Luɔi 6 - JAM DE NHIALIC 2011

Kɔc ee Kɔc Kuɔny Kadhorou

¹ Na ɣɔn ë aköölkë, të cï kuën ë kɔcpiööcë rɔt ŋuak ke Judai ë bɔ̈ paan ë Girikii ke ke cak dhiëëu në kɔc ke Ɣeberuu an, cï diëërken nyɔ̈ŋ diëër cïn nïïm röör, të tekë wëu ë aköölnyïïn kedhie.

² Na wën, ke kɔc kathiëër ku rou ke ke cɔl kut ë kɔc cï gam, ku luelkï an, “Acïï piɛth ë luɔi bï wo jam ë Nhialic pɔ̈l, ku yok kacam tɛ̈k kɔc.

³ Na ënɔɔnë, wek mïthëkɔckuɔ, jakï röör kadhorou kɔɔr ë weyiic, röör cath ë rin piɛth ë kɔc yiic, ku cïk thiäŋ ë Wëidït ku pɛlënɔm, kɔc buk tääu ë luɔiyë nɔm.

⁴ Ku wook, wo bï ya ceŋ ë wo läŋ, ku guiirku jam.”

⁵ Ku löŋë acï kut ë kɔc tɔ mit piɔ̈ɔ̈th kedhie, agokï Thepano lɔc, raan ë gam arëët, ku cï thiäŋ ke Wëidït ɣer, ku Pilip, ku Porokoro, ku Nikanor, ku Thimon, ku Parmena, ku Nikola raan ë bɔ̈ Antiokia ku cï rɔt tɔ ye Judai.

⁶ Gokï ke tääu ë tuuc nïïm: na wën aa cïk lɔ̈ŋ, ke ke thɛny kecin ë kegup.

⁷ Go jam ë Nhialic piny kiët nɔm: go kuën ë kɔc piööcë go e nyin ŋuak aläl ë Jeruthalem, ayï rem dïït ë bäny ke ka ke Nhialic acïk gäm döt.

Döm de Thepano

⁸ Ku Thepano ee raan ee piɔ̈u adhuɛ̈ŋ arëët, ku ciɛth ke riɛldït, ku acï göök looi ë kɔc yiic ayï ka ye kɔc ke gäi.

⁹ Na wën, ke kɔc kɔ̈k ë ke jɔt röt, kɔc ke luaŋ ee kɔc guëër thïn luaŋ ë kɔc cɔl Libertinoi, ayï kɔc ke Kurene, ku kɔc ke Alekandaria, kekë kɔc ke Kilikia, ku Athia, ke ke jɔt röt, akɔɔrkï teer në Thepano.

¹⁰ Ku acï teer ke dhal, në pɛl pel en nɔm, ku në Wëi cath në yen, të jiɛɛm en.

¹¹ Agokï röör kɔ̈k riɔp, kɔc bï e lueel, an, “Raanë acuk piŋ ke lat Mothe, ayï Nhialic!”

¹² Agokï kɔc riir aläl ayï röördït, ayï kɔc ee löŋ gɔ̈ɔ̈r, agokï bäk, dɔmkï, ku thelkï leerkï ë löŋ nɔm.

¹³ Agokï cäätɔɔ aluɛth tɔ kääc nhial, kɔc bï e lueel an, “Raanë acïï jam ee pɔ̈l jam de lɛ̈ɛ̈t ee yen tëɣericë läät, ayï löŋ:

¹⁴ acuk piŋ ke lueel an, Yecu de Nadhareth, yen abï wunë riɔ̈ɔ̈k, ago ciɛɛŋ puk, ciɛɛŋ cï Mothe yiɛ̈n wook!”

¹⁵ Na wën, ke kɔc kedhie kɔc rɛ̈ɛ̈r ë löŋic, ke ke tom Thepano guöp, gokï tïŋ nyin, acït nyin tunynhial.