Luɔi 5 - JAM DE NHIALIC 2011

Anania ku Thapira

¹ Ku ade raan cɔl Anania, kekë Thapira tiiŋde, raan cï ka cath në yen ɣaac.

² Na wën, ke both biäk tök në wëu, ku ŋic tiiŋde aya, go biäk tök bɛ̈ɛ̈i, ku tɛ̈ɛ̈u piny ë tuuc cök.

³ Go Petero lueel an, “Anania, eeŋö cï Catan yï thiɔ̈ɔ̈ŋ piɔ̈u aya, bä Wëidït ɣer bɛ̈n tɔ̈ɔ̈r lueth, ku cï biäk tök both në wëu ke dom?

⁴ Wään ŋoot en ke kënë ɣaac, ë cie këdu? Ayï wään cï e ɣaac aya, ë cïï tɔ̈u ë yïcin yïtök? Eeŋö täkë kënë ë yïpiɔ̈u? Acie kɔc kek ë tɔ̈ɔ̈rë lueth, ee Nhialic!”

⁵ Na wën, aacï Anania wëlkë piŋ, ke wiëëk, jɔ guɔ thöök: ago riɔ̈ɔ̈c dït kɔc dɔm kedhie kɔc piŋ kake.

⁶ Go dhuök röt jɔt, ku dutkï ë lupɔ, gokï lɛɛr biic lek thiɔ̈k.

⁷ Na wën, të cït thaar kadiäk, ke tiiŋde bɔ̈ ɣöt, ke kuc kë cï looi.

⁸ Go Petero yɔ̈ɔ̈k an, “lɛ̈kë yɛn, cäk dom ɣaac ë wëu käklë?” Go lueel an, “Ɣɛɛ, wëu ayek lë.”

⁹ Go Petero yɔ̈ɔ̈k an, “Eeŋö aa wek wethook mat, bäk Wëi ke Bɛ̈nydït bɛ̈n them? Tïŋ, cök ke kɔc wën cï monydu lɔ thiɔ̈k, kek ka ɣöt thok, ku abïk yï lɛɛr biic aya!”

¹⁰ Na wën, ke wiëëk ë yecök ënɔnthiinë, jɔ guɔ thöök: go dhuök bɛ̈n ɣöt, ku yökkï acï thou, gokï jɔt, le thiɔ̈k ë monyde lɔ̈ɔ̈m.

¹¹ Go riɔ̈ɔ̈c dït ɣön ë Nhialic dɔm ëbɛ̈n, ku dɔm kɔc kedhie kɔc piŋ kakë.

Göök ku kake Gäi

¹² Ku göök juëc ku ka ye kɔc ke gäi acï ke looi ë tuuc cin ë kɔc yiic: go kɔc aa guëër ë piɔ̈n tök ë göl ë Tholomonic.

¹³ Ku në kɔc kɔ̈k yiic acïn raan cï ŋeeny bï mat kekë keek: aye ke leec ë kɔc lei.

¹⁴ Ku kɔc gam Bɛ̈nydït acïk röt ŋuak ë kuut dïït ë kɔc, röör ayï diäär.

¹⁵ Acakaa kɔc tök acï ke bɛ̈ɛ̈i bei, leerë ke ë kuɛɛr yiic, ku tɛ̈ɛ̈uwë keek në ageen nïïm ku thöc nïïm an, bï yiɛ̈n dɛ të le atïptïïp de Petero ë kɔc gup kɔc kɔ̈k ë keyiic, të tëëk en.

¹⁶ Ku kut dïït ë kɔc acïk bɛ̈n bei ë wuöt nu ë Jeruthalem këc aya, ke ke bïï kɔc tök ku kɔc cïï jɔɔk rac dɔm: agokï dem kedhie.

Tuuc Ayɔŋ Keek

¹⁷ Na wën, ke bɛ̈nydïït ë kake Nhialic ke jɔt rɔt, kekë kɔc ë tɔ̈u në yen kedhie (kek aye rem ë Thadokai), agokï piɔ̈ɔ̈th thiäŋ ë agɔ̈th,

¹⁸ agokï tuuc dɔm, ku tɛ̈ɛ̈ukï keek ɣön ee kɔc mac.

¹⁹ Na wën, ke tunynhial ë Bɛ̈nydït ke liep alooc thok wakɔ̈u, ku bïï keek biic, yöök keek, an,

²⁰ “Lakï, kääckï nhial ë Luaŋdïtic, ku guiëërkï kɔc në wël ke pïïrë kedhie.”

²¹ Na wën, aa cïk e piŋ, ke ke lɔ Luaŋdïtic ɣɔn amiäk të cï piny ruu, lek kɔc wɛ̈ɛ̈t. Go bɛ̈nydïït ë kake Nhialic bɛ̈n kekë kɔc ë tɔ̈u në yen, gokï kɔc ke löŋ caal tëtök, kekë röördït ke kɔc ke Yithriɛl kedhie, ku toockï kɔc aloocic bïk tuuc lɔ bɛ̈ɛ̈i.

²² Na wën, ke bäny ke rem ë ke bɔ̈, ku yökkï keek aliu aloocic, gokï kenïïm dhuny, ku luelkï,

²³ an, “Alooc acuk yök acï guur ë lɔ dekdek, ku yökku kɔc tit aloc ke ke kääc biic ɣöt thok: na wën, aa cuk e tueer, ke cïn raan yökku thïn!”

²⁴ Na wën, ke bɛ̈nydïït ë kake Nhialic, kekë bɛ̈ny ë Luaŋdït, ku bänydït kɔ̈k ë ka ke Nhialic, të cï kek kake piŋ, ke ke jɔ nïïm a cɔ̈ɔ̈t cɔ̈ɔ̈t në këden, në të bï jam nɔm pëk thïn.

²⁵ Na wën, ke raan bɔ̈, bï ku lueel an, “Tiëŋkï, kɔc wään cäk tääu ë aloocic akɛ̈ɛ̈ckï ë luaŋdït yic, ke ke wëët kɔc!”

²⁶ Go bɛ̈ny ë Luaŋdït lɔ kekë bäny ke rem, lek ku bïïkï ke bei, ku cïkï ke dɔm aril, acïk riɔ̈ɔ̈c ë kɔc, ke ke cïï bï biɔ̈ɔ̈k ë kɔi.

²⁷ Na wën, aa cïk ke bɛ̈ɛ̈i, ke ke tɛ̈ɛ̈ukï e kɔc nïïm kɔc ke löŋ, go bɛ̈nydïït ë kake Nhialic ke thiëëc,

²⁸ an, “Kënku week yɔ̈ɔ̈k arëët an, Duökï kɔc ee bɛ wɛ̈ɛ̈t ee rinkë? Ku tiëŋkï, we cï Jeruthalem thiɔ̈ɔ̈ŋ në wëëtdun, ku we de piɔ̈ɔ̈th luɔi bä wek riɛm ë raanë dɛɛr ë woyiëth!”

²⁹ Go Petero kekë tuuc kɔ̈k agokï bɛ̈ɛ̈r an, “Wo bï jam e Nhialic dhil piŋ awär ke lueel kɔc.

³⁰ Nhialic de kuarkuɔ acï Yecu jat nhial, raan cäk nɔ̈k, wään nɔ̈ɔ̈k wek en ë tim nɔm.

³¹ Yen acïï Nhialic jat nhial në ciin cuënyde, abï aa Bɛ̈nydït ku ye Konydewëi, bï Yithriɛl tɔ puk e piɔ̈u, ku tɔ karɛcken päl.

³² Ku wok ee cäätɔɔ në kakë, ayï Wëidït ɣer aya, Wëi cï Nhialic gäm kɔc ë kake piŋ.”

³³ Na wën, aa cïk kënë piŋ ke ke guutë piɔ̈ɔ̈th, gokï löŋ cam an, bïk ke nɔ̈k.

³⁴ Na wën, ke raan tök jɔt rɔt ë löŋic, ee raan ë Parithai, cɔl Gamaliɛl, raan ë kɔc wɛ̈ɛ̈t ë löŋ, arïïuwë kɔc kedhie, raanë acï rɔt jɔt, ku yöök keek an, bï tuuc tɔ lɔ biic tëthiinakäŋ.

³⁵ Go kɔc yɔ̈ɔ̈k an, “Week, wek röör ke Yithriɛl, tiëŋkï röt ë luɔi an, bäk luöi kɔckë.

³⁶ Raan cɔl Theuda ë rɔt jɔt wään, ago rɔt tɔ ye raan de naamde, ago kɔc mat ë yen, acït bot kaŋuan: ku acï nɔ̈k, ago rem piŋ këde agokï thiäi kedhie, abïk riäär.

³⁷ Na wën, ee raanë cök, ke Judath raan de Galili ke jɔt rɔt, ë akööl wään ë ke kɔc gɔ̈ɔ̈r rin, ku thel kɔc juëc ë yecök: ku jɔ thou aya, go kɔc piŋ këde agokï thiëi roor kedhie.

³⁸ Ku ënɔɔnë, wek yɔ̈ɔ̈k an, Mɛ̈ɛ̈ckï röt në kɔckë, pälkï keek: na löŋë ku luɔiyë, të ee yen këde kɔc tei, ka bï riääk:

³⁹ ku na ye këde Nhialic, acäkï bï lëu në tiëm, ke we cïï bï yök aye kɔc piɔ̈t ë Nhialic!”

⁴⁰ Gokï löŋde gam: na wën, aa cïk tuuc cɔɔl, ke ke duikï, ku thɔnkï keek aläl an, Duökï jam be ya guiir në rin ke Yecu: ku jɔkï ke pɔ̈l.

⁴¹ Gokï jäl ë löŋ nɔm, ke ke mit piɔ̈ɔ̈th nɔn cï ke tɔ ye kɔc röŋ në guöm de ayäär në baŋ de Rinke.

⁴² Ku aköölnyïïn kedhie, ë Luaŋdïtic ayï ɣööt yiic ëbɛ̈n, akënkï wëët aa pɔ̈l, ayï guiëër ë wëlpiɛth aya an, Yecu yen aye Kërtho, akënkï pɔ̈l.