Bäny 15 - JAM DE NHIALIC 2011

¹ Na ɣɔn, në akööl ke tëm de agamɔ, go Thamthon amɛthɔ̈k nööm ku jël le tiiŋde neem. Ago lɛ̈k wun tiiŋde an, “Yɛn kɔɔr bä lɔ ɣön ë tiiŋdï.” Go ë wun tik ye pɛ̈n lɔ ɣöt.

² Ku lëk Thamthon an, “Yïn ŋiɛc arëët nɔn mɛɛn yïn en, aguɔ gäm mɛ̈thëdu. Ku nyankënë koor aläk awär en. Abä nööm ë nyinde yic.”

³ Na wën ke lueel Thamthon an, “Ënɔɔnë kërɛɛc bä luöi kɔc ke Pilithiin acïï bï bɛ tɔ̈u në yayeth!”

⁴ Go Thamthon lɔ roor ku dɔm bot kadiäk ke awɛn, ku dut ke yɔ̈ɔ̈l kuthyui, renë ku renë.

⁵ Ku cuëny kuthyuui në mac, ku tɔ awɛn lɔ ë duum ke kɔc ke Pilithiin yiic, duum kääc. Ago jööŋ nyop kedhie kekë rap nu ë jööŋiic, mɛ̈tkï në duum ke tiim ke enap ku tiim ke olip.

⁶ Na wën aa lɔ kɔc ke Pilithiin lop, an, eeŋa ë loi ee kënë. Go lɛ̈k keek, an, ee Thamthon, mony ë nyan ë Timena, në luɔi cïï wun duet tiiŋde gäm raan mɛ̈ɛ̈th kek. Ago Pilithiin lɔ mat ku nyopkï ee tiiŋë kekë wun ë mac abïk thou.

⁷ Na wën ke lëk ë Thamthon keek, an, “Yen kë cäk looi ka! Yɛn cï kuëëŋ nɔn cän bï kɔ̈ɔ̈c aɣet të bä yɛn këdï guöör!”

⁸ Ago ke mak ke cï ŋeeny, ku nɛ̈k kɔc juëc ë keyiic. Na wën ke lɔ ceŋ në kɔ̈k ke kuur ë Etam yiic.

Thamthon Atiam Kɔc ke Pilithiin

⁹ Go kɔc ke Pilithiin bɛ̈n ku ɣɛ̈pkï në Juda, ku mɛkkï wun cɔl Leɣi.

¹⁰ Go kɔc ke Juda ke luɔp an, “Eeŋö mak wek wook?” Gokï bɛ̈ɛ̈r an, “Wok aake bï Thamthon bɛ̈n dɔm, ku buk lɔ luöi kë cït kë cï luöi wook.”

¹¹ Na wën ke aguum kadiäk ke kɔc ke Juda, ë ke lɔ lek Thamthon diëc në kɔ̈k ke kuur ë Etam yiic, ku lëkkï yen an, “Cïï ŋic nɔn ceŋ ë kɔc ke Pilithiin wook? Eeŋö lui yïn wook ee kënë?” Go bɛ̈ɛ̈r an, “Aake luöi kë cït kë cïk kɔn luöi yɛn.”

¹² Gokï lɛ̈k en an, “Wok aake bɔ̈ buk yïn bɛ̈n duöt ku gëmku yïn kɔc ke Pilithiin.” Go Thamthon lueel, an, “Apiɛth kuɛ̈ɛ̈ŋkï nɔn cä wek a bï nɔ̈k ë wek.”

¹³ Gokï bɛ̈ɛ̈r an, “Acuk gam, yïn buk duöt tei ku gëmku yïn keek, yïn cukku bï nɔ̈k.” Na wën ke jɔkï duöt në awiɛɛth ë piɛc ë wii kaarou, ku bïïkï ciëën në kɔ̈k ke kuuric.

¹⁴ Na wën aacï ɣëët Leɣi, go kɔc ke Pilithiin bɛ̈n të nu yen ke ke kïïu. Go Wëi ke Bɛ̈nydït guɔ bɛ̈n ë yeguöp ëthiäu ku tɔ ril. Go awiɛɛth ë tɔ̈u ë ye kök ku yecin guɔ ciët alanh cï dëp ë mac, ku jɔkï guɔ lööny wei.

¹⁵ Na wën ke kuany yuɔɔm de mul gëm, ë dhɔt piny ku nɛ̈k en agum de kɔc.

¹⁶ Ago Thamthon ket an, Yɛn cï agum de raan nɔ̈k, në yuɔɔm de mul gëm.” “Yɛn cï kɔc dɔ̈ɔ̈r nïïm, në yuɔɔm de mul gëm.

¹⁷ Na wën cïï yen thök ë jam, go yuɔɔm de mul gëm cuat wei, go tɛ̈n cäk an, “Ramath Leɣi.”

¹⁸ Ago Thamthon yal aläl, go Bɛ̈nydït lɔ̈ŋ an, “Yïn cï lïmdu tɔ tiëm arëët ku ënɔɔnë yɛn bï thou ë reu, ku kɔc ee yiëth lam bïk a dɔm?”

¹⁹ Na wën ke Nhialic ë liep kuur thok në Leɣi, ku bɔ̈ pïïu bei thïn. Na wën cï Thamthon dek, go riɛlde rɔt puk, ku jɔ ɣɔ̈ɔ̈r. Go ee nyinë cäk an, “Ɣakkor.” Aŋoot ë Leɣi aɣët cï ee köölë.”

²⁰ Go Thamthon aa bɛ̈ny ee lööŋ guiir në Yithriɛl ë run kathiërrou, në akööl ɣɔn ceŋ ë kɔc ke Pilithiin piny.