛ̈ɛ̈iyë abätäudu bei ku näk ɛn, ke cïï bï aa lueel, an, ee tik yen ë näk ɛn.” Go dhuŋ ee könde muk ye rɛɛtic piny ku jɔ thou.

⁵⁵ Na wën aa lɔ kɔc ke Yithriɛl Abimelek tïŋ ke cï thou go ŋɛk aa lɔ baaide.

⁵⁶ Nhialic acï Abimelek tɔ yök ariöp de awäny cï luöi wun në kë wään nɛ̈k en mïthëkɔcken kathiërdhorou.

⁵⁷ Nhialic acï kɔc ke Cekem tɔ yök ariöp de kërɛɛcden ayadäŋ. Go aciɛɛn ë Jotham wën ë Gidiɔn aa yic.