Bäny 3 - JAM DE NHIALIC 2011

Juöör cï Döŋ Piny

¹ Na ɣɔn ke Bɛ̈nydït ë nyiëëŋ juöör kɔ̈k piny, bïk kɔc ke Yithriɛl them, kɔc kën tɔŋ kɔn thɔ̈ɔ̈r ë kɔc ke Kanaan.

² A looi ee kënë tei, në luɔi bï En rem de Yithriɛl wɛ̈ɛ̈t ë tɔɔŋ, kɔc kën tɔŋ kɔn thɔ̈ɔ̈r.

³ Juöör ɣɔn cï nyääŋ piny ee wuöt kadhïc ke kɔc ke Pilithiin, kɔc ke Kanaan kedhie, kɔc ke Thidon, ku kɔc ke Ɣib rɛ̈ɛ̈r në kur ke Lebanɔn, gɔl në kuur dïït ë Baal Ɣermon ɣeet në kueer ee lɔ Ɣamath,

⁴ dɔ̈ŋ bïk aa ka themë kɔc ke Yithriɛl, na bïk lööŋ ke Bɛ̈nydït riëëu, lööŋ ɣɔn gëm ë kuarken në kueer ë Mothe.

⁵ Go kɔc ke Yithriɛl jɔ rëër në kɔc ke Kanaan, ku kɔc ke Ɣit, ku kɔc ke Amor, ku kɔc ke Peridh, ku kɔc ke Ɣib, ku kɔc ke Jebuth.

⁶ Ku thiakkï duetken, ku thiëk wɛ̈ɛ̈tken në duet ke Yithriɛliic, ku jɔkï yiëthken aa lam.

Othaniɛl

⁷ Kɔc ke Yithriɛl acïk kërac looi, mɛ̈ɛ̈rkï nïïm në Bɛ̈nydït Nhialicden, ku yek Baal lam kekë Acera,

⁸ go Bɛ̈nydït jɔ gɔ̈th kekë Yithriɛl ku tɔ Melik de Kucan Ricathiam de Methopotamia tɔ tiam keek ku kuum keek në run kabɛ̈t.

⁹ Na wën ke Yithriɛl ë dhiau ë Bɛ̈nydït nɔm, go raan tuööc bïï ke luök. Raanë acɔl Othaniɛl wën ë Kenadh, Kenadh mänhë Kalep thiinë.

¹⁰ Othaniɛl aaye bɛ̈ny ë lööŋ guiir ë Yithriɛl, na wën ke Wëi ke Bɛ̈nydït ë ke bɔ̈ ë yeguöp, go Othaniɛl lɔ tɔŋ, ago Bɛ̈nydït yen tɔ tiam Kucan Ricathiam melik de Methopotamia.

¹¹ Go piny jɔ dɛk mät në run kathiërŋuan ku jɔ Othaniɛl wën de Kenadh bɛ̈n thou.

Eɣud

¹² Na wën ke kɔc ke Yithriɛl ë ke be kërac looi në Bɛ̈nydït nyin, go Bɛ̈nydït Eglon Melik de Mowap tɔ ril awär Yithriɛl.

¹³ Go Melik Eglon kɔc ke Ammon mat në kɔc ke Amalek ku tiamkï kɔc ke Yithriɛl, ku peckï Jeriko pänydït ë tiim ke akööt

¹⁴ Go kɔc ke Yithriɛl Eglon Melik de Mowap luööi në run kathiëër ku bɛ̈t.

¹⁵ Na wën ke Yithriɛl ë be dhiau në Bɛ̈nydït nɔm, go raan tuööc bïï ke luök. Raanë acɔl Eɣud wën ë Gera, Eɣud aye cam, raan dhiën ë Benjamin. Go kɔc ke Yithriɛl Eɣud tooc ke muk athölbö yïnkï Eglon Melik de Mowap.

¹⁶ Ku Eɣud aa cï rɔt luöi abätäu athok rou ku ye bɛ̈ɛ̈r de yenkɔ̈u thɛntimitïïr kathiërdhïc. Acï tɔ duutë në ye biäk cuëc në lupɔɔke thäär.

¹⁷ Na wën, ke jɔt athölbö yïn Melik Eglon, ku Eglon aaye raan dït kɔ̈u aläldïïtë.

¹⁸ Na wën acï Eɣud yen gäm athölbö, ke yöök kɔc ë ɣɛ̈ɛ̈c athölbö, bïk röt pɔ̈k wut.

¹⁹ Na ɣëët kuur yaath ë Gilgal lɔ̈ɔ̈m, ke puk enɔm ciëën tëde Eglon, ku lueel yan. “Bɛ̈ny, ade jam thian kaar bä lɛ̈k yïn. Go bɛ̈ny lïïmke yɔ̈ɔ̈k, an, “Nyääŋkï wook piny wapäc. Gokï jäl kedhie.

²⁰ Go Eɣud lɔ të nu yen, ku lueel an, “Yɛn de nɔm thön tëde Nhialic, thön yiɛ̈n yïn go rɔt jɔt në thönyde nɔm,

²¹ Go Eɣud abätäu wɛ̈ɛ̈th bei në baŋ cuënyde në ciin cam. Ku gut melikic,

²² abï abätäu lɔ thïn ëbɛ̈n ayï waide, abï paal ë yekɔ̈u, arëk abïï miök kum, ago cïïn bɛ̈nbei. Ku aa kën abätäu bɛ̈ɛ̈i bei në yeyic.

²³ Na wën ke Eɣud ë lɔ biic, ku thiöök ɣöt ë yekɔ̈u, ku riit thok

²⁴ ku jiël. Na wën ke lïïmke ë ke bɔ̈, gokï ɣön nhial tïŋ ke riɛɛt thok, gokï tak lueelkï an, Melik anu ɣööt, ke yök ke lïïrë guöp të lir.

²⁵ Na wën acïk tïït aläldïïtë, ku akën ɣöt liep thok, gokï mukthɛ̈ɛ̈r nööm ku liepkï. Gokï Melikden guɔ tïŋ ke dhɔt piny ke cï thou.

²⁶ Go Eɣud rɔt kual wën ŋoot kek ke ke tït, ku tëëk në kuur yaath kɔ̈u, go rɔt kual leer Theyira.

²⁷ Na wën aacï ɣet, në piny ë kuur de Eparaim yic, ke jɔ kaaŋ kooth, go kɔc ke Yithriɛl jäl piny de kuur në yen ëtök, ku jɔ keek wat tɔŋ.

²⁸ Go keek yɔ̈ɔ̈k an, “Kuanykï yacök! Bɛ̈nydït, acï week tɔ tiam kɔc ke Mowap kɔc ke aterdun. Go kɔc ye kuany cök, ku rumkï wanh de Jordan ë yen duëër kɔc ke Mowap tem ke ke lɔ lɔŋ de aköl amiäk, acïn raan tök tei cïk tɔ tëm.

²⁹ Në ë köölë acïk aguum kathiëër 10,000 ke rem lëu tɔŋ nɔ̈k në kɔc ke Mowap yiic, ku acïn raan töŋ cï bɛ̈n poth.

³⁰ Ee köölë Yithriɛl acïk kɔc ke Mowap tiaam go piny dɛk mät në run kathiërbɛ̈t 80.

Camagar

³¹ Ku bɛ̈ny ee löŋ guiir däŋ ee Camagar wën ë Anath. Yen ayadäŋ ë Yithriɛl luök, në luɔi cï yen bot kadhetem (600) ke kɔc ke Pilithiin nɔ̈k në thieny ye ɣɔ̈k kuaath.