Amoth 6 - JAM DE NHIALIC 2011

Riääk de Yithriɛl

¹ Amawoou në week, wek kɔc cï rëër lɔ läŋ yök në Dhiɔn, ku kɔc cï gup a päl piny në kuur ë Thamaria nɔm. Wek bänydït ke baai de Yithriɛl ee röt yök cït ka wär bäny ke juöör ëbɛ̈n. Wek kɔc ye kɔc ke kuɔɔny kɔɔr tëde keek!

² Lak tiëŋkï pänydïït de Kalene, ku bɛkï Ɣamath lɔ tïŋ, ku tiëŋkï Gath, pänydïït de Pilithiin. Ŋuänkï në ciɛɛŋ de Juda, ku Yithriɛl? Ku akenden dïït në akendun?

³ Wek ee bɛ̈n de akööl ke riääk tɔ mec, ku yak thöny de akuöörkuöör jɔ cuöt tëthiɔ̈k.

⁴ Amawoou në week, wek kɔc ee wekɔ̈ɔ̈th tääc në biök piɛth yiic, ku rëërkï në thöckun nïïm, ku yak cuet në nyök ke thökkun yiic, ku miöör në ɣɔ̈kkun yiic!

⁵ Wek nhiaar diɛt ke thoom cït man ë Debid, thoom ya wek diɛt ɣäär yiic gut.

⁶ Wek ee mäu dek në guöl athiäŋ, ku yak röt tɔc në wɛ̈ɛ̈l ŋïr aläl, ku cäkï riääk de Yithriɛl dhiëëu.

⁷ Në biäk de ee kënë, ee wek abïï kɔn peec, ka dhuëŋkuön ke kacaamdït, ayï tɛ̈ɛ̈c ya wek wekɔ̈ɔ̈th tääc acïkï bï bɛ nu.

⁸ Bɛ̈nydït Awärjäŋ acï kuëëŋ në rinke, ku lueel an, “Yɛn man lɛc de kɔc ke Yithriɛl, ku maan ɣäänkɛn ril. Pänydïïtden abä gäm kɔckɛn ke ater, ayï kakɛn tɔ̈u thïn kedhie.

⁹ Na de röör cï döŋ apïïr baai kathiëër, abïk ŋoot ke ke thou.

¹⁰ Na lɔ raan de kɔckɛn cï thou bɛ̈n, bïï gup ke kɔckɛn cï thou bɛ̈n bɛ̈ɛ̈i bei le ke rɔk. Ku kɔc de kɔc cï thou, abïk raan cï döŋ apïïr ɣööt luɔp, an, “De raan däŋ cï döŋ kekë yïn? “Ku abïï röl bɛ̈ɛ̈r an, “Ei! Ka abï raan de kɔc cï thou lueel an, “Mimku thook! Titku röt apiɛth, duku Bɛ̈nydït be lueel rin.

¹¹ Ku ënɔɔnë, acï Bɛ̈nydït lueel an bï, ɣöötdït thuöör piny, ku dhoŋ ɣööt kor piny taitai.

¹² Duëër jöŋgöör riŋ në awiɛn ke kur nïïm? Ku duëër raan wɛ̈ɛ̈r puuric në miöör? Ku ka ye piathëpiɔ̈u ke luɔk, acäk ke puk ke ke ye kake kɛcëpiɔ̈u.

¹³ Wek ee röt lɛɛc në luɔi cä wek pänydït de Lodebar peec, ku lɛckï wenïïm an, ë we rum Karnaim në riɛldun. Yïn ee rɔt lɛɛc, “Wok aake ril buk Karnaim nööm.”

¹⁴ Acï Bɛ̈nydït Nhialic Awärjäŋ lueel an, “Wek baai de Yithriɛl, wek bä tuöc rem de tɔŋ de jur däŋ, bïk pinydun bɛ̈n rum. Abïk we bɛ̈n yɔŋ, gɔl në Ɣamath të lɔ rut, ku bïï në wak de Araba të lɔ wöuwic.