Amoth 4 - JAM DE NHIALIC 2011

¹ Piɛŋkï ë kënë, wek diäär ke Thamaria. Wek ë cuai cït ɣɔ̈k ke Bacan cï ŋiëc nyuääth. Wek ee kɔc kuanynyïïn looi arac, ku yaŋkï kɔc cïn nïïm käŋ. Ku yak röörkun yɔ̈ɔ̈k an, yïnkï we mɔ̈n dɛkkï.

² Bɛ̈nydït Awärjäŋ ë kuëëŋ në ɣɛɛr ë yicde, ku lueel an, “Akööl abïkï, akööl bïï ë week thɛ̈l bei, ka wek bï ciët rec nu në alɔbithɔɔ thook.

³ Ka wek bïï thɛ̈l bei tëthiɔ̈k ë kal kɔ̈u raantök, ku cuɛtë week biic ya në biäk të lɔ rut.

Yithriɛl Areec Wëët

⁴ Go Bɛ̈nydït Awärjäŋ lueel an, “Kɔc ke Yithriɛl lak Bethel wun ɣeric, ku luɔikï kërac, ku lakï Gilgal ku bɛkï kërac ŋuak nyin në luɔi. Wek ee miɔ̈cdun bɛ̈ɛ̈i aköölnyïïn kedhie, ku bɛ̈ɛ̈ikï töŋ thiëër ë käŋ ë ceŋ në kööl ye akööl diäk.

⁵ Wek ee miɔ̈c lɛɛc wek Nhialic, ku miɔ̈c de thieithieei gam, ku gamkï miɔ̈cduön däŋ cäk tak lɛɛc wek röt! Cie kë nhiaarkï bäk looi ka wek Yithriɛl? Kë cïï Bɛ̈nydït lueel ka.

⁶ “Ee Yɛn ë tɔ week nɛ̈k ë cɔk në wuöt yiic, ku ta week cïn rap në bɛ̈i yiic kedhie. Aa luɔi aya ke we bï röt pɔ̈k ɛn. Ku wek kën röt bɛ̈n pɔ̈k ɛn.

⁷ Rɛɛpkun acä keek pɛ̈n deŋ ke ke cïï bï piɔɔk, ku yɛn ee deŋ tɔ tueny wun tök, ku pɛ̈n wun däŋë. Ku ta deŋ tueny dom tök, ku ta dɛ̈ɛ̈k dom däŋë go yom wei.

⁸ Ku kɔc cï yiɛɛl wei acïk thiëi ë wuöt yiic ke ke kɔɔr pïïu, ku acïn pïïu cïk yök. Ku wek ŋoot ke wek cïï röt puk Ɛn. Kë cïï Bɛ̈nydït lueel ka.

⁹ “Wek cä tuöc käm juëc riäk rɛɛpkun, ku yiën week kɔyɔm riëëk duumkuön ke tiim ëbɛ̈n, tiim ke enap, ayï tiim ke olip. Ku wek ŋoot ke wek kën röt pɔ̈k Ɛn. Kë cïï Bɛ̈nydït lueel ka.

¹⁰ “Wek cä luöi riääkdït, cït riääk ɣɔn cä kɔn luöi kɔc ke Rip. Yɛn ë wɛ̈ɛ̈t dhuökkun tɔ näk tɔŋ, ku jöŋgöörkun abä ke peec ë tɔŋ. Ku ta we tɔ nɛ̈k aŋuäc de kɔc cï thou ë pɛɛnykun yiic. Ku wek ŋoot ke we kën röt pɔ̈k Ɛn. Kë cïï Bɛ̈nydït lueel ka.

¹¹ “Yɛn ë kɔckuön kɔ̈k riɔ̈ɔ̈k cït man wään riääk Ɛn Thɔdom kekë Gomoora. Kɔc cï pïïr ë we yiic, wek cït luny ë tim ë göpë bei mɛɛc. Ku wek ŋoot ke we kën röt pɔ̈k Ɛn.” Kë cïï Bɛ̈nydït lueel ka.

¹² “Në biäk de ee kakë, kë bä luöi week kï, wek kɔc ke Yithriɛl. Ku në biäk bän week luöi këtuc, guiɛɛrkï röt bäk yök në Nhialicdun.

¹³ Nhialic Ee Yen Raan ë cak kur ku ciɛk yom. Acï täŋde tɔ ŋic ë kɔc, ee wakɔ̈u puk ke ye aköl. Ee cath në ɣään thöny ke pinynɔm ëbɛ̈n. Ku rinke acɔl ke Bɛ̈nydït, Nhialic Awärjäŋ!