Amoth 3 - JAM DE NHIALIC 2011

¹ Piɛŋkï kë cïï Bɛ̈nydït lueel në biäkdun wek kɔc ke Yithriɛl, kɔc wään bïï keek bei paan ë Rip kedhie. Acï lueel an,

² “Ee wek cä lɔc wapäc në juöör ke pinynɔm yiic kedhie, ku tiɛɛt week. Yen kë tɔ we loi kërac ka arëët. Ka wek bä luöi këtuc në biäk de karɛc juëc cäk looi.

Luɔi de Tiët ë Nhialic

³ Duëër kɔc kaarou cath kueer ëtök, të kën kek mat nɔn bï kek cath ëtök?

⁴ Duëër köör ŋäär baaŋ në butic, ke cïn lɛ̈n cï dɔm? Ku dhuŋ ë köör duëër kïïu baaŋ ɣönde, të cïn kë cuet?

⁵ Ku duëër dit lööny piny ë wïn ë dɛ̈pic baaŋ, të kënë ye deep? Ku wïn ë dɛ̈p duëër yeyic ruɔɔt baaŋ, ke cïn kë cï ye jak?

⁶ Të cïï kaaŋ de tɔŋ kooth, cïï kɔc ke pänydït ee päu? Duëër pänydït riääk, ke cie Bɛ̈nydït Yen ee yen bɛ̈ɛ̈i?

⁷ Bɛ̈nydït Nhialic acïï këdäŋ ee guɔ looi, ke kën tït ke Nhialic awuutke kɔn nyuöth kë cï kiëët.

⁸ Të cïï köör ŋäär eeŋa cïï duëër riɔ̈ɔ̈c? Të cïï Bɛ̈nydït Nhialic jam, eeŋa duëër mim ke cïï jamde lueel?

Riääk de Thamaria

⁹ Lɛ̈kë kënë kɔc rëër në ɣööt ke bäny ke Acedɔd yiic, kekë bäny ke Rip, an, “Bäkï në kur ke Thamaria nïïm, bäk tiëŋkï awënwën loi rɔt, ku yaaŋ yɔŋë ë kɔc röt.

¹⁰ Aye Bɛ̈nydït lueel an, “Kek ee kɔckë akuckï luɔi de këpiɛth. Acïk ɣöötdïtken thiɔ̈ɔ̈ŋ në kak ë peckï në riɛl tëde kɔc.

¹¹ Ku be ë Bɛ̈nydït Nhialic lueel an, “Pinydun abïï ë raan ater peec, ku abï ɣöötdïtkun riäär piny, ku yiɛk keyiic në kapiɛth tɔ̈u thïn kedhie.

¹² Aye Bɛ̈nydït lueel an, “Kɔc ke Yithriɛl tɔ̈u në Thamaria, abïk cït man ye raan tit thök thïïm cï döŋ ë köör thok lɔ̈ɔ̈k yök piny, nɔn ë yök yom kaarou ke cök, ku nɔn ee yen thïm de biäk de yïny de thɔ̈k. Kɔc bï poth në keyiic abïk lïk, kek ee kɔc rɛ̈ɛ̈r në ageenken nïïm ënɔɔnë në Thamaria. Ayï adhuëëŋkɛn rɛ̈ɛ̈r në thöckɛn piɛth nïïm në Thamaria.

¹³ Go Bɛ̈nydït Nhialic Awärjäŋ lueel an, “Piɛŋkï, ku bäk aa cäätɔɔ në kë luɛɛl në biäk de dhiën ë Jakop.

¹⁴ Kööl bän kɔc ke Yithriɛl luöi këtuc, në biäk de awänydɛn cïk looi. Yɛn bï yïk ke Bethel riɔ̈ɔ̈k, ku dhuɔŋ tuŋ ke yïk kaŋuan bei në yenɔm kedhie.

¹⁵ Yɛn bï ɣöötkɛn ë aruöt, ku ɣöötkɛn amäi dhuɔŋ piny. Ɣööt cïk jäm në tuŋ ke akɔ̈ɔ̈n, abä keek jäp piny. Ku ɣöötdïtken abïï keek riɔ̈ɔ̈k. Yen kë cïï Bɛ̈nydït lueel ka.