Bäny 7 - JAM DE NHIALIC 2011

Gidiɔn Atiam Kɔc ke Midian

¹ Na ɣɔn ë kööl tök, ke Jerub Baal (yen ee Gidiɔn) ku kɔc kedhie kɔc rɛ̈ɛ̈r në yen, ke ke jɔt röt ɣɔn amiäk, ku lek pɛɛnyken piäät në nyin de Ɣarod lɔ̈ɔ̈m, ku paany de Midian atɔ̈u në wak biäk të lɔ rut në kuur de Mameer lɔ̈ɔ̈m.

² Go Bɛ̈nydït Gidiɔn yɔ̈ɔ̈k an, “Kɔc rɛ̈ɛ̈r në yïn ajuëckï tëde yɛn, në luɔi bän ke tɔ tiam kɔc ke Midian abïk aa tak nɔn ë tiëm kek në riɛlden ku cïkkï ya be dhuëëŋ guöp.

³ Yen le yïn, ku lɛ̈k ë kɔc an, “Raan ëbɛ̈n, raan cï riɔ̈ɔ̈c arëët ku lɛthë tɔ dhuny e nɔm ciëën piny në kuur ë Giliyad, ku wok bï rëër ee tënë. Ago kɔc aguum kathiërrou ku rou 22,000 kenïïm puk. Ku dɔ̈ŋ aguum kathiëër 10,000.

⁴ Go Gidiɔn yɔ̈ɔ̈k, an, “Kɔc aŋootkï ke ke juëc, bɛ̈ɛ̈iyë ke tëde pïïu, ku abä ke lɔ pɔ̈ɔ̈c yiic ëtɛ̈ɛ̈n, ku raan bä lɛ̈k yïn, an, Raanë abï lɔ kekë yïn, ke yen guöp abï lɔ ke yïn, ku raan bä lɛ̈k yïn, an, Raanë acïï bï lɔ ke yïn, ke yen guöp acïï bï lɔ ke yïn.

⁵ Go Gidiɔn kɔc bɛ̈ɛ̈i tënu pïïu, na wën ke Bɛ̈nydït yöök Gidiɔn, an, “Raan ëbɛ̈n raan lap pïïu ë yeliep cït man ë jö, abä ke tääu pei kapäc, ku yen ee täu de raan ëbɛ̈n raan bï yemiɔl tuk ku dëk.

⁶ Go kuën ë kɔc wën ë pïïu nem në ke cin aa bot kadiäk (300). Ku dɔ̈ŋ kɔc kɔ̈kë ëbɛ̈n kɔc dëk ke ke cï kemiɔl tuk.

⁷ Ago Bɛ̈nydït Gidiɔn yɔ̈ɔ̈k an, “Yïn bä luök në kɔc bot kadiäk 300, cï pïïu nem në kecin ku dekkï ke, yɛn bï kɔc ke Midian tääu në yïcin bä ke tiaam. Ku kɔc kɔ̈kë kedhie ë ke puk röt wut, ŋɛk ë lɔ tëde ku lɔ ŋɛk tëde.”

⁸ Ku tɔ kɔc ke Yithriɛl wën dëk ke ke tuk kemiɔl jël kedhie, ye ŋɛk yenɔm pɔ̈k paanyde, ku nööm bot kadiäk 300 de kɔc, ku nööm kacaam ku tuŋ ke kɔc cï jäl, ku rem de tɔŋ ë Midian nu ë wakic.

⁹ Na ɣɔn ë wɛ̈ɛ̈ric wakɔ̈u, ke Bɛ̈nydït yöök Gidiɔn, an, “Jɔt rɔt lɔ mak ë ke, acä ke tääu ë yïcin bä ke tiaam.

¹⁰ Ku të riɔ̈ɔ̈c yïn bä ke mak ke yï lɔ ë pɛɛnyken lɔ̈m wekë Pura lïmdu,

¹¹ ku yïn bï kë luelkï piŋ, ku ëtɛ̈ɛ̈n yïn bï piɔ̈u jɔ bɛ riɛl në biäk bï yïn ke lɔ mak.” Go Gidiɔn lɔ kekë Pura lïmde, lekkï ë pɛɛny ë kɔc ke aterden thar.

¹² Na wën, go kɔc ke Midian, ku kɔc ke Amalek, ku kɔc rɛ̈ɛ̈r ë biäk të lɔ aköl amiäk bɛ̈n piɔ̈ɔ̈t në wakic cït lönydïït ë kɔyɔm ku keek adekï thɔ̈rɔ̈ɔ̈l juëc cïï lëu në kuɛ̈n, thɔ̈rɔ̈ɔ̈l cït liɛɛt ë wɛ̈ɛ̈r yɔu.

¹³ Na wën aa lɔ Gidiɔn ɣëët ke piŋ raan lëk mɛ̈thë kë cïï yen nyuöth lueel an, “Yɛn aa nyuöth në kuïn cï pam de barli cï bɛ̈n ke lɔɔr ke lɔ wun ë pɛɛny ke Midian, ku deeny rɔt në paany kɔ̈u, go paanyda yenɔm guöt piny ku wïïk.”

¹⁴ Go mɛ̈thë puk nɔm an, “Kënë ee abätäu de Gidiɔn wën de Jowac, raan de Yithriɛl, acïn däŋ duëër ë nyuöthë lueel, acïï Nhialic gäm tiëm, bïï yen Midian tiaam kekë remdan ë tɔŋ ëbɛ̈n!”

¹⁵ Na wën, acï Gidiɔn nyuöth de raan piŋ ku kë lueel nyuöth, go yemiɔl tuk ku lɛm Nhialic, ku puk rɔt kɔc ke Yithriɛl tɔ̈u wutic ku lëk keek an, “Jatkï röt Nhialic acï rem de Midian tääu në wecin bäk ke tiaam!”

¹⁶ Ku tek kɔc bot kadiäk (300) në akuut kadiäk (3), ku ye ŋɛk yiëk cin tuŋ. Ku töny lääuwiic, ku many de kuthyuui ë tönyic.

¹⁷ Ku yöök keek an, “Wɔikï yɛn, ku tiëŋkï na cä ɣëët në wut lɔ̈ɔ̈m, ke we loi, kë cäk tïŋ ke luɔɔi ayadäŋ.

¹⁸ Na kuɔɔth kaaŋ, wokë kɔc rɛ̈ɛ̈r në yɛn kedhie, ke we koth tuŋkun ayadäŋ në paany këc biäkkë ku biäkkë wedhie, ku mɔckï kiɛɛu an, ‘Ee këde Bɛ̈nydït ku ee këde Gidiɔn!’”

¹⁹ Go Gidiɔn kekë kɔc rɛ̈ɛ̈r ë yen kabɔt bɛ̈n ë paany këc biic, të thiinakäŋ akën wɛ̈ɛ̈ric cil guɔ bɛ̈n, ke kɔc tït ë ke piac röt waar, ke ke jɔ tuŋ guɔ gɔl ë kuöth ku näkkï töny ë kecin.

²⁰ Ku koth rɛm kɔ̈kë kaarou tuŋken, ku näkkï töny, ku mukkï kuthyuuiken ë cin ciëmken, ku mukkï tuŋken bïk ë kooth në cin cuëëcken, ku jɔkï kiɛɛu moc an, “Abätäu ee këde Bɛ̈nydït ku ee këde Gidiɔn!”

²¹ Ku kɛ̈ɛ̈ckï, ye ŋɛk kɔ̈ɔ̈c tëde ke ke cï wut tuɔɔk, go rem de Midian kat ëbɛ̈n, ku pälkï kiɛɛu, ke ke riŋ.

²² Të wën koth ë rem de tɔŋ de Gidiɔn tuŋ, go Bɛ̈nydït rem de Midian tɔ guut röt kapäc në abätɛ̈ɛ̈u, gokï kat ke ke lɔ Dhereda thiääk ke Bethcita të lɔ aken de Abel Meɣola thiääk kekë Tabath.

²³ Na wën, ke kɔc ke Yithriɛl ë cɔl keek: kɔc ke Naptali ku kɔc ke Acer, ku kɔc ke Manatha kedhie, bïk kɔc ke Midian cop.

²⁴ Go Gidiɔn kɔc tuɔɔc në piny ë kuur de Eparaim yic, yöök keek an, “Bäk thäärkï në kɔc ke Midian, ku pɛckï pïïu ke Jordan në ke nïïm tueŋ abäk ɣeet Bethbara.” Go röör cɔ̈ɔ̈l bei kedhie, gokï pïïu ke Jordan peec abïk ɣet Bethbara,

²⁵ Ku dɔmkï bäny ke Midian kaarou, Orep kekë Dheep, gokï Orep nɔ̈k ë kuur ë Orep lɔ̈ɔ̈m, ku nɛ̈kkï Dheep tëdɛn ye mɔ̈u dhiim thïn ku copkï Midian ku bïïkï nïïm ke yï Orep kekë Dheep tëde Gidiɔn në Jordan nɔm të lɔ aköl amiäk.