Bäny 13 - JAM DE NHIALIC 2011

Dhiënh ë Thamthon

¹ Na ɣɔn ke kɔc ke Yithriɛl ë ke be kërac looi ë Bɛ̈nydït nyin, ago ke tɔ kuum ë kɔc ke Pilithiin ë run kathiërŋuan.

² Ku raan aa nu raan ë Dhora, acɔl Manowa, raan dhiën ë Dan. Ade nɔm tiiŋ ë cï rol ku rëër ke cïn meth.

³ Na wën ke tunynhial ë Bɛ̈nydït tul tëde tik, bïï ku yöök an, Yïn cï rol ku yïn cïn nɔm meth, ku yïn bï liac ku yök mɛwä.

⁴ Ënɔɔnë, du ee dek ë mɔ̈u ku du mɔ̈n tuc ee dek, ku du ee cam ë ka cï pɛ̈n kɔc.

⁵ Në luɔi bï yïn liac ku dhiëth mɛwä, acï bï aa muut nɔm në luɔi bï ye gäm Nhialic ke ye ayul (raan cï kuëëŋ ku gëm rɔt Nhialic) ë nɔn töŋ ë dhiëëthë ye, ku abï Yithriɛl luäk bei ë kɔc ke Pilithiin cin.

⁶ Na wën ke tik ë dap lɔ të nu monyde ku lueel an, Ade raan de Nhialic cï bɛ̈n tëde yɛn, acït tunynhial yɛn ë riɔ̈ɔ̈c ku akɛ̈n thiëëc në tëdɛn ë bïï yen thïn, ku akën a lɛ̈k rinke.

⁷ Ku aa lëk ɛn an, “Yïn bï liac ku dhiëëth mɛwä, ku ënɔɔnë, du ye dek ë mɔ̈u ku du mɔ̈n tuc ee dek, ku du ye cam ë ka cï pɛ̈n kɔc. Në luɔi bï meth gäm Nhialic ke ye ayul (raan cï kuëëŋ bï rɔt gäm Nhialic) ënɔn töŋ ë dhiëëthë ye agut cï thonde.”

⁸ Na wën ke Manowa ë läŋ Bɛ̈nydït, an, “Bɛ̈nydït, Yïn liɛp, tɔ raan de Nhialic wään bä tuööc bɔ̈ tëde wook, bïï wo bɛ̈n wɛ̈ɛ̈t ë kueer bïï wok ë mɛnh bï dhiëëthë muk.

⁹ Go Nhialic lɔ̈ŋde piŋ, ago tunynhial bɛ tuöc tiiŋde ke tɔ̈u domic, ku monyde Manowa aa cïï tɔ̈u kekë yen.

¹⁰ Go tik guɔ kat le lɛ̈k monyde, an, “Tïŋ! Raan wään tul tëde yɛn ë kööl wäänë kï ë bɛ bɛ̈n.”

¹¹ Manowa ë rɔt guɔ jɔt ku kuɛny tiiŋde cök. Wën ɣeet yen të nu ë raanë, go luɔp an, “Ee yïn raan ë jam wekë tiiŋdï?” Go bɛ̈ɛ̈r an, “Ee Yɛn.”

¹² Go Manowa luɔp an, Të le jamdu aa yic, Eeŋö bïï looi ë baŋ de pïïr ë mɛnhë? Ku eeŋö bïï meth dhil looi?

¹³ Go tunynhial ë Bɛ̈nydït bɛ̈ɛ̈r an, “Tiiŋdu abï ka cä lɛ̈k en dhil looi ëbɛ̈n.”

¹⁴ Acï bï dhil aa cam ë këriëëc ëbɛ̈n ë loi në tim de enap, ku cïï dëk ë mɔ̈u ayï mɔ̈n tuc ku cïï cäm ë ka cï pɛ̈n kɔc. Abï ka cä lɛ̈k en kedhie dhil looi.

¹⁵ Go Manowa lɛ̈k tunynhial ë Bɛ̈nydït an, “Yïn kɔɔrku bä rëër ku buk yïn luöi amɛthɔ̈k bä cam.

¹⁶ Go tunynhial ë Bɛ̈nydït bɛ̈ɛ̈r an, “Cakaa wek ë tɔ yɛn rɛ̈ɛ̈r ënɔɔnë. Acïn kë bä cam ë kacaamkun yiic. Ee të le yïn miɔ̈c ye nyop ëbɛ̈n looi, ku gämë Bɛ̈nydït. (Aa kën Manowa ŋic nɔn ee yen tunynhial ë Bɛ̈nydït.)

¹⁷ Na wën ke Manowa ë lop tunynhial ë Bɛ̈nydït an, “Cɔl yïn ŋa? Agoku yïn riëëu të le jamdu aa yic

¹⁸ Go tunynhial ë Bɛ̈nydït bɛ̈ɛ̈r an, “Ee ŋö ee yïn a luɔp rin? Acïï duëër lëu ë yöŋ ë yic.”

¹⁹ Na wën ke Manowa ë nöm amɛthɔ̈k tök kekë aɣaar ke ye miɔ̈c ë rap, ku nɛ̈k ë kuur kɔ̈u gëm Bɛ̈nydït. Ku të wën dɛɛi ë Manowa kekë tiiŋde, go Bɛ̈nydït kë dïït ë gäi looi.

²⁰ Të wën jɔ liem de lɔ̈k ë mac lɔ pat nhial ë yïk nɔm, go tunynhial ë Bɛ̈nydït lɔ nhial ë lɔ̈kic. Na wën tïŋkï ee kënë, yen Manowa kekë tiiŋde gokï kenïïm guöt piny.

²¹ Wën kënë tunynhial ë Bɛ̈nydït rɔt bɛ nyuöth Manowa kekë tiiŋde, gokï ŋic nɔn ee yen tunynhial ë Bɛ̈nydït.

²² Go ë Manowa lɛ̈k tiiŋde an, “Wook cï jɔ thou, në baŋ cï wok Nhialic tïŋ!”

²³ Go tiiŋde bɛ̈ɛ̈r an, “Na ë kɔɔr Bɛ̈nydït bï wo nɔ̈k, adï kën miɔ̈cdan ë rap ku miɔ̈c ye nyop ëbɛ̈n nööm në wocin, ku acïï wok duëër nyuöth ee kakë kedhie, ku lëk wook kakë ëbɛ̈n.”

²⁴ Go tik mɛwä dhiëëth, ku ciëk rin an Thamthon ago meth dït, ku thieei Bɛ̈nydït.

²⁵ Ku jɔ Wëi ke Bɛ̈nydït meth tɔ ril në akööl ɣɔn rëër en ë kaam de Dhora ku Ecetawol wun ë Dan.