Bäny 4 - JAM DE NHIALIC 2011

Debora ku Barak

¹ Ɣɔn cï Eɣud thou ke kɔc ke Yithriɛl ë ke nyɔk luɔi de kërac në Bɛ̈nydït nyin.

² Go Bɛ̈nydït keek tɔ peec ë Jabin, aaye melik de Kanaan mac wun ë Ɣadhor, ku bɛ̈nydɛn de rem ë tɔŋ acɔl Thithera, aa ceŋ Ɣaroceth de Ɣagoyiim.

³ Ku yen ade nɔm bot kadhoŋuan ke abëël ke tɔŋ ke wëëth, ku yen aa yɔŋ kɔc ke Yithriɛl në yaaŋ rac ë run kathiërrou. Go kɔc ke Yithriɛl dhiau në Bɛ̈nydït nɔm bïï keek luök.

⁴ Ku Debora tiiŋ de Lappidoth aaye tiët de Nhialic, ku aa lui ke ye bɛ̈ny ee lööŋ guïïr ë Yithriɛl aköölkë.

⁵ Yen aaye dap rëër në tim de aköt de Debora thar ë kaam de Rama kekë Bethel në piny ë kuur de Eparaim yic, ku kɔc ke Yithriɛl aake ye lɔ në yelɔ̈ɔ̈m ëtɛ̈ɛ̈n lek wëlken guiir në kɛmken.

⁶ Na ɣɔn ë kööl tök, ke tɔ Barak wën ë Abinowam cɔl, Barak ɣɔn rɛ̈ɛ̈r wutic ë Kedec në Naptali, ku lëk en an, “Bɛ̈nydït Nhialic de Yithriɛl, acï yïn gäm ë löŋë: nöm aguum ke kɔc kathiëër në dhiëën ke Naptali kekë Dhebulun ku lɛɛrë keek të lɔ kuur ë Tabor.

⁷ Ku yɛn bï Thithera bɛ̈ɛ̈i, bɛ̈ny ë rem de tɔŋ de Jabin, bïï bɛ̈n thɔ̈ɔ̈r ke yïn në wak de Kicon yɔu. Abï nɔm dɛk abëëlkɛn ke tɔŋ ku rem de tɔŋ. Ku yïn bä tɔ tiam en.”

⁸ Go Barak bɛ̈ɛ̈r an, “Yɛn bï lɔ të le yïn lɔ wekë yɛn, ku na cïï lɔ ayadäŋ, ke yɛn cïï bï lɔ.”

⁹ Go lueel an, “Yɛn bï dhil lɔ wokë yïn, ku acïn dhuëëŋ bä yök në luɔi bï Bɛ̈nydït Thithera tɔ nɛ̈k ë tik.” Na wën ke Debora kekë Barak ë ke jɔt röt lekkï Kedec.

¹⁰ Go Barak dhiëën ke Dhebulun kekë Naptali caal Kedec, go aguum kathiëër ke kɔc ye kuany cök, ku lɔ Debora kekë yen.

¹¹ Në ë kaamë yic Ɣeber raan ë Ken acï paanyde lɔ piäät të thiääk kekë Kedec të lɔ tim de ɣok në Dhananim. Acïk jäl në kɔc ke Keniken lɔ̈m, kuat de Ɣabap wënthun ë Mothe.

¹² Na wën cï Thithera yen ŋic nɔn cï Barak wën ë Abinowam lɔ ë kuur de Tabor nɔm.

¹³ Go Thithera bot kadhoŋuan ke abëël ke tɔŋ cï looi ë wëëth cɔ̈ɔ̈l bei kedhie, ku rem de tɔŋ ëbɛ̈n, ku tooc keek Ɣaroceth de juöör tɔ ke lɔ në wak de Kiconic.

¹⁴ Go Debora lëk Barak an, “Lɔɔr, Bɛ̈nydït awat yïn, ee köölë acï yïn tɔ tiam Thithera. Go Barak jɔ lɔ piny në kuur de Tabor kekë aguum kathiëër ke remdɛn de tɔŋ.

¹⁵ Na wën aa lɔ Barak ke mak kekë remdɛn ë tɔŋ, go Bɛ̈nydït Thithera kekë abëëlkɛn ke tɔŋ ku remdɛn ë tɔŋ gäm anuɔɔn. Go Thithera kɛɛc piny në abëldɛn ë tɔŋ kɔ̈u ku kɛt në yecök.

¹⁶ Go Barak abëël ke tɔŋ kekë rem ë tɔŋ cop të lɔ Ɣaroceth de juöör, go rem de tɔŋ de Thithera nɔ̈k kedhie. Acïn raan töŋ cï bɛ̈n döŋ.

¹⁷ Na wën ke Thithera kɔt lee paany ë Jayel yic, tiiŋ de Ɣeber raan ë kɔc ke Keni, në biäk de Jabin melik de Ɣadhor nɔm mät kekë dhiën ë Ɣeber.

¹⁸ Go Jayel Thithera loor nɔm an, Bäär ɣöt bɛ̈ny, bäär në paanydï yic, du riɔ̈c. Go lɔ ɣöt, ku thiɛɛn ë tik en në lupɔɔ kɔ̈ɔ̈th.

¹⁹ Go Thithera lɛ̈k tik an, “Duɛ̈ɛ̈r ya gäm pïïu ke dëk yɛn cï yal go tik gööm de ca liepthok, ku tɔ dëk, ku be nyɔk ë thiɛ̈n ë lupɔ thar,

²⁰ go lɛ̈k tik an, “Kääcë ë paany thok, ku na de raan bɔ̈ ku thiëëc yïn an de raan nu ë tënë, ke luel an ei.

²¹ Thithera acï dak arëët, go tɔ̈c ku niin aläldïïtë. Go Jayel tiiŋ de Ɣeber bɛ̈n ë määth ku nɛ̈k në piëët piëët en löny de paany në ye thɔ̈ɔ̈ŋ abï löc lɔ paal piny.

²² Na wën bɔ̈ Barak ke bï Thithera bɛ̈n kɔɔr, go Jayel lɔ të nu yen ku lɛ̈k en, an, “Bäär yïn bä bɛ̈n nyuöth raanduön kɔɔr. Ago lɔ ɣöt ke yen, go Barak Thithera yök piny ke cï thou ku nu löc ke piäät në ye thɔ̈ɔ̈ŋ.

²³ Köölë Nhialic acï Yithriɛl bɛ̈n tɔ tiam Jabin melik de Kanaan.

²⁴ Gɔl ë aköölkë leer tueŋ, riɛl de kɔc ke Yithriɛl acï yenyin bɛ̈n ŋuak, arëk abïk Jabin melik de Kanaan jɔ riɔ̈ɔ̈k taitai.