Amoth 5 - JAM DE NHIALIC 2011

Cɔ̈t de Puŋëpiɔ̈u

¹ Piɛŋkï dinë, baai de Yithriɛl, piŋ din dhiëëu Ɛn yïn arëët.

² Yithriɛl nyan kën kɔn yök ke moc ë wïïk, acïï rɔt bï bɛ lëu në jöt! Acï pɔ̈l adhɔt piny, ke cïn raan jɔt e nhial.

³ Acïï Bɛ̈nydït Awärjäŋ lueel an, “Pänydïït töŋ bï agum de rem ë tɔŋ aa lɛɛr tɔŋ, ee bɔt tök yen bï yenɔm aa lɔ dɔ̈k ciëën. Ku pänydïït däŋ bï bɔt lɛɛr tɔŋ, ku ee thiëër kek bï röt aa lɔ pɔ̈k baai de Yithriɛl.

⁴ Aye Bɛ̈nydït lɛ̈k baai de Yithriɛl an, “Bä të nu Yɛn, ku yïn bï pïïr.

⁵ Duökï yiëth lɔ lam në Bethel, Bethel abï ciën naamde. Ku duökï lɔ lam në Gilgal, kɔc ke Gilgal abï keek peec. Ku duökï aken de Biirceba tem.

⁶ Bä tëde Bɛ̈nydït, ku yïn bï pïïr. Na cïï bɔ̈, Yɛn bï paan ë Jothep dap nap wei ëbɛ̈n cït man ë mac. Ku Bethel abï ciët kë cï ɣɔ̈k many cïn raan lëu en në liiu.

⁷ Amawoou në week. Wek kɔc ee yic tɔ ye lueth, ku takï piathëpiɔ̈u tɔ cïn naamden!

⁸ Nhialic yen aa cak kuɛl kedhie, kuɛl lɔyok, ku ciëër ë run ë piny. Ee wakɔ̈u puk tɔ ye aköl, ku puk aköl ke ye wakɔ̈u. Ee pïïu ke wɛ̈ɛ̈r cɔɔl, ku piɛɛk keek biic në tiɔp nɔm. Rinke acɔl ke Bɛ̈nydït.

⁹ Ee riääk tɔ bɔ̈ tëde kɔc ril, ku riëëk ɣään ril ke tɔŋ.

¹⁰ Wek ee kɔc ee week jɔ̈ɔ̈ny tëde gööny maan, ku kɔc ee yic lueel ayak keek guɛɛny wei.

¹¹ Ku wek ee kɔc kuanynyïïn yɔŋ, ku ruömkï agamɔden. Ku ënɔɔnë, na cakaa nɔn cä wek ɣöötdït ajämjäm yïk në kuur, wek cï bï rëër thïn. Ku na cakaa nɔn cä wek duum lɛ̈k ke tiim ke enap com, wek cïï mɔ̈nden bï dek.

¹² Në biäk ŋiɛc Ɛn karɛckuön juëc cäk looi, ayï awɛ̈ɛ̈c tuc thook cäk keek wuööc. Wek ee kɔc piɛth wɛ̈l nïïm ater, ku nämkï kumthok, ku pɛ̈nkï kɔc kuanynyïïn yicden tëde gööny.

¹³ Yen aye raan pelnɔm thok mim ke cïn kë lueel në akööl ke kërac!

¹⁴ Pälkï luɔi de kërac, ku yak këpiɛth giit në luɔi, ke wek bï pïïr. Yen abïï Bɛ̈nydït Nhialic Awärjäŋ jɔ tɔ̈u ke week cït man ya wek en lueel.

¹⁵ Nhiaarkï këpiɛth, ku mankï kërac. Ku yak gööny ŋiëc guiir tëde gööny. Tɛk däŋ bï Bɛ̈nydït Nhialic Awärjäŋ piɔ̈u kok kekë kɔc lik cï döŋ baai de Jothep.

¹⁶ Go Bɛ̈nydït Nhialic Awärjäŋ lueel an, “Abï dɛ dhiëëu ku arɔ̈ɔ̈l dït ë kuɛɛr ke pänydït yiic. Ayï kɔc nu në duum yiic, abï keek cɔɔl bïk kɔc cï thou bɛ̈n dhiëëu, mɛ̈tkï në kɔc cï riɔp bïk bɛ̈n dhiau.

¹⁷ Ku anuɔɔn abï lɔ pat ë duum yiic kedhie, në luɔi cän bɛ̈n bä week bɛ̈n luöi këtuc. Yen kë cïï Bɛ̈nydït lueel ka.

¹⁸ Amawoou në week, wek kɔc kɔɔr bɛ̈n de kööl ë Bɛ̈nydït. Eeŋö kɔ̈ɔ̈rkï kööl ë Bɛ̈nydït? Ku abï ya kööl col ë cut tëde week, ke cie kööl ɣer.

¹⁹ Abï rac, ka abï ciët raan ë kɔt në köör, ku le piny rɔ̈m kekë köörayuääl. Ku cït raan ë lɔ ɣönde, na wën aa kɛn yeciin në päny, ke kɛc ë kërac.

²⁰ Kööl ë Bɛ̈nydït abï cuɔl acï bï ɣɛɛr, abï ya kööl ë jiɛthëpiɔ̈u, kööl cïnic tëthiin ɣer liŋliŋ.

²¹ Aye Bɛ̈nydït lueel an, “Yɛn man kueer ya wek dhuëŋ ke Nhialic looi. Acä kɔɔr bä amɛɛtkun tïŋ taitai.

²² Na ë we cak A gäm miɔ̈c ë rap, ayï miɔ̈c ye nyop ëbɛ̈n, acä keek bï gam. Ku na ë we cak A gäm miɔ̈c de miöör cäk cuaai ke ke ye miɔ̈c ke mät, acä keek bï nööm.

²³ Lak ya, në awuɔɔu ë diɛtkun, ayï thoomkun, acä keek kɔɔr bä ke piŋ.

²⁴ Takï ŋiëc guiëër de löŋ tɔ wat cït man ë pïïu, ku takï piathëpiɔ̈u thiɔɔr cït man ë kiir.

²⁵ “De miɔ̈c de kë näk ë cäk gäm Ɛn, baai de Yithriɛl në run yiic kathiërŋuan, run ɣɔn caath Ɛn week në jɔ̈ɔ̈ric?

²⁶ Ku ënɔɔnë, në biäk cä wek yiëth lam, yanh cɔl Thakuth melikdun, ku Kaiwan yanhduön ë kuel, kek ee yiëthkuön cäk guɛ̈ŋ röt, abäk keek ɣääc wadäŋ,

²⁷ të la Yɛn week tɔ pec, leerë week paan tɔ̈u në Damathko kɔ̈u ciëën.” Yen kë cïï Bɛ̈nydït lueel ka, ku rinke acɔl keek Nhialic Awärjäŋ.