Amoth 2 - JAM DE NHIALIC 2011

Mowap

¹ Aye Bɛ̈nydït lueel an, “Kɔc ke Mowap abä keek luöi këtuc, në biäk de karɛc juëc cïk keek looi. Arëk abïk yom ke bɛ̈ny de Edom nyop abïk aa ŋeth.

² Në biäk de ee kënë, yɛn bï mac tuɔɔc Mowap le nyuɔp piny, ku nyop ɣään riilke piny në Kerioth. Ku kɔc ke Mowap abï keek tiaam, ku näk keek në awuɔɔu de tɔŋ, ku lɔ rem de tɔŋ ke ke kïïu, ku lɔ kaaŋ ke koth.

³ Yɛn bï melik de Mowap nɔ̈k në keyiic kekë bänykɛn tɔ̈u në yecök kedhie paanden. Yen kë cïï Bɛ̈nydït lueel ka.”

Juda

⁴ Aye Bɛ̈nydït lueel an, “Kɔc ke Juda abä keek luöi këtuc, në biäk de karɛc juëc cïk looi. Arëk abïk wëët de Bɛ̈nydït rɛɛc piŋ, ku cïkï lööŋke muk aya. Acïï yiëth ɣäär yiic keek mɔ̈ɔ̈r, yiëth ɣɔn kɔn ë kuarken keek kuany cök.

⁵ Yɛn bï mac tuɔɔc Juda bï lɔ nyuɔp piny, ku nyuɔp ɣään riil ke Jeruthalem piny.

Nhialic Alui Yithriɛl Këtuc

⁶ Aye Bɛ̈nydït lueel an, “Kɔc ke Yithriɛl abä keek luöi këtuc, në biäk de karɛc juëc cïk looi. Acïk kɔc piɛthpiɔ̈ɔ̈th ɣaac në atek, ku ɣɔckï kɔc kuanynyïïn në war ke cök ke raantök.

⁷ Ayek cath në kɔc kuanynyïïn kɔ̈ɔ̈th ku kɔc cïï ril cït ka cath piny. Ku yek kɔc kuanynyïïn jäp wei kueer. Meth kekë wun ayek tɔ̈c në tiiŋ lïm töŋë, ke wëërkï, ku riäkkï rinkiën ɣeriic.

⁸ Ku të ye kek lɔ tɔ̈c në yïk kɔ̈ɔ̈th, ŋɛk ee rɔt thiëth lupɔɔ ë peec tëde kɔc kuanynyïïn, lupɔɔ ke kɔc känykï. Ku dëkkï në mɔ̈u ɣön ë Nhialicden, mɔ̈n ë nömkï tëde kɔc känykï.

⁹ “Yɛn aa riäk kɔc ke Amor ɣɔn në wenïïm tueŋ në këdun, na cakaa nɔn wään bɛ̈ɛ̈r kek cït tiim ke thidar, ku rilkï cït tiim ke ɣok. Acä keek bɛ̈n riɔ̈ɔ̈k taitai kedhie, abïï ciën tök.

¹⁰ Ee yɛn ë bïï week bei paan ë Rip, ku caath week në jɔ̈ɔ̈ric në run kathiërŋuan 40. Ku gäm week piny de kɔc ke Amor, ke ye këdun.

¹¹ Yɛn cï wɛ̈ɛ̈tkun kɔ̈k tɔ ye tït ke Nhialic, ku ta kɔ̈k ee ayuul ke Nhialic cï kuëëŋ ku gëmkï röt ɛn. Kë lɛ̈k week cie yic, wek kɔc ke Yithriɛl? Kë cïï Bɛ̈nydït lueel ka.

¹² Guɔkï ayuul cï röt gäm ɛn bɛ̈n lɔ̈ɔ̈k tɔ dek mɔ̈u, ku pɛ̈nkï tïtkï cäär cɛɛr kek käŋ.

¹³ Ku ënɔɔnë, wek bä miɛn piny, ka wek bï teer cït man ë jöŋgör mit abël cï thiɔ̈ɔ̈ŋ në rap.

¹⁴ Ku raan ŋic riŋ acï bï ban, ku kɔc ril, riɛlden acï bï tïc. Ayï jööt ke tɔŋ acïkï röt bï lëu në kuny aya.

¹⁵ Ayï raan muk dhaŋ, acïï tɔŋ bï lëu, ku raan riŋ në jöŋgör acïï yiɛnhde bï lëu në kuny.

¹⁶ Ku në aköölkë yiic, kɔc ŋɛny ril ke tɔŋ, abïk kat ku nyiëëŋkï tɔɔŋken piny. Kë cïï Bɛ̈nydït lueel ka.