Bäny 12 - JAM DE NHIALIC 2011

Japetha ku Kɔc ke Eparaim

¹ Go Kɔc ke Eparaim remdɛn ë tɔŋ cɔ̈ɔ̈l bei, ku temkï wɛ̈ɛ̈r de Jordan ke ke lɔ Dhapon ku yöökkï Japetha an, “Eeŋö le yïn thɔ̈ɔ̈r wekë kɔc ke Ammon ke yï kën wo cɔɔl buk lɔ në yïn? Wo bï ɣöndu ɣök mac ë wenïïm!”

² Ago Japetha bɛ̈ɛ̈r an, “Yɛn wokë kɔckï, wok thär tɔŋdït në kɔc ke Ammon, ku wek aa cuk kɔn cɔɔl, ku wek kën wok bɛ̈n luäk bei në kecin.

³ Na wën tiëŋ en, ke ya koon wëikï, ku la tɔŋ ke we liu, ku tɛɛm akeu kɔ̈u la thɔ̈ɔ̈r wokë kɔc ke Ammon, go Bɛ̈nydït ya tɔ tiam keek. Ënɔɔnë Eeŋö bä wek ɛn bɛ̈n luöi tɔŋ?”

⁴ Go Japetha kɔcke Giliyad määtiic, ku thɛ̈ɛ̈rkï në kɔc ke Eparaim ku tiɛɛm keek në luɔi ye kek e lueel an, “Wek kɔc ke Giliyad wek cï bɛ̈n bei në kɔc ke Eparaimiic kekë Manatha.”

⁵ Go kɔc ke Giliyad wanh jany ye kɔc Jordan teem peec, yen të ye raan töŋ de kɔc ke Eparaim cï poth tɔŋ bɛ̈n ku lueel an, “Takkï ya tëm.” Go kɔc ke Giliyad thiëëc an, “Ye raan ë Eparaim?” Na le bɛ̈ɛ̈r an, “Ei.”

⁶ Ke lëkkï yen an, lueel an, “Ciboleth” Të yen raan Eparaim ke lueel an, “Thiboleth.” Në luɔi cïï kɔc ke Eparaim löŋë ee ŋiëc lueel ë gɔk, na lë ke dɔmkï ku lek nɔ̈k ë wanh ë Jordan thok. Gokï aguum kathiërŋuan ku rou ke kɔc ke Eparaim nɔ̈k ee köölë.

⁷ Japetha aaye bɛ̈ny ee lööŋ guiɛɛr ë Yithriɛl ë run kadhetem. Na ɣɔn aacï thou, go tɔ̈ɔ̈u wun tök në wuöt ke Giliyad.

Yibadhan ku Eelon ku Abadon

⁸ Në Japetha cök, go Yibadhan raan wun ë Bethleɣem aa bɛ̈ny ee lööŋ guiir ë Yithriɛl.

⁹ Ade nɔm mïthwät kathiërdiäk ku duet kathiërdiäk. Ago duetke tɔ thiɛɛk ë kɔc cie kɔc ë dhiënden, ku tɔ wɛ̈ɛ̈tke thiak diäär kathiërdiäk cie duet ke dhiënden Yibadhan aaye bɛ̈ny ee löŋ guiir ë Yithriɛl ë run kadhorou.

¹⁰ Na ɣɔn aacï thou, go tɔ̈ɔ̈u ë Bethleɣem.

¹¹ Në Yibadhan cök, go Eelon raan wun ë Dhebulun aa bɛ̈ny ee löŋ guiir ë Yithriɛl ë run kathiëër.

¹² Na ɣɔn aacï thou, go tɔ̈ɔ̈u ë Aijalon në Dhebulun.

¹³ Në Eelon cök, go Abadon wën ë Ɣilel, raan wun ë Pirathon, aaye bɛ̈ny ee löŋ guiir ë Yithriɛl.

¹⁴ Aa de nɔm mïthwät kathiërŋuan ku mïth ke mïthke kathiërdiäk, mïth ɣɔn ee cath ë mul kathiërdhorou kɔ̈ɔ̈th. Abadon aaye bɛ̈ny ee lööŋ guiir ë Yithriɛl ë run kabɛ̈t.

¹⁵ Go thou, ku tɔ̈ɔ̈u ë Pirathon aken ë Eparaim, piny ë kuur de kɔc ke Amalek.