Amoth 9 - JAM DE NHIALIC 2011

Bɛ̈nydït Aguiir Löŋ

¹ Yɛn ë Bɛ̈nydït tïŋ ke kääc në yïk lɔ̈ɔ̈m, ku lueel an, “Yup gɔ̈ɔ̈l nu ë mën ke Luaŋdït nïïm aläl ke yiɛɛu bï lath ku thiɔ̈i ke. Dhuɔŋë ke wei, ke ke bï wïïk në kɔc nïïm kedhie. Kɔc cï döŋ ë keyiic, abä keek nɔ̈k në abätäu. Acïn raan töŋ bï kɔt wei në ke yiic, ku cïn raan töŋ bän.

² Na cakkï röt wɛc piny, abïk ɣet paan ë thuɔɔu, ke abä ke ŋuɛ̈ny bei, na cakkï ɣet paannhial, ke abä ke bɛ̈ɛ̈i piny ëtɛ̈ɛ̈n.

³ Na cakkï lɔ thiaan në kuur ë Karmel nɔm, ke abä ke kɔɔr ku abä ke dɔm gup ku jat keek. Na cakkï röt thiaan në Yɛn në wɛ̈ɛ̈r thar piny, Yɛn bï ŋuäldït yɔ̈ɔ̈k bï keek kääc.

⁴ Ku të cïï ë keek cak peec në kɔckɛn ke ater, ke abä keek tɔ näk në abätäu. Acä dhel ë Yapiɔ̈u bä ke riɔ̈ɔ̈k ke ke cä luäk.

⁵ Bɛ̈nydït Nhialic de rɛm Raan ee piny jak, abï lɛ̈ɛ̈ŋ ëbɛ̈n, ku dhiau kɔc cieŋ piny kedhie ëbɛ̈n. Ee pinynɔm ëbɛ̈n miaakic nhial cït apiöŋ de Kiir, ku tɔ piny riŋ cït Kiir de Rip,

⁶ Bɛ̈nydït ee ɣönde yïk paannhial. Ku pinynɔm, acïï Yen gëlgël de tënhial nöök. Ee pïïu ke wɛ̈ɛ̈r cɔɔl, piɔɔk En ke tiɔp nɔm. Rinke acɔl ke Bɛ̈nydït!

⁷ Aye Bɛ̈nydït lueel an, “Wek kɔc ke Yithriɛl cäkï kït në kɔc ke Ethiopia tëde Yɛn? Ku kɛ̈n kɔc ke Yithriɛl bɛ̈ɛ̈i bei në Rip. Ku jat kɔc ke Pilithiin në Kerete, ku jat kɔc ke Thiriya në Kir?

⁸ Ku ënɔɔnë nyïïn ke Bɛ̈nydït Nhialic awoikï ciɛɛŋ rɛɛc de Yithriɛl, ku abä riɔ̈ɔ̈k taitai në pinynɔm. Ku Yɛn cïï käu de Jakop bï riɔ̈ɔ̈k ëbɛ̈n. Kënë ë lueel Bɛ̈nydït ka.

⁹ “Yɛn bï löŋ tääu piny, bä baai de Yithriɛl kïïc në juööriic ëbɛ̈n, cït man ye rap kïïc në atɛ̈ny. Ke ya bï kɔc cïn naamden nyaai.

¹⁰ Kɔc ee karɛc looi kedhie në kɔckï yiic abïk dhil thou në abätäu, kɔc ee ye lueel an, ‘Acïn kërɛɛc bïï Bɛ̈nydït bɛ̈ɛ̈i në wogup.’

Wadäŋ de Yithriɛl

¹¹ Aye Bɛ̈nydït lueel an, “Ade kööl bɔ̈, kööl bän Debid pɔ̈k nɔm ciɛɛŋdɛn cï poot wei, ciɛɛŋdɛn cï ciët ɣön cï riääk. Yɛn bï pänyde bɛ guiɛɛr piny abï lɔ kim piny. Abä bɛ nyɔk në yïk abï ciët man wään kɔn en tɔ̈u.

¹² Ka kɔc ke Yithriɛl abïk të cï döŋ në piny de Edom peec, ku peckï juöör ɣɔn ee ya cɔɔl rin ëbɛ̈n. Yen kë ë lueel ë Bɛ̈nydït bï kakë tɔ loi röt ëbɛ̈n ka.

¹³ Aye Bɛ̈nydït lueel an, “Akööl abïkï, akööl bï kɔc ee pur ka temkï yök, ku enap abï dap luɔk ke të ye ë ye nyiith ŋoot wei. Ku kur abïk nïïm aa thuat në mɔ̈n mit, ku kuëër kur kor kɔ̈ɔ̈th ëbɛ̈n në mɔ̈u aya, abï piny mool.

¹⁴ Yɛn bï kɔckiën ke Yithriɛl cï lɔ në pɛ̈cic bɛ pɔ̈k nïïm ciëën pinyden. Ku bïk pɛ̈ɛ̈nydïtkɛn cï riääk bɛ nyɔk në yïk, ku ɣapkï keek, abïk duum ke enap com, ku dëkkï në mɔ̈nde, abïk duum ke tiim aa com, ku camkï mïth ke tiim.

¹⁵ Abä ke wɛc thäär piny pinyden. Ku cïn raan bï ke bɛ nyuän thäär bei pinydɛn cä gäm keek. Ee kë cï ë Bɛ̈nydït Nhialicdun lueel.