Bäny 1 - JAM DE NHIALIC 2011

Dhiën ke Juda ku Thimion Apeckï Adonibedhek

¹ Na ɣɔn në thon de Jocua cök, ke kɔc ke Yithriɛl ë ke lɔ tëde Bɛ̈nydït bïk kë lee lɛ̈k keek lɔ piŋ. Gokï Bɛ̈nydït thiëëc an, “Ee dhiën nou në dhiënkuɔ yiic, dhiën bï lɔ tueŋ, ago tɔŋ lɔ thɔ̈ɔ̈r kekë Kanaan?”

² Go Bɛ̈nydït bɛ̈ɛ̈r an, “Ee dhiën de Juda yen bï lɔ tueŋ, ku abä keek tɔ tiëm.”

³ Go kɔc dhiën de Juda, kɔc dhiën de Thimion cɔɔl an, “Mätkï në wook, buk kɔc ke Kanaan rɛ̈ɛ̈r ë wuöt cï gäm wook lɔ cop, ku wook ayadäŋ wek buk lɔ kuɔny, buk kɔc ceŋ wuöt cï gäm week lɔ cop.” Na wën ke rem de tɔŋ ë Thimion lɔ në rem de tɔŋ ë Juda.

⁴ Go Nhialic Juda tɔ tiam kɔc ke Kanaan ku kɔc ke Peridh, arëk abïk aguum kathiëër 10,000 nɔ̈k ë Bedhek.

⁵ Gokï bɛ̈n të nu Adonibedhek në Bedhek, ku thɛ̈ɛ̈rkï në keek, gokï kɔc ke Kanaan ku kɔc ke Peridh tiaam.

⁶ Na wën ke Adonibedhek ë kɔt, gokï cop ku dɔmkï ku tëëmkï cinkɛn butbuut bei, ku tëëmkï riöpdït ke yen cök bei kedhie.

⁷ Na wën ke lueel Adonibedhek an, “Yɛn ë butbuut ku riöp ke cök ke meliik kathiërdhorou tɛ̈ɛ̈m bei kedhie, ku aake ye cam në athueithueei ee lööny piny ë yathok, cït man cän ye looi, acï Nhialic guöör.” Go lɛɛr Jeruthalem, të wään cï yen lɔ thou thïn.

Dhiën ë Juda Apeckï Jeruthalem ku Ɣebron

⁸ Go kɔc ke Juda Jeruthalem mɔɔk piny ku peckï. Acïk kɔc ke wut nɔ̈k ku ɣökkï mac.

⁹ Na wën ke ke lɔ thɔ̈ɔ̈r në kɔc ke Kanaan ceŋ piny ë kuur, ku kɔc rɛ̈ɛ̈r tɔ lɔ wöuwic.

¹⁰ Gokï lɔ thɔ̈ɔ̈r në kɔc ke Kanaan rɛ̈ɛ̈r wun cɔl Ɣebron, ku aaye cɔl Kiriath Arba. Agokï dhiën ke Cecai tiaam ëtɛ̈ɛ̈n Aɣiman, ku Talmai.

Othaniɛl Apec Wun ë Debir

¹¹ Na ɣɔn, ëtɛ̈ɛ̈n go kɔc ke Juda lɔ wun ë Debir, ku aaye cɔl Kiriath Theper ɣɔn.

¹² Ago raan tök ë keyiic, cɔl Kalep lueel an, “Yɛn bï nyandiën Aketha tɔ thiɛɛk ë raan bï Kiriath Theper tiaam ku peec.”

¹³ Go Othaniɛl wën ë Kenadh, Kenadh mɛnhkënë Kalep thiinë wut peec, go Kalep nyande Aketha gäm en.

¹⁴ Na ɣɔn në kööl ë thiëëk, go Othaniɛl Aketha yɔ̈ɔ̈k bï wun lip në dom de tiim. Go kɛɛc piny në mulde kɔ̈u, go Kalep nyande luɔp në këdɛn kɔɔr.

¹⁵ Go Aketha bɛ̈ɛ̈r an, “Yɛn kɔɔr awuöl ë pïïu. Piny cï gäm ɛn anu rɛɛr të ril.” Go Kalep gäm nyin nu të thöny kekë tëthuth.

Tiëm de Dhiën ke Juda ku Benjamin

¹⁶ Na wën ke kuat de wun tiiŋ ë Mothe, kɔc ke Keni, aake jël në kɔc ke Juda në Jeriko pänydït ë tiim ke akööt, lekkï ë jɔ̈ɔ̈r de Juda yic, piny cie luɔk, piny nu të lɔ wöuwic thiääk ke Arad. Gokï lɔ rëër në kɔc ke Amalek yiic ëtɛ̈ɛ̈n.

¹⁷ Go kɔc ke Juda lɔ kekë kɔc ke Thimion ku Jɔkï kɔc ke Kanaan ceŋ wun ë Dhepath tiaam ëtök. Gokï wut mak, ku riäkkï liŋliŋ, ku ciëkkï wut an Ɣorma.

¹⁸ Go Juda Gadha nööm, ku Acekelon ku Ekeron kekë wuöt thiääk në keek.

¹⁹ Ku Bɛ̈nydït aa tɔ̈u kekë kɔc ke Juda, agokï piny ë kuur nööm. Ku akënkï kɔc ceŋ riaaŋ bɛ̈n cieec, në luɔi de kek nïïm abëël ke tɔŋ ë loi ë wëëth.

²⁰ Go Ɣebron, gäm Kalep, cït man cï Mothe ye than piny, ago Kalep wɛ̈ɛ̈t ke Anak kadiäk cop kɔc ɣɔn rɛ̈ɛ̈r ëtɛ̈ɛ̈n.

²¹ Ku kɔc ke Benjamin akënkï kɔc ke Jebuth, rɛ̈ɛ̈r në Jeruthalem cop, ago kɔc ke Jebuth ŋoot ke ke rɛ̈ɛ̈r ë kɔc ke Benjamin në Jeruthalem, aɣet cï ë köölë.

Dhiëën ke Eparaim ku Manatha apeckï Bethel

^22-23 Go dhiëën ke Eparaim ku Manatha lɔ wun ë Bethel, ku mɛkkï ku Bɛ̈nydït aa tɔ̈u ke keek. Gokï nëëm tuɔɔc Bethel. Ɣɔn pänydït aa cɔl Ludh.

²⁴ Go nëëm raan tïŋ ke bɔ̈ bei wutic, (gokï dɔm) ku lëkkï yen an, “Nyuöthë wook, kueer lɔ wut ku yïn cuku bï luöi kërac.

²⁵ Go keek nyuöth kueer ee lɔ wutic. Gokï kɔc lɔ nɔ̈k kedhie wutic, ale döŋ ke ee yen ë raanë kekë baaide.

²⁶ Go raanë lɔ piny de kɔc ke Ɣit, ku yïk pänydït, ku ciëk an Ludh, rinke ka aɣet cï ee köölë.

Kɔc kën ë Yithriɛl ke Cuɔp wei

²⁷ Dhiën ke Manatha, akënkï kɔc rëër ë Beth Can në bɛ̈ike cuɔp wei, ku Taanak, ku Dor, ku Yibiliim, ku Megido, ku bɛ̈i thiääk në keek ŋoot ë kɔc ke Kanaan ke ke rɛ̈ɛ̈r thïn.

²⁸ Na ɣɔn cïï Yithriɛl riɛl, gokï kɔc ke Kanaan tɔ luui keek, ku aŋootkï ke ke kënkï ke cuɔp wei kedhie ëtɛ̈ɛ̈n.

²⁹ Ku yen ee dhiëën ke Eparaim aya, akënkï kɔc ke Kanaan rɛ̈ɛ̈r në Gedher cuöp bei, go kɔc ke Kanaan ŋoot kekë rɛ̈ɛ̈r ëtɛ̈ɛ̈n në keyiic.

³⁰ Ku dhiën de Dhebulun akënkï kɔc ke Kanaan rɛ̈ɛ̈r ë Kitron ku Naɣalal, go kɔc ke Kanaan ŋoot ke ke rɛ̈ɛ̈r në keek, ku tɔkï ke luui keek.

³¹ Ku dhiën de Acer akënkï kɔc rɛ̈ɛ̈r në wuöt ke Ako, ku Thidon, ku Aɣilab, ku Akidhip, ku Ɣelba, ku Apik, ku Reɣop cuɔp wei.

³² Go kɔc ke Acer jɔ rɛ̈ɛ̈r në kɔc ke Kanaan në baŋ kën kek keek cop ë pinyic.

³³ Ku dhiën de Naptali akënkï kɔc rɛ̈ɛ̈r wuöt ke Beth Cemec, ku Bethanath cuɔp wei. Go kɔc ke Naptali jɔ rëër në kɔc ke Kanaan ku acïk keek bɛ̈n tɔ luui keek.

³⁴ Ku kɔc ke Amor acïk dhiën de Dan tɔ lɔ piny ë kuur, ku akënkï keek tɔ bɔ̈ piny ë riaaŋ.

³⁵ Ago kɔc ke Amor ŋoot ke ke rɛ̈ɛ̈r në Aijalon ku Caalbim, ku kuur ë Ɣereth, ku jɔ dhiën de Eparaim ku dhiën de Manatha keek cieŋ ku tɔkï ke luui keek.

³⁶ Ku aken ë kɔc ke Edom, kek aye kɔc ke Amor, atëk ë kueer ë Manciëi ɣeet Thela nɔm të lɔ rut.