Amoth 7 - JAM DE NHIALIC 2011

Nyuuth de Kɔyɔm

¹ Kë ë nyuth ë Bɛ̈nydït Nhialic yɛn kï: Në nyuuthic yɛn cï Bɛ̈nydït tïŋ acak lunydïït de kɔyɔm. Në akööl ɣɔn cïï ë wal ke melik kɔn ŋeer. Ku jɔ wal piɛɛr bɛ nyɔk.

² Na wën ë nyuuthic, ke ya tïŋ kɔyɔm acï këriëëc tɔ̈c cam ëbɛ̈n në ee pinyë. Guɔ lɔ̈ŋ an, “Bɛ̈nydït Awärjäŋ, pälë kɔcku awänyden! Duëërkï pïïr adï? Keek akoorkï ku akɔ̈ckï?

³ Go Bɛ̈nydït piɔ̈u kok, ku lueel an, “Në biäk de lɔ̈ŋdu, kë cï tïŋë acïï rɔt bï bɛ looi.

Nyuuth de Mac

⁴ Go Bɛ̈nydït Nhialic yɛn nyuöth nyuuth däŋ, në nyuuthic, Bɛ̈nydït acï kïït nɔn bï En kɔcke luöi këtuc në mac. Go mac Abäpdit dït cam, ku ciɛm piny ëbɛ̈n.

⁵ Guɔ Bɛ̈nydït Nhialic lɔ̈ŋ an, “Kääcë Bɛ̈nydït Awärjäŋ! Duëër kɔcku pïïr adï? Keek akoorkï ku akɔ̈ckï?

⁶ Go Bɛ̈nydït këde bɛ pɔ̈l, ku lueel an, “Kënë, acïï rɔt bï bɛ looi aya.

Nyuuth de Awin ë Yïk

⁷ Go Bɛ̈nydït ya bɛ tɔ nyuöth ë nyuöth däŋ. Në nyuöthic yɛn cï Bɛ̈nydït tïŋ akääc në päny lɔ̈ɔ̈m, päny cï yïk, ku amuk awin ye yïk käŋ them në Yeciin.

⁸ Na wën, ke lop ɛn an, “Amoth, eeŋö cï tïŋ? Guɔ puk nɔm an, “Ee awin ë yïk. Go lueel an, “Tïŋ ë awin ë yïkë, athɛm ɛn Yithriɛl kɔckï, acïk ciët päny cï awin ë yïk tɛɛm wei, Yɛn cïï A nɔm bï bɛ waar në luɔi bän keek luöi këtuc.

⁹ Ɣään thöny ɣɔn ye kuat de Yithaak lam thïn abïï ke nyääŋ piny. Ku ɣään ke läm ke Yithriɛl, abï ke dhuɔŋ piny. Ku riääk bääny de baai de melik Jerobowam në abätäu.

Amoth kekë Amadhia

¹⁰ Go Amadhia, bɛ̈ny de kake Nhialic de Bethel thok tuöc Jerobowam, meliŋ de Yithriɛl, lueel an, “Amoth alui yïn kiɛɛr rac ë baai de Yithriɛl yic ëbɛ̈n. Jamde abï piny riɔ̈ɔ̈k.

¹¹ Aa ye Amoth lueel an, “Jerobowam abï thou në abätäu, ku kɔc ke Yithriɛl abï keek peec, jɔt keek pinyden, leerë keek piny lei.

¹² Go Amadhia lɛ̈k Amoth an, “Ë jɔ loi, monydaai! Jɔ yïnɔm bɛ pɔ̈k Juda, ku abä ke lɔ thiëc këcamdu ëtɛ̈ɛ̈n, ku lɔɔr bä bɛ lɔ cɔ̈ɔ̈r ëtɛ̈ɛ̈n.

¹³ Du be cɔ̈ɔ̈r ë Bethel eenë taitai. Bethel ee yen nu tëɣeric ye melik lam thïn, ku ye luaŋ yaath de ciɛɛŋ.

¹⁴ Go Amoth pɔ̈k nɔm Amadhia an, “Yɛn cie tiët ku cä ye wën ë tiët, yɛn ee tïn ë thök, ku ya tiim ke ŋaap döt.

¹⁵ Go Bɛ̈nydït a jɔt tëdiën ë yan thök kuany cök, ku lëk ɛn an, ‘Lɔ Yithriɛl, lɔ jäämë kɔckï ëtɛ̈ɛ̈n.’

¹⁶ Ënɔɔnë në biäk ee kënë, piŋ jam ye Bɛ̈nydït lueel, acï lɛ̈k ɛn an, ‘Du cäär në Yithriɛl, ku du baai de Yithaak be wɛ̈ɛ̈t.

¹⁷ Ku ënɔɔnë, aye Bɛ̈nydït lueel an, ‘Tiiŋdu abï aa akɔɔrröör wutic, ku wɛ̈ɛ̈tku ku duet ku mïthku abïk wïïk në abätäu, ku Pinydu abï tek në awiɛi. Ku yïn bï lɔ thou piny ë kɔc kuc Nhialic. Ku kɔc ke Yithriɛl abïï keek peec pinyden leerë keek piny lei.’ ”