Bäny 8 - JAM DE NHIALIC 2011

Tiëm cï Kɔc ke Midian Tiaam

¹ Na wën ke kɔc ke Eparaim lop Gidiɔn an, “Eeŋö looi yïn wook aya? Eeŋö kën yïn wook cɔɔl wään jöt yïn tɔŋ kɔc ke Midian?” Gokï gɔ̈k aläldïïtë.

² Go lɛ̈k keek an, “Kë cä looi acïn naamde na thööŋë kekë këduön cäk looi. Ku këthiin cäk looi wek kɔc ke Eparaim adït arëët awär kë cï dhiënda looi ëbɛ̈n.

³ Tiëŋkï, Nhialic ë week tɔ näk Orep kekë Dheep bäny ke Midian, eeŋö cä lëu në luɔi na thööŋë ke kë cäk looi?” Na wën cï ee kënë lueel, acïk agönhden bɛ̈n puɔ̈l.

⁴ Go Gidiɔn kekë bot kadiäk ke kɔcke bɛ̈n ku temkï Jordan kɔ̈u. Aake cï dak, ku ŋootkï ke ke cop kɔc ke ater.

⁵ Na wën aa cïk ɣet Thukoth go lɛ̈k röör ceŋ wut an, “Miackï remdiën de tɔŋ në këcam, acïk dak aläl, ku yɛn ŋoot ke ya cop Dhepa kekë Dhalmuna, bäny ke kɔc ke Midian.”

⁶ Go bäny ke Thukoth bɛ̈ɛ̈r an, “Eeŋö duëër wok këcam gäm remduön ë tɔŋ, ku yïn ŋoot ke yï kën Dheba kekë Dhalmuna dɔm?”

⁷ Go Gidiɔn puk nɔm an, “Apiɛth, të le Bɛ̈nydït Dheba kekë Dhalmuna gäm yɛn, yɛn bï lɔ bɛ̈n ku duöi we në kuɔɔth ku thil de jɔ̈ɔ̈ric!”

⁸ Na wën, ke Gidiɔn ë lɔ Penwɛl, ku thiëëc keek bïk ke miɔɔc në këcam gëm remde, gokï puk nɔm kedhie cït man ë kɔc ke Thukoth.

⁹ Na wën ke lɛ̈k kɔc ke Penwɛl an “Të la yɛn yanɔm lɔ puk në tiëm, yɛn bï aloocdïït bɛ̈ɛ̈rë thuöör piny!”

¹⁰ Ku Dheba kekë Dhalmuna aake tɔ̈u në Karkor në remdɛn ë tɔŋ cït aguum kathiëër ku dhïc 15,000, ee kek ë cï döŋ në rem de tɔŋ ë kɔc ke aköl amiäk, ku bɔt ku thiërrou de agum 120,000 acï ke nɔ̈k.

¹¹ Go Gidiɔn tëëk ke kuany kueer ee jɔ̈ɔ̈r kuany yɔu në biäk të lɔ aköl amiäk de Noba kekë Jogeba, ku mɛkkï rem de tɔŋ ke ɣääth.

¹² Go Dhalmuna kekë Dheba, bäny kaarou ke Midian kat, go keek cop ku dɔm keek, ago remdɛn ë tɔŋ ëbɛ̈n riɔ̈ɔ̈c.

¹³ Na wën ke Gidiɔn wën ë Jowac jɔ rɔt dɔk të wään cï yen lɔ tɔŋ, tëëk në Ɣereth,

¹⁴ Go raan wun ë Thukoth dɔm, ku thiëëc thok, go dhuŋë rin kathiërdhorou ku dhorou ke röördït ku bäny ke Thukoth gäär en.

¹⁵ Go Gidiɔn rɔt jɔ pɔ̈k Thukoth ku lëk bäny an, “Kënë ee yï Dheba kekë Dhalmuna. Wään bä wek a dɔl guöp ë baŋden luɛlkï an, eeŋö duëër wok këcam gäm remduön ë tɔŋ cï dak, ke we kën yï Dheba kekë Dhalmuna dɔm? Kankï ke dɔm ke wo bï remduön ë tɔŋ cï dak cääm!”

¹⁶ Na wën ke Gidiɔn ë nöm röördït ke Thukoth ku nyuth keek këtuc thok, ago keek dui në kuɔɔth ku thil ë jɔ̈ɔ̈ric.

¹⁷ Ago lɔ ku lee aloocdïït bɛ̈ɛ̈r de Penwɛl thuöör piny ku nɛ̈k kɔc nu wut ëtɛ̈ɛ̈n ëbɛ̈n.

¹⁸ Na wën ke Gidiɔn ë lop Dheba kekë Dhalmuna, an, “Ee röör tɔ̈u adï kek ë näkkï keek në Tabor?” Gokï bɛ̈ɛ̈r an, “Ee röör cït guöp yïn, kedhie acïtkï mïth ke bäny.”

¹⁹ Go Gidiɔn bɛ̈ɛ̈r an: “Kɔckë ayek mïthëkɔckï, mïth ke maar guöp. Yɛn cï kuëëŋ në rin ke Bɛ̈nydït, na ë ke kɛ̈nkï keek nɔ̈k ke wek cä duëër nɔ̈k.”

²⁰ Go lɛ̈k Jether, wëndɛn kɛ̈i an, “Näk keek!” Ku Jether akën abätäude bɛ̈n bɛ̈ɛ̈i bei, në baŋ ee yen meth tei, go riɔ̈ɔ̈c.

²¹ Go Dheba kekë Dhalmuna yɔ̈ɔ̈k an, “Bäär, näk wook ë yïn. Du meth yöök bï luɔi de röör looi.” Go Gidiɔn ke nɔ̈k ku nööm joth ke atek ku lupɔɔ amujuŋ ë tɔ̈u ë thɔ̈rɔ̈ɔ̈lken yiëth,

²² Na wën ke kɔc ke Yithriɛl, ë ke yöök Gidiɔn an, “Yïn bï aa bɛ̈nyda, wekë mïthku ku kuatdu, në luɔi cï yïn wook luäk bei në kɔc ke Midian cin.”

²³ Go Gidiɔn lɛ̈k keek an, “Yɛn cïï bï aa bɛ̈nydun ku mïthkï acïk bï aa bänykun, ee Bɛ̈nydït Yen abï aa bɛ̈nydun.”

²⁴ Ku lueel an, “Yɛn de nɔm töŋ liɛp, raan ëbɛ̈n ë weyiic aduëër ɛn gäm joth në kakɛn wään cï peec yiic.” (Kɔc ke Midian acïtkï juöör kɔ̈k rɛ̈ɛ̈r ë jɔ̈ɔ̈ric ëbɛ̈n, aa ke ye ceŋ në joth ke adhääp.)

²⁵ Gokï bɛ̈ɛ̈r an, “Wo mit piɔ̈ɔ̈th buk keek gäm yïn.” Na wën ke ke thieth lupɔ, go ŋɛk joth aa tääu thïn në ka cïk peec.

²⁶ Go thëm de adhɛ̈p ke yïth cï nööm ɣet në kilɔɔ kathiërrou, akënkï ka ye cieŋ ë kɔc cin ku kɔc yiëth kuɛɛn thïn ku lupɔɔ ye meliik ke Midian cieŋ, ayï kuɛɛt ë tɔ̈u në thɔ̈rɔ̈ɔ̈lken yiëth.

²⁷ Go Gidiɔn yath cuëëc në adhääp, ku tɛ̈ɛ̈u piny ë Opera wunden. Kɔc ke Yithriɛl kedhie acïk bɛ̈n wäc në luɔi ye kek en lam ëtɛ̈ɛ̈n. Ku kënë aaye wïn ë dɛ̈p tëde Gidiɔn kekë baaide.

²⁸ Go kɔc ke Yithriɛl kɔc ke Midian jɔ tiaam, ka acï ciën riɔ̈ɔ̈c cï bɛ nu. Piny aa rɛ̈ɛ̈r ë mätic në run kathiërŋuan ku jɔ Gidiɔn bɛ̈n thou.

Thon ë Gidiɔn

²⁹ Na wën, ke Gidiɔn wën ë Jowac jɔ rɔt pɔ̈k baaide le rëër ëtɛ̈ɛ̈n.

³⁰ Aa de mïthwät kathiërdhorou, në luɔi de yen nɔm diäär juëc.

³¹ Ku ade nɔm tiiŋ mɔ̈th në Cekem, aacï ye dhiëth mɛwä, ku ciëk an, Abimelek.

³² Go Gidiɔn wën ë Jowac thou ke cï dhiɔp aläl, ago tɔ̈ɔ̈u të tɔ̈u ë raŋ de Jowac wun në Opera, wun de dhiën ë Abiedher.

³³ Në thon ë Gidiɔn cök, kɔc ke Yithriɛl akënkï bɛ aa döt tëde Nhialic, gokï Baal lam. Ku tɔkï Baal Berith ee yanhden.

³⁴ Ku akënkï Bɛ̈nydït bɛ tak Nhialicden, Raan wään luäk keek në kɔc ke ater wään cï tuɔɔk ëbɛ̈n.

³⁵ Ku akënkï baai de Gidiɔn nyuöth riëëu ayadäŋ, në këriëëc piɛth cï luöi Yithriɛl ëbɛ̈n.