Bäny 17 - JAM DE NHIALIC 2011

Yanh de Maika

¹ Ku aa de raan ë rëër piny ë kuur de Eparaim, raan cɔl Maika.

² Na wën ke lɛ̈k man an, “Wään bï raan bot ka thiëër ku tök (1,100) ke ateek kual tëde yïn, yïn cï raanë bɛ̈n läm aciɛɛn. Acä piŋ ke luel. Tïŋ wëukï atɔ̈ukï tëde yɛn, ee yɛn ë nöm keek.” Go man jɔ lɛ̈k en an, “Bɛ̈nydït abï yï thieei wëndï!”

³ Go wëu pɔ̈k nïïm man, ago man lueel an, “Në luɔi bän aciɛɛn pëën ke cïï lööny ë wëndï guöp, yɛn bï gutguut looi, ku gäm ee wëukë Bɛ̈nydït. Tim de yath abïï guaŋ ku kum kɔ̈u në ateek. Ku ënɔɔnë yɛn bï wëukë bɛ pɔ̈k nɔm yïn.”

⁴ Na wën, ke ke jɔ pɔ̈k nïïm man, ago bot kaarou ke atek nööm, ku gëm ke atën ee thäth ë atek. Ku looi yath, aa guɛŋ ë tim ku kum kɔ̈u në ateek, ku tɛ̈ɛ̈uwë ɣön de Maika.

⁵ Ku Maika aa de nɔm tëdɛn ye kɔc lam thïn. Acï yiëth kɔ̈k ke baaiden looi, ku kuɛny wëndɛn tök ë wɛ̈ɛ̈tke yiic, tɔ ye guuc.

⁶ Ku paan ë Yithriɛl aa cïn yic bɛ̈ny në aköölkë yiic, ka ŋɛk aaye kë kɔɔr piɔ̈nde looi

⁷ Ku aade wën dhuŋ ë Lebai de baai ë Juda, aa rɛ̈ɛ̈r në Bethleɣem de Juda ëtɛ̈ɛ̈n.

⁸ Aa jël ke lɔ köör ë tëdɛn bï yen rëër thïn. Na wën ciɛth en kueer, go bɛ̈n paan ë Maika nu piny ë kuur de Eparaim.

⁹ Go ë Maika luɔp an, “Ë yï bɔ̈ të nou?” Go bɛ̈ɛ̈r, an, “Yɛn ee raan ë Lebai rɛ̈ɛ̈r në Bethleɣem de Juda, ku yɛn kɔɔr të bän rëër thïn.”

¹⁰ Na wën, ke lueel Maika an, “Rɛ̈ɛ̈rë wekë yɛn, ku bä ya wää ku ye guuc, ku yïn bä aa gäm atek kathiëër ë ruöön thok ëbɛ̈n, kekë lupɔɔ ku këcamdu.”

¹¹ Go raan ë Lebai gam në luɔi bï Maika rëër ke yen, ku dhuŋë acï bɛ̈n ciët mɛnh tök ë mïthke yiic.

¹² Ago Maika dhuŋë bɛ̈n tɔ ye gunyde ku rëër ɣönde.

¹³ Go Maika lueel, an, “Ënɔɔnë, Bɛ̈nydït abï ya jɔ thieei në luɔi ye Lebai gunydï.”