Luɔi 9 - JAM DE NHIALIC 2011

Gäm de Paulo

¹ Ku Thaulo, aŋoot ke bïï wɛ̈i bei ë yethok wɛ̈i wɛɛi yen kɔcpiööcë Bɛ̈nydït an, bï ke kuur ë näk, go lɔ të nu bɛ̈nydïït ë kake Nhialic,

² le ku kɔɔr awereek tëde yen awereek bï gäär kɔc ke ɣööt ke Nhialic ë Damathko an, të de yen kɔc cï yök kɔc cath ee Kueerë, nɔn ee kek röör, ku nɔn ee kek diäär an, bï ke bɛ̈ɛ̈i Jeruthalem, ke ke mac.

³ Na wën, ke jɔ keny, ku ɣet tëthiɔ̈k ke Damathko: na wën, kë këɣer dap tuöl ëthiäu, ke bɔ̈ nhial, go piny riaau ë yelɔ̈ɔ̈m.

⁴ Go wïïk, ku piŋ röl yöök en an, “Thaulo, Thaulo, eeŋö yɔŋ yïn ɛn?”

⁵ Go thiëëc an, “Ee yïn ŋa, Bɛ̈nydït?” Go Bɛ̈nydït lueel an, “Ee Yɛn Yecu raan yɔŋë: atök të wec yïn wiɛth thook.”

⁶ Go lath, guöp ku pɛ̈u piɔ̈u, go thiëëc an, “Bɛ̈nydït, eeŋö kɔɔr kë bä looi?” Go Bɛ̈nydït lueel an, “Jɔt rɔt, lɔ pänydït, yïn bï lɛ̈k kë bä looi.”

⁷ Go kɔc cath në yen gokï kɔ̈ɔ̈c, acïk lɔ lik, ke ke piŋ röl, ku acïn raan cïk tïŋ.

⁸ Na wën, ke Thaulo jɔt rɔt piny, ku liep enyin, ku cïï piny woi, agokï dɔm cin, ku thelkï, leerkï Damathko.

⁹ Ku jɔ tɔ̈u ë nïn kadiäk ke cïï piny ee tïŋ, ku cïï cäm ku cïï dëk.

¹⁰ Ku ade raanpiööcë Damathko, cɔl Anania, na wën, aacï Bɛ̈nydït yɔ̈ɔ̈k, ke ee nyuöth an, “Anania!” Go gam an, “Ya kï, Bɛ̈nydït.”

¹¹ Go Bɛ̈nydït lueel an, “Jɔt rɔt, lɔ kueer cɔl Lɔcit, lɔ ɣön ë Judath lɔ luɔpë raan cɔl Thaulo, raan ë Tartho, tïŋ aläŋ,

¹² ku acï raan tïŋ ke ee nyuöth, raan cɔl Anania abɔ̈ ɣöt, bï ku thɛny ecin ë yenɔm, ke bï bɛ yïn.”

¹³ Go Anania bɛ̈ɛ̈r, an, “Bɛ̈nydït, këde raanë acä piŋ tëde kɔc juëc, në karɛc juëc cï luöi kɔckuön ɣerpiɔ̈ɔ̈th ë Jeruthalem.

¹⁴ Ku acath ke riɛl ee tënë tëde bänydït ke ka Nhialic, bï kɔc bɛ̈n mac kedhie kɔc ee rinku cɔɔl.”

¹⁵ Go Bɛ̈nydït yɔ̈ɔ̈k an, “Lɔɔr, raanë ee raandiën cä lɔc, bï rinkï lɛɛr ë Juöör nïïm, ku meliik nïïm, ku kɔc ke Yithriɛl nïïm.

¹⁶ Ku abä nyuöth kajuëc bï dhil guum në baŋ de rinkï.”

¹⁷ Go Anania jäl, le ɣöt, na wën, ke thɛny ecin ë yenɔm, ku lueel an, “Thaulo mɛnhkäi, yɛn aa tooc Bɛ̈nydït Yecu, raan ë tiëc tëde yïn kueer wään bï yïn eenë, yen aa toc ɛn, ke yï bï piny bɛ tïŋ, ku bä thiäŋ në Wëidït ɣer.”

¹⁸ Na wën, ee tëthiinë, ke käŋ ë ke jɔ lööny piny ë yenyin kacït kuɛc, ago bɛ yïn, ago rɔt jɔt, ku baptith,

¹⁹ na wën, aacï këcam thiëëp, ke jɔ riɛl. Go rëër Damathko ee aköölkë kekë kɔcpiööcë.

Thaulo Awɛ̈ɛ̈t ë Damathko

²⁰ Go jam dap gɔl ë ɣööt ke Nhialic yiic, aguiir Yecu an, ee Wën ë Nhialic.

²¹ Go kɔc piŋ jamde agokï gäi kedhie, ku thiëckï röt an, “Kënë cie yen ee raan wään ee kɔc yɔŋ, kɔc ee rinkë cɔɔl ë Jeruthalem, ku bï ee tënë, luɔi bï en keek lɛɛr ë bänydït ke ka ke Nhialic nïïm ke ke mac?”

²² Ku jɔ Thaulo rɔt ŋuak ë riɛl, ku ye Judai rɛ̈ɛ̈r ë Damathko guut ë löŋ, ke nyuuth keek ëgɔk, nɔn ee Yecu yen ee Kërtho guöp.

²³ Na wën, aacï nïn juëc lɛɛr, ke ciëmë Judai yai an, bïk nɔ̈k:

²⁴ ku yandɛn cïk cam acïï Thaulo ŋic. Gokï kɛ̈l aa tiit thook aköl ku wɛ̈ɛ̈rwakɔ̈u, luɔi bï kek e nɔ̈k.

²⁵ Na wën, ke nööm kɔcpiööcë wakɔ̈u, ku luɛɛikï piny ë päny kɔ̈u ë diönyic.

Thaulo anu ë Jeruthalem

²⁶ Na wën, aacï Thaulo bɛ̈n Jeruthalem, ke them luɔi bï en mat kekë kɔcpiööcë, agokï riɔ̈ɔ̈c ë yen kedhie, akënkï gam nɔn ee yen raanpiööcë ëyic.

²⁷ Go Baranaba Thaulo nööm, leer tëde tuuc, ku jɔ keek guiëër në tïŋ cï en Bɛ̈nydït tïŋ kueer, ago jam në yen, ku luɔi cï en kɔc guiëër ë Damathko në rin ke Yecu ke ye ŋeeny.

²⁸ Go tɔ̈u kekë keek ë Jeruthalem, ke ye lɔ biic ku bï,

²⁹ ku ye kɔc guiëër në rin ke Bɛ̈nydït Yecu ke ye ŋeeny, go wël aa tɛɛr kekë Judai ëbɔ̈ paan ë Girikii, ku adekï piɔ̈ɔ̈th luɔi nɛ̈k kek en.

³⁰ Na wën, aacï wäthii e piŋ, ke jɔtkï leerkï Kaitharia, gokï tɔ lɔ Tartho.

³¹ Go ɣööt ke Nhialic jɔ rëër ke ke lɔ dïu ë Juda ëbɛ̈n ku Galili ku Thamaria, gokï jɔ riɛl ë gäm, ku yek cath ë riëëu de Bɛ̈nydït, ku në muŋdepiɔ̈u de Wëidït ɣer, agokï kenyïïn ŋuak.

Petero anu ë Luda ku Jopa

³² Na wën, ke Petero ciɛɛth baai yic ëbɛ̈n, ku jɔ ɣet tënu kɔc ɣerpiɔ̈ɔ̈th ceŋ Luda aya.

³³ Ku yök mony tök ëtɛ̈ɛ̈n, cɔl Ayina, mony ee dhɔt piny në agen nɔm ë run aa bɛ̈t, ke ye aduany.

³⁴ Go Petero yɔ̈ɔ̈k an, “Ayina, Yecu Kërtho atɔ yïn dem: jɔt rɔt, loi agendu.” Go rɔt jɔt ënɔnthiinë.

³⁵ Na wën, ke tïŋ kɔc ceŋ Luda ëbɛ̈n ayï kɔc ceŋ Caron, ku jɔkï kepiɔ̈ɔ̈th wɛ̈l Bɛ̈nydït.

³⁶ Ku ade raanpiööcë ë Jopa, tiiŋ cɔl Tabitha, yen aye Doruka ë thoŋ ë Girikii (ku cɔl ŋɛɛr në thoŋda): tiiŋë ee tiiŋ piɛth cin, ee cool ë loi luɔi piɛth, ku ye kɔc kuanynyïïn miɔɔc.

³⁷ Na wën, ë aköölkë, ke jɔ thöök, en tiiŋë, ku thou, gokï waak guöp, ku tɛ̈ɛ̈ukï ɣön nu nhial.

³⁸ Të cï kɔcpiööcë e piŋ nɔn nu Petero ë Luda, (Jopa ee paan thiääk ke Luda), ke ke jɔ kɔc tooc kaarou, lek lɔ̈ŋ an, “Dap bɛ̈n tëde wook, cak, an, de kë gäu yïn, ke nyääŋë piny.”

³⁹ Go Petero rɔt jɔt ku le ke keek. Na wën, aacï bɛ̈n, ke jɔkï lɛɛr ɣöt ɣön nu nhial: ku kääc diäär ëbɛ̈n ë yelɔ̈ɔ̈m diëër cïn nïïm röör, ke ke dhiau, anyuthkï yen aluluut ku lupɔɔ kɔ̈k kak ë kɔɔc Doruka, wään rëër en ke keek.

⁴⁰ Go Petero ke tɔ lɔ biic kedhie, go emiɔl tuk ku lɛ̈ŋ, na wën, ke wɛ̈l enɔm raan cï thou, ku yöök an, “Tabitha, jɔt rɔt!” Go enyin liep: na wën, aacï Petero tïŋ, ke jɔt rɔt rëër.

⁴¹ Go dɔm cin, ku jɔt nhial, go kɔc ɣerpiɔ̈ɔ̈th cɔɔl kekë diëër cïn nïïm röör, ku jɔ ke yiɛ̈n raan ke pïïr.

⁴² Go jɔ ŋic ë Jopa ëbɛ̈n, go kɔc juëc agokï Bɛ̈nydït gam.

⁴³ Na wën, ke rɛ̈ɛ̈r ë Jopa ë nïn juëc ɣön ë Thimon, atën ee biök coŋ.