Luɔi 8 - JAM DE NHIALIC 2011

¹ Ku gam Thaulo thonde. Na wën, ee aköölkë, ke yöŋ dït cak rɔt tëde ɣön ë Nhialic nu ë Jeruthalem, gokï thiëi roor piny ë Judaya ëbɛ̈n kekë Thamaria, keek kedhie, ee tuuc kapäc kek ë dɔ̈ŋ.

Paulo Ayɔŋ ɣön ë Nhialic

² Go kɔc riëëu Nhialic gokï Thepano jɔt lek thiɔ̈k, ku dhiëëukï ë dhiën dït.

³ Ku Thaulo yen aaye ɣön ë Nhialic riɔ̈ɔ̈k, ee lɔ ë ɣööt yiic kedhie, le ku dɔm röör ku diäär, mɛc keek ë aloocic.

Wëlpiɛth Awëëtë Keek ë Thamaria

⁴ Na wën, ke kɔc cï thiëi roor ke ke lɔ ë baai yic ëbɛ̈n, lek kɔc guiëër jam.

⁵ Ku lɔ Pilip pänydïït cɔl Thamaria, le kɔc guiëër Kërtho.

⁶ Na wën, ke kuut ë kɔc ë ke gam ka lueel Pilip në piɔ̈n tök, wään piŋ kek göök cï looi ku tïŋkï keek.

⁷ Jɔɔk rac acïk bɛ̈n bei ë kɔc juëc gup, kɔc cïk dɔm, ke ke cöt ë röl dït, ku dem kɔc juëc cï duany, ayï ŋöl.

⁸ Go miɛtëpiɔ̈u dït ë pänydïïtë.

⁹ Ku ade raan cɔl Thimon, raan wään ë kɔc thuëëth ë pänydïïtë guöp, ee kɔc de Thamaria tɔ gäi arëët, ku ye rɔt tɔ ye gök dïït ë raan,

¹⁰ aake ye jamde piŋ kedhie, kɔc kor aɣɔ̈l röördït, aa yek lueel an, Raanë acath ke riɛl dïït ë Nhialic.

¹¹ Aake ye këde piŋ, luɔi cï en keek tɔ gäi në thuɛ̈th ë yen thuëth ëcaŋɣɔn.

¹² Na wën, aa cïk jam de Pilip gam, wään guïïr en ka ke ciɛɛŋ de Nhialic ku rin ke Yecu Kërtho, ke ke baptith, röör ayï diäär.

¹³ Go Thimon guöp gam ayadäŋ: na wën, aacï baptith, ke ye cool ë rɛ̈ɛ̈r kekë Pilip, ku gɛ̈i, wën cï en göök cï looi tïŋ ayï kake gäi.

¹⁴ Na wën, aacï tuuc nu Jeruthalem e piŋ nɔn cï Thamaria jam ë Nhialic gam, gokï Petero tuöc keek kekë Jɔn:

¹⁵ Të cï kek bɛ̈n, ke ke läŋ Nhialic në biäkden an, bïk Wëidït ɣer nööm:

¹⁶ Wëidït aake ŋoot ke ke kën bɛ̈n ë raan tök guöp ë keyiic: acï ke baptith tei në rin ke Bɛ̈nydït Yecu.

¹⁷ Ku jɔkï kecin thany ë kegup, agokï Wëidït ɣer nööm.

¹⁸ Na wën, aacï Thimon e tïŋ nɔn cï kɔc miɔɔc në Wëidït në thäny cï tuuc kecin thany ë kegup, ke jɔ an, gëm keek wëu an:

¹⁹ “Gämkï yɛn ee riɛlë aya, ke raan bän a cin thany ë yeguöp ke bï Wëidït ɣer nööm.”

²⁰ Go Petero yɔ̈ɔ̈k an, “Ë wëuku ë ke mär ë yïn ëtök, luɔi cï yïn e lueel e yïpiɔ̈u nɔn duëërë miɔ̈c ë Nhialic ɣɔɔc ë wëu!

²¹ Jamë yïn liu thïn ëliŋliŋ: piɔ̈ndu acïï piɛth ë Nhialic nyin.

²² Yen puk yïn yïpiɔ̈u në kërɛɛcduön cï wööcë, ku jɔ Bɛ̈nydït lɔ̈ŋ, ke kë cï tak ë yïpiɔ̈u ke bï dɛ të bï e yiɛ̈n päl yïn.

²³ Yïn wɔi ënɔɔnë, yïn tɔ̈u ke yï kec piɔ̈u cït man ë keth, ku cïï kërac duut aril.”

²⁴ Go Thimon bɛ̈ɛ̈r an, “Läŋkï Bɛ̈nydït në këdï, ke bï ciën kë bï bɛ̈n ë yaguöp në ka wën cäk lueel.”

²⁵ Na wën, aa cïk guiëër guïïr kek kɔc jam ë Nhialic thöl, ke ke jɔ kenïïm dhuöny Jeruthalem, ku guïïrkï wëlpiɛth bɛ̈i ke Thamaria bɛ̈i juëc.

Pilip ku Bɛ̈ny de Ethiopia

²⁶ Na wën, ke tunynhial tuny ë Bɛ̈nydït jɔ Pilip yɔ̈ɔ̈k an, “Jɔt rɔt, lɔ të lɔ wöuwic, të nu kueer jël ë Jeruthalem le Gadha.” Kueer tëk ë jɔ̈ɔ̈ric.

²⁷ Go rɔt jɔt ku jël: ku ade mony ë Ethiopia, mony cï roc, ku ye bɛ̈nydïït de naamdɛn dït ë Kandake cök, tiiŋ melik de Ethiopia, ku nu monyë ë wëu nïïm kedhie, wëu ke tiiŋ melik, ku aacï bɛ̈n Jeruthalem bï bɛ̈n lam,

²⁸ ku dhuny enɔm ke rɛ̈ɛ̈r ë abëlde yic abël biic, ke kuen gäär ë tiët Yithaya yic.

²⁹ Na wën, ke Wëidït ë jɔ Pilip yɔ̈ɔ̈k an, “Lɔ tëthiɔ̈k, mätë rɔt kɔc ke abëlë yic.”

³⁰ Go Pilip kat le të nu yen, go piŋ ke kuen këcïgɔ̈ɔ̈r ë tiët Yithaya. Go thiëëc an, “Ŋic thar ë ke kuen?”

³¹ Go lueel an, “Duɛ̈ɛ̈r ŋic adï, të cïn en raan bï a bɛ̈n nyuööth?” Go Pilip lɔ̈ŋ an, bä nhial, nyuc ë yalɔ̈ɔ̈m.

³² Ku të wën kueen en këcïgɔ̈ɔ̈ric acï gɔ̈ɔ̈r alë an: “Acï thel cït man ë amäl le teem röl, Ku cït man ë nyɔɔŋ amääl lɔ lik ë raan nɔm raan tem nhïmke, Yen a miim en aya.”

³³ Në kuur cï e tɔ koor en acï löŋde kuöc guiir. Ku remde eeŋa bï ye lueel? Luɔi cï wëike nyaai ë piny nɔm.”

³⁴ Go mony cï roc Pilip yɔ̈ɔ̈k an, “Yïn thiëëc an, ë tiët luel jamë ë këde ŋa? Ee këde yen guöp, ku ye këde raan däŋ?”

³⁵ Na wën, ke Pilip jɔ yethok tueer, ku gɔl jam ë cöök awën, ago guiëër ka ke Yecu.

³⁶ Na wën, të ciɛth kek kueer, ke ke jɔ ɣet të nu pïïu: go mony cï roc lueel an, “Tïŋ, pïïu kï, eeŋö pën a baptith?”

³⁷ Go Pilip lueel an, “Të gam yïn ë yïpiɔ̈u ëbɛ̈n, ke yïn duëërë baptith.” Go bɛ̈ɛ̈r an, “Yɛn gam Yecu Kërtho nɔn ee yen Wën ë Nhialic.”

³⁸ Go abël biic tɔ kääc: gokï lɔ piny kaarou lekï ë pïïu yiic, yen Pilip kekë mony cï roc, go baptith.

³⁹ Na wën, aa cïk bɛ̈n bei ë pïïu yiic, ke Wëi ke Bɛ̈nydït ke ke gɔp Pilip wei, ku akënë mony cï roc bɛ tïŋ, go kueerde dɔmic ku mit piɔ̈u.

⁴⁰ Go Pilip rɔt a yök Adhoto: go tëëk ë wuötiic kedhie, ke guiir wëlpiɛth, aɣet të cï en bɛ̈n Kaitharia.