Bäny 16 - JAM DE NHIALIC 2011

Thamthon anu ë Gadha

¹ Na ɣɔn ë kööl tök, ke Thamthon ë lɔ wun ë Pilithiin cɔl Gadha, të le yen yök ke tiiŋ akɔɔrröör, ago lɔ ɣöt ke yen.

² Go kɔc ke Gadha ŋic nɔn tɔ̈u ë Thamthon ëtɛ̈ɛ̈n, na wën ke ke took ëtɛ̈ɛ̈n, ku jɔkï tiit ë wut thok biic ë wɛ̈ɛ̈ric ëbɛ̈n. Aake cï lɔ lik, në baŋ cï kek e lɛ̈k röt an, “Abuk nɔ̈k miäk rial.”

³ Ku Thamthon aa nin ëtɛ̈ɛ̈n agut cï wɛ̈ɛ̈ric cil. Na wën ke jɔt rɔt ku nööm kal de wut thok, kedhie ayï mëënken ye ke nöök kaarou, ku jɔt ke ë yekët, ku leer keek ë kuur tuööm nɔm kekë Ɣebron nɔm.

Thamthon ku Delila

⁴ Na ɣɔn, ke Thamthon ë nhiaar tiiŋ rɛ̈ɛ̈r në wak ë Thorekic ku acɔl rin Delila.

⁵ Go bäny kadhïc ke Pilithiin lɔ tëde yen ku luelkï, an, “Wëŋ, ku tïŋ të tɔ̈u ë riɛlde thïn, ke buk tiaam, ku dutku, ku näkku. Ku raan ëbɛ̈n ë woyiic abï yï gäm bot kathiëër ku tök ke atek.”

⁶ Go Delila Thamthon yɔ̈ɔ̈k, an, “Yïn läŋ lɛ̈kë yɛn të nu riɛldu thïn. Na dut raan yïn ku kɔɔr bï yï tɔ cïn riɛl duëër raan ŋö looi?”

⁷ Go Thamthon pɔ̈k nɔm en an, “Na dutë ya në awiɛɛth tiɔp kadhorou, ke yɛn duëër kɔ̈c, abä jɔ ciët raan tei.”

⁸ Ago bäny ke Pilithiin Delila yiɛ̈n awiɛɛth tiɔp cï piac wii kadhorou, go Thamthon duöt ë ke.

⁹ Ku acï kɔc tɔ thiaan ɣön nɔm ke ke buth en. Na wën ke cöt, an, “Thamthon! Kɔc ke Pilithiin abïkï!” Go awiɛɛth tueny, cït man ye mac alath jak go tuɛny. Kënë akën riɛlde tɔ ŋickï.

¹⁰ Na wën ke lëk ë Delila Thamthon an, “Tïŋ, yïn ee yɛn math ku cïï ya lɛ̈k yic. Yïn läŋ ënɔɔnë lɛ̈kë yɛn duöt bän yï ŋiëc duöt apiɛth.”

¹¹ Go lɛ̈k en an, “Të dutë yɛn ë wïïn cï piac yiëër, wïïn kënë kɔn dut, ke yɛn duëër ciët raan tei.”

¹² Ago Delila wïïn cï piac yiëër bɛ̈ɛ̈i, ku dut Thamthon në yen, ku kɔc ke Pilithiin buth en acïk thiaan ë ɣöt nɔm cït man wään, go cööt, an, “Thamthon! Pilithiin abïkï!” Go wïïn tueny në yekök cï alath.

¹³ Na wën ke lek ë Delila Thamthon an, “Yïn ŋoot ke yï mɛth ɛn, ku cïï yic lɛ̈k ɛn. lɛ̈kë yɛn duöt bän yï ŋiëc duöt apiɛth.” Go lɛ̈k en an, “Na nai nhïm ke yanɔm kadhorou ku mat keek në alath, ku mɛcë keek ë löc kɔ̈u, ke yɛn duëër ciët raan tei.”

¹⁴ Go Delila yen tɔ niin, ago nhïm ke yenɔm kadhorou nai ku mɛtke në alath ku mɛc keek ë löc, ku cööt an, “Thamthon! Pilithiin abïkï! Go pääc ë nïnic ku mïït nhïmke bei në alanh cï cuëc yic.

¹⁵ Na wën, ke lueel, an, “Eeŋö ee yïn e lueel, an nhiaar ɛn, ku kë luel aliu në yïpiɔ̈u? Yïn cï ya math raandiäk, ku cïï ya lëk kë tɔ yïn riɛl.”

¹⁶ Na ɣɔn, aacï cool ë jut en guöp ee wëlkë aköölnyïïn ëbɛ̈n, ke jɔ piɔ̈u bäp abïï thuɔɔu ŋuöön,

¹⁷ go lɛ̈k piɔ̈nde ëbɛ̈n, an, “Yɛn kënë rëët kɔn lɔ ë yanɔm ë caŋɣɔn dhiëëthë ya, yɛn ee ayul de Nhialic (raan cï kuëëŋ bï rɔt gäm Nhialic) na mut a nɔm, ke riɛldï aduëër jäl ë yaguöp ku yɛn duëër ciët raan tei.”

¹⁸ Na wën, acï Delila ye tïŋ ke cï yepiɔ̈u lɛ̈k en ëbɛ̈n ë yic, ke jɔ bäny ke Pilithiin cɔɔl an, “Bɛkï bɛ̈n nyɔk. Acï ya lɛ̈k yic.” Go bäny ke Pilithiin bɛ̈n ke ke muk wëu në kecin.

¹⁹ Na wën ke tɔ Thamthon nin ë ye ɣäm, ku cɔɔl raan, ku muut nhïm bei ë yenɔm nhïm cï nai kadhorou, ago jɔ yɔŋ guöp, në baŋ cïï riɛlde jäl.

²⁰ Na wën ke cööt an, “Thamthon! Pilithiin abïkï!” Go pääc ë nïnic, ku lueel, an, bï bɛ lɔ biic cït man yen e looi ë ceŋ, ku bïï yeguöp lɔ yïïr. Ku akuc nɔn cïï Bɛ̈nydït e nyääŋ piny.

²¹ Go kɔc ke Pilithiin dɔm, ku tukkï nyin bei. Ku leerkï Gadha, ke rɛk në kuɛɛt ke maläŋ, ku yek tɔ guär ɣön ye kɔc mac thïn.

²² Ku nhïm ke yenɔm aake lɔ ke ke cil.

Thon ë Thamthon

²³ Go bäny ke Pilithiin keyiic määt në luɔi bïï kek yanhden Dagon lɔ luöi dhuëëŋ ku bïk lɔ näk. Agokï diɛt ket an, “Yanhda acï wo tɔ tiam Thamthon raan de aterda!”

^24-25 Na wën aacï kɔc e tïŋ, ke ke lec yanhden ku lueelkï an, “Yanhda yïn cï wo gäm raan de aterda ku tääuwë ë wocin, raan cï paanda riɔ̈ɔ̈k, ku nɛ̈k kɔckuɔn juëc.” Na wën aa cïk piɔ̈ɔ̈th jɔ miɛt, ke ke jɔ Thamthon tɔ cɔl bïk bɛ̈n tɔ cɔ̈ŋ. Gokï Thamthon cɔ̈ɔ̈l bei ɣön ë macic, Wën cï kek Thamthon bɛ̈ɛ̈i bei ɣön ë mac, acïk tɔ cɔ̈ŋ ku tɛ̈ɛ̈ukï ë kɛm ke mën ɣɛ̈ɛ̈c awïk.

²⁶ Na wën, ke Thamthon ë yöök dhuŋ ë muk yeciin, an, “Päl ɛn ë ya ruany mëën kaarou ɣɛ̈ɛ̈c awïk ë ɣöt bän ke rɔ kan.”

²⁷ Ku ɣöt aacï thiäŋ ke röör ku diäär, ku bäny ke Pilithiin kadhïc aake tɔ̈u ëtɛ̈ɛ̈n kedhie, kɔc nu ɣööt alëukï kë cït aguum kadiäk, de röör ku diäär, ke ke daai të wën jɔ kek Thamthon leeŋ.

²⁸ Na wën ke Thamthon ë läŋ Bɛ̈nydït an, “Bɛ̈nydït Nhialic be Yïnɔm tak në yɛn, Nhialic ee Yïn aläŋ, në ee kaam töŋë, ke ya bï rɔt guöör në kɔc ke Pilithiin në kë cï kek nyïïnkï tuök bei.”

²⁹ Na wën ke Thamthon ë dɔm mëën nu cil kaarou, mëën ɣɛ̈ɛ̈c awïk de ɣöt, ku jiëp të lɔ keek në riɛlde ëbɛ̈n.

³⁰ Ku lɛ̈ŋ an, “Tɔ ya thou wok ë kɔc ke Pilithiin!” Na wën ke ɣöt ë wiɛ̈ɛ̈k ë bäny nïïm, ku kɔc kedhie, ku nɛ̈k kɔc kedhie kɔc ë tɔ̈u thïn. Thamthon ë kɔc juëc bɛ̈n nɔ̈k ɣɔn thou en awär kɔc ë nɛ̈k ɣɔn pïïr en.

³¹ Go mïthëkɔcken bɛ̈n në kɔc dhiënden ëtök bïk guöpde bɛ̈n jɔt. Gokï lɛɛr ku lek tɔ̈ɔ̈u në kaam de Dhora kekë Ecetawol, në raŋic raŋ de Manowa wun. Ku Thamthon aa ye bɛ̈ny ee löŋ guiir ë Yithriɛl në run kathiërrou.