Bäny 18 - JAM DE NHIALIC 2011

Maika ku Dhiën ë Dan

¹ Na ɣɔn aköölkë Yithriɛl aa cïn nɔm bɛ̈ny, ku dhiën ë Dan aake köör röt pinydɛn bï kek rëër thïn, aake cïn nïïm piny në dhiëën ke Yithriɛl yiic, ë luɔi kën kek juöör ë rɛ̈ɛ̈r ë ke yiic cuɔp wei piny wään cï gäm keek.

² Go kɔc ke dhiën ë Dan jööt ke tɔŋ kadhïc në ke yiic tooc, kɔc wun ë Dhora ku Ecetawol bïk piny lɔ neem, ku bïk kɔɔric. Go kɔc lɔ piny ë kuur de Eparaim, ku nyuckï paan de Maika ku ninkï thïn ëtɛ̈ɛ̈n.

³ Tëthiin rëër kek paan ë Maika, gokï thoŋ jiɛɛm dhuŋ de Lebai ŋic, gokï röt yäl en ku lopkï an, “Eeŋa bïï yïn eenë? Ku eeŋö loi ee tënë?”

⁴ Go lɛ̈k keek an, “Ade kë cä mac wokë Maika, ku ee ya riɔp bä lui ke ya ee gunyde.”

⁵ Na wën, ke lëkkï yen an, “Thiëc Nhialic na buk lɔ tiam në ee kenydanë yic.”

⁶ Go guuc bɛ̈ɛ̈r an, “Lakï në mät, në kenydunic, Bɛ̈nydït anu në we nïïm tueŋ.”

⁷ Ago röörkë kadhïc jäl, ku lekkï Laic, gokï kɔc rɛ̈ɛ̈r ëtɛ̈ɛ̈n tïŋ ke ke rɛ̈ɛ̈r ë lik, cï kɔc ke Thidon. Acïn kë diir keek ku lek yum. Në luɔi ye pinyden ŋiëc luɔk, acïk kuɛth. Ku keek ayadäŋ arëërkï tëmec ë kɔc ke Thidon, ku cïn wuöt kɔ̈k de kek nïïm amat.

⁸ Na wën, aa lek ke nïïm pɔ̈k Dhora ku Ecetawol, go mïthëkɔcken ke luɔp, në luɔi tɔ̈u ë käŋ ëtɛ̈ɛ̈n.

⁹ Gokï bɛ̈ɛ̈r, an, “Bäkkï, buk thɔ̈ɔ̈r në keek, acuk tïŋ nɔn yen piny piɛth. Duökï be gääu në nɔ̈m de piny!

¹⁰ Të la wek lɔ ëtɛ̈ɛ̈n, we bï kɔc cïn kë diir keek yök, ku ee piny piɛth cïï Nhialic gäm we, piny cïn kë dak thïn ŋic luɔk.”

¹¹ Na wën, ke bot kadhetem ë kɔc ke dhiën ë Dan lɔ tɔŋ, jël në Dhora ku Ecetawol.

¹² Gokï piɔ̈ɔ̈t ë biäk të lɔ aköl athɛ̈i de Kiriath Jiriim ë Juda. Wun ye cɔɔl an, Maɣan Dan aɣet cï ee köölë.

¹³ Gokï lɔ në piny ë kuur de Eparaim, ku bïkkï baai de Maika.

¹⁴ Go kɔc kadhïc wään cï Laic lɔ neem lɛ̈k mïthëkɔcken an, “Ŋiɛckï nɔn de yen yïk ee tënë, ku tim cï guaŋ ke ye yath, ku ade yiëth kɔ̈k ku ajïpɔ, eeŋö buk looi?

¹⁵ Go kɔc kë kadhïc röt yal ɣön ë Maika nu Lebai thïn ku thiëckï ke ke mit piɔ̈ɔ̈th në yen.

¹⁶ Go bot kadhetem (600) ë kɔc ke Dan cï röt guiir në baŋ ë tɔŋ kɔ̈ɔ̈c ë wut këc biic.

¹⁷ Ku lɔ röör kadhïc wään neem wut ku nömkï tim cï guaŋ ke ye yath, ku ajïpɔ ku yiëth kɔ̈k, ku kääc guuc kekë bot kadhetem ke kɔc ë tɔŋ ë kal thok.

¹⁸ Wën cïï kɔc lɔ ɣön ë Maika ku nömkï tim cï guaŋ, ku yiëth ëbɛ̈n, ku ajïpɔ, ku yiëth kɔ̈k, go guuc keek luɔp an, “Eeŋö luɔikï?”

¹⁹ Gokï lɛ̈k en an, “Mim thok. Ku bäär we wook, bä ya wääda ku ye gunyda. Cïï piɛth luɔi bï yïn aa guny de Yithriɛl ëbɛ̈n, në luɔi bï yïn aa guny de ɣön tök?”

²⁰ Kënë acï guuc tɔ mit piɔ̈u. Go tim cï guaŋ nööm kekë yath ku ajïpɔ ku yiëth kɔ̈k, ku jiël ke kɔc.

²¹ Gokï röt puk në mïthkɛn, ku ɣɔ̈kken, ku cath kaken ëbɛ̈n ë kenïïm tueŋ.

²² Wën cïï kɔc dhiën ë Dan ɣet të mec, go Maika kekë röör thiääk në yen ke cuɔp cök kueer. Gokï keek gïth,

²³ aake ye ke cööt. Go kɔc ke Dan röt yal ë baŋ tök ku lëkkï Maika an, “Eeŋö kɔɔr? Eeŋö mɛ̈ɛ̈t yïn kɔckë yiic ku cuɔpkï wo cök aya?”

²⁴ Go Maika bɛ̈ɛ̈r an, “Ye lueel adï an eeŋö kaar? Wek cï yiëthkï jɔt ëbɛ̈n, ku jatkï gunydï, ku acïn kë cäk nyääŋ ɛn?”

²⁵ Go kɔc ke Dan bɛ̈ɛ̈r an, “Tit yïthok në kë bä lueel, kɔc kɔ̈k në woyiic ayek dap gɔ̈th, ku aduëërkï gɔ̈th ënɔɔnë ku nɛ̈kkï yïn wekë baaidu.”

²⁶ Ago kɔc ke Dan jäl lekï ë kueerdenic, na wën aacï Maika e tïŋ nɔn juëc kek në kɔcke, go rɔt pɔ̈k ciëën lee baaide.

^27-28 Na wën aa cïk yanh ë Maika ku gunyde jɔt ke ke jɔ ɣet Laic, ku thɔ̈ɔ̈rkï në kɔc rɛ̈ɛ̈r ë mätic kɔc cïn kë diir keek. Acïk ke bɛ̈n nɔ̈k abätäu ku nyopkï wunden ë mac. Aa cïn raan töŋ cï keek bɛ̈n kony në luɔi rëër kek të mec ke Thidon, ku cïn wuöt thiëëk kek de kek nïïm amat. Kënë aa loi rɔt në wak thiääk ke Bethreɣop. Go kɔc ke Dan pänydït bɛ yïk ku ciëŋkï ëtɛ̈ɛ̈n.

²⁹ Agokï wut cäk an Dan, rin ke kuɛɛrëdɛn ɣɔn dhiëëthë Yithriɛl, ku rin ke wut thɛɛr acɔl Laic.

³⁰ Go kɔc ke Dan röt luöi yath, ku kuanykï Jɔnathan wën ë Gercom, käu de Mothe, ke ye gunyden. Wɛ̈ɛ̈tke acïk bɛ̈n ŋoot ke ke ye guc ke dhiën ë Dan, aɣet cï akööl ɣɔn leerë kɔc ë pɛ̈cic.

³¹ Yanh ë Maika acï bɛ̈n ŋoot ke ye lam ë kɔc ke Dan në akööl wään rëër ɣön ë Nhialic ë Cilo.