Bäny 5 - JAM DE NHIALIC 2011

Din de Debora kekë Barak

¹ Në ee köölë Debora kekë Barak wën de Abinowam acïk ë dinë kiit:

² Nhialic abï wo thieei. Acï ë Yithriɛl dhel ë yepiɔ̈u luɔi bï yen thɔ̈ɔ̈r: go kɔc röt gam lekkï në miɛtëpiɔ̈u.

³ Piɛŋkï, wek meliik: pälkï röt piny wek bäny! Yɛn bï dit ket ku guöt thom Nhialic Bɛ̈nydït de Yithriɛl.

⁴ Bɛ̈nydït, të wään nyiëëŋ yïn kuur de Theyir piny, Të wään bïï yïn bei piny de Edom, piny acï bɛ̈n lath, ku tueny deŋ nhial. Ee yic, pïïu acïk bɛ̈n bɛ̈n piny në luäätiic.

⁵ Ku nieŋ kur röt në Bɛ̈nydït de Thinai nɔm, në Bɛ̈nydït nɔm Nhialic de Yithriɛl.

⁶ Në akööl ke Camagar wën de Anath, ku në akööl ke Jail, Kɔc ke thɔ̈rɔ̈ɔ̈l ee käŋ ɣaac akënkï wut bɛ aa reetic, ku kɔc keny ayek cath në kuɛɛr koriic.

⁷ Wuöt ke Yithriɛl acïk döŋ ke ke cïn yiic bäny, acïk kɔ̈ɔ̈c ke ke cïn yiic këdäŋ agut cï bɛ̈ndï. Yɛn aa bɔ̈ ke ya cït man kɔc ke Yithriɛl.

⁸ Të wään cï kɔc ke Yithriɛl yiëth kɔ̈k lam, tɔŋ acï bɛ̈n thɔ̈ɔ̈r wutic. Cakaa nɔn ye rem de tɔŋ de Yithriɛl bot kathiërŋuan 40,000, aa cïn raan töŋ de köt kekë tɔŋ në keyiic.

⁹ Piɔ̈ndï atɔ̈u kekë bäny ke tɔŋ de kɔc ke Yithriɛl, kɔc ë röt gam në miɛtëpiɔ̈u, Yak Bɛ̈nydït thieei!

¹⁰ Luɛlkï këde, wek kɔc ee kɛɛc ë mul ɣer kɔ̈ɔ̈th, nyuööckï ë keŋkeŋ ke mul kɔ̈ɔ̈th, ku wek kɔc lɔ të la wek thïn.

¹¹ Piɛŋkï! Kuut dïït looi awuɔɔu në yïth lɔ̈m Alueelkï tiëmdïït de Bɛ̈nydït, ku tiëmdïït de kɔc ke Yithriɛl! Go kɔc ke Bɛ̈nydït jɔ cath në wuötdïtken yiic.

¹² Lɔɔr tueŋ, Debora, lɔɔr tueŋ! Wat kɔc ke yï kit dit, wat kɔc! Lɔ tueŋ! Barak wën de Abinowam, wat kɔckuön cï peec, wɛ̈të ke bei.

¹³ Ago kɔc lik cï döŋ bɛ̈n të nu bänyken, kɔc ke Bɛ̈nydït acïk bɛ̈n tëde yen, acïk röt guiir bïk thɔ̈ɔ̈r.

¹⁴ Gokï bɛ̈n, gɔl në Eparaim leer në wakic, në Eparaim, bïkkï në wakic, abïkï në dhiën de Benjamin cök kekë kɔcke bäny ke tɔŋ aake bɔ̈ piny në Makir, ku bäny ke tɔŋ kɔ̈k abïkï në Dhebulun,

¹⁵ Bäny ke Yithakar aake bɔ̈ në Debora, ee yic Yithakar ë bɛ̈n kekë Barak ayadäŋ, gokï kuany cök të lɔ wakic. Ku dhiën de Ruben aake jam piɔ̈ɔ̈th, ku akënkï lueel na bïk bɛ̈n.

¹⁶ Eeŋö döŋ kek ciëën në thök cök? Ee luɔi bïï kek kɔc tit thök piŋ röt acɔl thök? Ee yic, dhiën de Ruben aake jam piɔ̈ɔ̈th, ku akënkï lueel na bïk bɛ̈n.

¹⁷ Dhiën de Gad arɛ̈ɛ̈r në Jordan të lɔ aköl amiäk, ku dhiën de Dan acï döŋ në abëël wïïr yiic. Dhiën de Acer arɛ̈ɛ̈r wath thok, acïk döŋ ë wɛ̈ɛ̈r yɔu.

¹⁸ Ku kɔc ke Dhebulun kekë Naptali acïk röt kuɔɔn ë tɔɔŋiic.

¹⁹ Në Taanak, ë nyin de Megido, Meliik acïk bɛ̈n thɔ̈ɔ̈r, ku thäär Meliik ke Kanaan, ku acïn ateŋ töŋ cïk bɛ̈n jɔt.

²⁰ Ku thäär kuɛl nhial, të ciɛth kek ke ke ret tënhial yic, athɛ̈ɛ̈rkï në Thithera.

²¹ Ku lak Amool de Kicon keek wei në kuëërdïït de Kiir ë Kicon. Yɛn bï lɔ tueŋ ke ya cath në riɛl.

²² Go joŋgöör bɛ̈n kekë kɔt arëët, adumkï piny në kecök.

²³ Go tunynhial ë Bɛ̈nydït lueel an, “Tääuwë aciɛɛn ë Merodh kɔ̈u,” “aciɛɛn abï lööny ë kɔc rɛ̈ɛ̈r ëtɛ̈ɛ̈n yiëth. Akënkï bɛ̈n bïk Bɛ̈nydït bɛ̈n kony, akënkï bɛ̈n cï rem de tɔŋ bï bɛ̈n thɔ̈ɔ̈r në baŋde.”

²⁴ Tiiŋ mit guöp aläl në diäär yiic ee Jail, tiiŋ de Ɣeber raan de kɔc ke Keni, tiiŋ mit guöp aläl në diäär rɛ̈ɛ̈r në pɛɛnyiic.

²⁵ Thithera aa kɔɔr pïïu, go gäm ca, acï yiɛ̈n miök yat në aduŋ läk yic.

²⁶ Go löny de paany nööm ë ciin tök, ku nööm piɔ̈ɔ̈t ë ciin däŋë, ku yup Thithera dhoŋ nɔm, acï piäät thɔ̈ɔ̈ŋ ë löc abï paal ë baŋtui.

²⁷ Go wïïk ë yemiɔl, lööny piny ku le lik ë yecök Aa wiɛ̈ɛ̈k ë yemiɔl ku lööny piny ke cï thou.

²⁸ Man Thithera, ee biic luwiit në awëërnyin, ku luwïït në kal kɔ̈u. Go aa lop an, “Eeŋö cï abëël ke tɔŋke gääu në bɛ̈n ciëën aya?” Eeŋö kën ë jöŋgöörke dap bɛ̈n ciëën ënɔɔnë?”

²⁹ Go duetkɛn pel nïïm bɛ̈ɛ̈r thok, ee rɔt luɔp ku be rɔt nyɔk ë lop yetök an,

³⁰ “Keek akɔɔrkï kakɛn bïk ke peec ku tëkkï ke röt, raan de tɔŋ tök ke nyan tök ku nɔn ee kek duet kaarou në raan tök, ku lupɔ piɛth ee këde Thithera, ku lupɔ lɔ ŋirŋir abï tääu ë tiiŋ ë Melik yeth.”

³¹ Ka kɔc ke aterdu abïk aa thou aya kedhie, Bɛ̈nydït, ku lɔ määthku riauriau cït aköl ë run ë piny! Ku piny acï bɛ̈n dɛ mät në run kathiërŋuan.