Bäny 19 - JAM DE NHIALIC 2011

Raan ë Lebai ku Tiiŋ Mɛ̈ɛ̈th Kek

¹ Në aköölkë Yithriɛl aa cïn nɔm bɛ̈ny, ku ade raan ë Lebai ë rɛ̈ɛ̈r piny ë kuur de Eparaim kɔ̈u. Na wën, ke nöm tik në Bethleɣem de Juda bïï aa tiiŋ mɔ̈th.

² Go tiiŋ mɔ̈thde piɔ̈u diu ke yen, ago nyääŋ piny, ku lee rëër paan ë wun në Bethleɣem de Juda. Na wën aacï rëër ëtɛ̈ɛ̈n ë pɛ̈i kaŋuan.

³ Ke monyde ë lɔ të nu yen ë Bethleɣem bïï lɔ luk piɔ̈u ago rɔt dɔ̈k en. Aa go jäl ke cath ke mul kaarou ku raan ee ye luööi. Na wën ke jɔ ɣeet paan ë wun, na wën lɔ wun duet e tïŋ, ke jɔ lɔ të nu yen ke mit piɔ̈u bïï lɔ yök ke yen.

⁴ Go monywun, yen wun duet e pëën, go rëër ëtɛ̈ɛ̈n ë nïn kadiäk, ke ye cam ku dëk, ku niin ëtɛ̈ɛ̈n.

⁵ Na ɣɔn në kööl ye nïn ŋuan gokï röt jɔt ku guiirkï röt në baŋ bïï kek jäl. Go wun duet lɛ̈k mony ë nyande an, “Wek duëër kɔn cam, ku bäk jɔ jäl.”

⁶ Na wën ke ke nyuc piny ku ciëmkï ëtök. Na wën ke lueel wun duet an, “Wek duëër niin ee köölë ku tɔ yï piɔ̈u mit.”

⁷ Na wën aa jɔt lebai rɔt bïï jäl, go monywun e lɔ̈ŋ, go niin ëtɛ̈ɛ̈n ee wɛ̈ɛ̈rë yic.

⁸ Na ɣɔn amiäk de kööl ë dhïc, aa jɔt rɔt bïï jäl, go wun duet e yɔ̈ɔ̈k an, “Yïn duëër kɔn cam ku bäk jɔ jäl të cïï akɔ̈l rɔt puk.” Na wën ke ke jam cam ëtök kaarou.

⁹ Na wën aa jɔ Lebai jäl kekë tiiŋ mɔ̈thde, ku raan ee ye luööi, go monywun, yen wun duet lueel an, “Ënɔɔnë tïŋ acï guɔ aa thëën, niɛnkï ee tënë ku tɔ yï piɔ̈u mit. Ku miäk aduduur, we bï röt jɔt ku lakï wundun.”

¹⁰ Ku acïï lebai kɔɔr bï bɛ niin, go jäl ke wel e nɔm Jebuth (yen aye Jeruthalem) kekë mul kaarou ku tiiŋ mɔ̈thde.

¹¹ Na wën aa cïk thiääk ë Jebuth, ke piny ë go cuɔl, go raan ee ye luööi ye yɔ̈ɔ̈k an, “Eeŋö cï wok nin wun ë kɔc ke Jebuth?”

^12-13 Go bɛ̈nyde bɛ̈ɛ̈r an, “Ei, wok cïï bï lɔ wun ë juöör kɔ̈k, kɔc cie Yithriɛl, wo bï ɣet tueŋ Gibia ku nɔn ee Rama wok bï tëde nïn lɔ yök.” Bäär themku buk ɣet Gibia ku nɔn ee Rama, buk lɔ niin wun tök ee wuötkë yiic.

¹⁴ Agokï lɔ tueŋ aɣet abï akɔ̈l lɔ piny ë Gibia wun ë Benjamin.

¹⁵ Ëtɛ̈ɛ̈n gokï kɔ̈ɔ̈c bïk niin ë Gibia. Agokï lɔ ku nyuckï wutic cil ke ke lɔ̈ŋ, ku acïn raan cï keek lɛɛr paande bïk lɔ niin thïn.

¹⁶ Na ɣɔn thëën ke monydït bɔ̈ tëdɛn ë luɔi domic, aa rɛ̈ɛ̈r në Gibia ëtɛ̈ɛ̈n, në piny ë kuur de Eparaim.

¹⁷ Na wën aa dɛɛi ku tïŋ kamaan wutic cil, go monydït ke luɔp, an, “Yak kɔc ke wun ou? Ku ee tënou la wek?”

¹⁸ Agokï bɛ̈ɛ̈r, an, “Wok aake cï lɔ Bethleɣem de Juda, ku wok puk röt baai piny ë kuur de Eparaim kɔ̈u të ciɛŋ. Yɛn aacï lɔ Bethleɣem ë Juda ke ya lɔ luaŋ de Bɛ̈nydït. Ku ënɔɔnë acïn raan cï wo jɔt leer wook paande lok niin.

¹⁹ Acïn kë dak tëde wo, wok de nïïm wal bï mul ke nyuööth. Ku kuïn cï pam ku mɔ̈ndït lëu ɛn wokë kɔckiën cath ë yɛn.”

²⁰ Go monydït bɛ̈ɛ̈r, an, “Wek duëër bɛ̈n paandï wek bä gäm këduön kaarkï ëbɛ̈n. Duökï bï niin wutic cil.”

²¹ Na wën, ke ke jɔt ë monydït leer ke ɣönde ku tɔ mulken cäm. Na wën aacï ke cök waak, ke ke jɔ cam ëtök në cäm athɛ̈i.

²² Të wën jɔ kek lɔ ke ke tɔ kepiɔ̈ɔ̈th mit, ke kɔc rac kɔ̈k ke ee wunë ke ke took ɣöndɛn niin kek thïn. Ku gutkï ɣöt thok, ke ke cɔɔl monydït arëët, an, “Bɛ̈ɛ̈iyë mony wën lɔ ɣöndu bei, ke buk bɛ̈n tɔ ye tik!”

²³ Go monydït de ɣöt lɔ biic ku yöök keek an, “Ei, mïthkï duökï kërɛɛc cït ee kënë loi, raanë ee kamandï, ku kënë ayäär.

²⁴ Tiëŋkï nyandï kï ee dhueny kën kɔn yök ke moc ku tiiŋ mɔ̈thde kï, abä ke yiɛ̈n week biic ee tënë, ku bäk ke luöi këduön cäk tak. Ku monyë duökï lui ayär rɛɛc cït ee kënë!”

²⁵ Ku kɔc rackë akënkï këde piŋ. Go raan ë Lebai tiiŋ mɔ̈thde jäp biic ɣöt thok. Agokï wiëët në wɛ̈ɛ̈ric ëbɛ̈n abï piny ruu ke yek nööm ku be ë ŋɛk nööm, ku jɔkï tɔ jël.

²⁶ Na wën ëbɛ̈n akɔ̈l thok, ke tik ë bɔ̈ baai rëër ë monyde thïn, go wïïk në nïn de ɣöt thok ku jɔ dhɔt piny ëtɛ̈ɛ̈n abï akɔ̈l thok lɔ nhial.

²⁷ Na wën jɔ monyde pääc aduduur, ku liep ɣöt thok ke bï jɔ lɔ jäl. Ago tiiŋ mɔ̈thde yök ëtɛ̈ɛ̈n ke cï wïïk piny ɣöt thok ke cï yenyin wɛl piny, ku cinke acïk röt kan ënïn nɔm.

²⁸ Ago lɛ̈k en, an, “Jɔt rɔt buk jäl.” Go kɛ̈n bɛ̈ɛ̈r. Na wën, ke tɛ̈ɛ̈u guöpde ë mulde kɔ̈u, ku jɔt lee wunden.

²⁹ Wën ɣeet en wut, ke nöm lem ku tem guöp de tiiŋ mɔ̈thde, ë thïïm kathiëër ku rou, ku tuc keek dhiëën ke Yithriɛl kathiëër ku rou ëbɛ̈n.

³⁰ Raan cï yen tïŋ ëbɛ̈n aye lueel, an, “Kërɛɛc cït ee kënë akënë kɔn looi gɔl akööl ɣɔn bïï kɔc bei paan ë Rip! Wok bï këdäŋ dhil looi në biäk ee kënë! Bïï looi adï?”