Luɔi 4 - JAM DE NHIALIC 2011

Petero ku Jɔn në Luk nɔm

¹ Na wën, aŋootkï ke ke jam në kɔc, go bäny ke ka ke Nhialic ku bɛ̈ny ë rem de Luaŋdït ku Thadokai, bɛ̈n ë keyiic.

² Acïk piɔ̈ɔ̈th diu në luɔi wëët kek kɔc, ku në luɔi guïïr kek kɔc këde Yecu në jön bï kɔc röt jɔt ë kɔc cï thou yiic.

³ Gokï keek dɔm, ku tɛ̈ɛ̈ukï keek ë aloocic aruu piny: në luɔi cï akɔ̈l guɔ thëi.

⁴ Ku ade kɔc juëc cï gam kɔc wën cï jam piŋ, go kuën ë röör cï gam go ciët aguum kadhïc.

⁵ Na wën, aruu piny, ke bäny ke Judai, ku röördït ku kɔc ee löŋ gɔ̈ɔ̈r ë ke guëër Jeruthalem.

⁶ Ku nu Anath thïn, yen aye bɛ̈nydïït ë kake Nhialic, ku Kayapath, ku Jɔn, ku Alekandaro, ku kɔc ke dhiën ë bɛ̈nydït tueŋ kedhie.

⁷ Na wën, aa cïk ke tääu ë keyiic cil, ke ke thiëckï an, “Ee riɛlou, ku ye rinkou ë luɔɔi wek ee kënë?”

⁸ Go Petero thiäŋ në Wëidït ɣer, ku yöök keek an, “Week, we bäny ke kɔc, ku wek röördït ke Yithriɛl:

⁹ të thiëëc wek wook ëköölë në luɔi piɛth cuk looi ë raanë guöp raan cï duanyë an, cï tɔ piɔl guöp adï,

¹⁰ jakï kënë ŋic wedhie, ayï kɔc ke Yithriɛl, takï ke ŋic kedhie an, në rin ke Yecu Kërtho de Nadhareth, raan cäk piäät ë tim cï rïïu nɔm kɔ̈u, raan cïï Nhialic jat nhial ë kɔc cï thou yiic.

¹¹ Në rin ke Yecu guöp, yen a kɛ̈ɛ̈cë raanë ee tënë ë wenïïm, ke cï guöp pial. ‘Kënë ee kuur wään cäk rɛɛc, wek kɔc yïk alooc, ku aye tɔ ye kuur ë agukic kuur de naamde.’

¹² Ku kunydewëi aliu në raan däŋ: ku acïn rin kɔ̈k ë pinynɔm, rin cï gäm kɔc, rin bï wo dhil kony wëi në keek.”

¹³ Na wën, aa cïk ŋeeny de Petero tïŋ kekë Jɔn, ku ŋickï keek nɔn ee kek röör kënë wɛ̈ɛ̈t, acïn kajuëc ŋickï agokï gäi, ku jɔkï kenïïm tak në cath ë ye kek cath në Yecu wään.

¹⁴ Ku të woi kek raan wën cï dem akääc ke keek ëtök, ka cïn kë cïk yök kë bïk jɔ̈ɔ̈ny.

¹⁵ Na wën, aa cïk ke yɔ̈ɔ̈k an, bïk lɔ biic ë löŋic, ke jɔkï guiir kapäc.

¹⁶ Ku luelkï an, “Buk ŋö looi në kɔckë?” Acï kɔc rɛ̈ɛ̈r ë Jeruthalem ëbɛ̈n ŋic ëgɔk nɔn cï gök dït looi në keek, ku acuku ke duëër jɔ̈ɔ̈ny.

¹⁷ Ku ënɔɔnë, jɔku ke waai ë wɛ̈i gök, luelku an, “Duökï raan däŋ be guiëër ë rinke, ke jam cïï bï thiëi ë kɔc yiic.”

¹⁸ Gokï ke cɔɔl, ku yöökkï keek an, duökï jam be ya guiir ku duökï kɔc be ya wɛ̈ɛ̈t ëliŋliŋ në rin ke Yecu.

¹⁹ Na wën, ke Petero kekë Jɔn ë ke bëër, yöökkï keek an, “Luɛlkï week, nɔn piɛth en tëde Nhialic të piŋ wok këdun awär pïŋ piŋ wok këde Nhialic.

²⁰ Ku wo cïï aguiɛɛr duëër pɔ̈l në ka cuk tïŋ ku piŋku ke.”

²¹ Na wën acïk ke bɛ waai, ke ke pälkï, acïn kë cïk yök kë bï kek ke mac, në baŋ de kɔc, kɔc ëbɛ̈n aake ye Nhialic leec në ke cï looi.

²² Run ke monyë awärkï thiërŋuan, mony wën cï gökë looi ë yeguöp, gök cï e tɔ piɔl guöp.

Lɔ̈ŋ në Biäk de Ŋeeny

²³ Na wën, aacï ke pɔ̈l, ke ke lɔ tëde remden, lek ku guïïrkï keek jam ëbɛ̈n jam cïï bänydït ke ka ke Nhialic lɛ̈k keek ayï röördït.

²⁴ Na wën, aa cïk jam piŋ, ke ke jɔt keröt lamkï Nhialic në piɔ̈n tök, luelkï an, “Bɛ̈nydït, Yïn Nhialic, Yïn Aciëŋ ë cak paannhial ku piny ku wɛ̈ɛ̈r, ku ka nu ë keyiic kedhie!

²⁵ Yïn acï lueel ɣɔn në thoŋ de Debid awunde në jam de Wëidït ɣer an, ‘Eeŋö ë göthë juöör, ku eeŋö ë tɛkë kɔc ɣɔ̈ric ë kepiɔ̈ɔ̈th?

²⁶ Meliik ke piny acïk röt jɔt, Ku guëër bäny ceŋ kɔc, Bïk tɔŋ yiɛ̈n Bɛ̈nydït kekë Kërthode.’

²⁷ Kɔc acïk guëër në yic, kɔc de ater në Yecu Wënduön ɣeric, Wënduön cï tɔc, yï Ɣerod ayï Pontio Pilato, kekë Juöör ku kɔc ke Yithriɛl, aake guëër tëtöŋë,

²⁸ bïk käŋ bɛ̈n looi ëbɛ̈n, ka cïï riɛldu ku löŋdu kɔn guiir ɣɔn thɛɛr an, bï ke dhil looi.

²⁹ Ku ënɔɔnë, Bɛ̈nydït, piŋ wɛ̈i ee kek wo waai, ku gämë lïïmku riɛl, bïk jamdu aa guiir ke ke ye ŋeeny,

³⁰ ku riny yïcin ke kɔc ë ke bï dem, ku tɔ göök loi ku ka ye kɔc ke gäi në rin ke Yecu Wënduön ɣeric”

³¹ Na wën, aa cïk lam, ke piny nieŋ rɔt të wën cï kek guëër thïn, agokï thiäŋ në Wëidït ɣer kedhie, ku jɔkï jam ë Nhialic guiir në ŋeeny.

Kɔc cï Gam Arɔmkï Kaken

³² Ku tɔ̈u kut ë kɔc cï gam në piɔ̈n tök ku në jam tök: ku acïn raan ee ye lueel në ka cath ë yen an, ee kake yenguöp, ayek rɔm ëtök në käŋ kedhie.

³³ Ku tuuc ayek jamden lueel në riɛldït, jam ee kek cäätɔɔ ke jön cï Bɛ̈nydït Yecu rɔt jɔt: ku tɔ̈u dhuëëŋ dït tëde keek kedhie.

³⁴ Ku acïn raan në keyiic raan dɛk ë käŋ, kɔc ëbɛ̈n kɔc de nïïm duum ayï ɣööt ke ke ɣɔɔckï, ku jɔkï wëu ke ka cï ɣaac bɛ̈ɛ̈i,

³⁵ gokï ke tääu piny ë tuuc nïïm: na wën, ke wëu ë ke tëkë kɔc, ku miɔc raan ëbɛ̈n në këde dak dɛkë kake.

³⁶ Ku ade mony cɔl Jothep, mony cï tuuc cäk rinke an, Baranaba (yen aye wën ë Muŋdepiɔ̈u, të pukë yen ë thoŋda), ku ye raan ë Lebi, paanden ee Thaiperuth,

³⁷ monyë ade nɔm dom, go ɣaac, ku bïï wëu, tɛ̈ɛ̈u keek ë tuuc cök.