Luɔi 3 - JAM DE NHIALIC 2011

Ŋɔl ee Lim acï tɔ Dem

¹ Na wën, ke Petero kekë Jɔn ke ke lɔ ë Luaŋdïtic ëtök ë thaar ë lɔ̈ŋ, yen aye thaar ë dhoŋuan.

² Ku ade raan ëtɛ̈ɛ̈n, raan ë dhiëth ke ye aduany, ku aaye kɔc jɔt e aköölnyïïn kedhie lek tääu ë kal ë Luaŋdït thok, kal thoŋ cɔl Läkëläk, ke ye lip ë käŋ tëde kɔc ee lɔ Luaŋdït ë Nhialic.

³ Na wën, ke tïŋ Petero kekë Jɔn ë ke lɔ luaŋdït ë Nhialic, go ke lip.

⁴ Go Petero raan toom guöp, ayï Jɔn aya, ku yöök an, “Woi wook!”

⁵ Go keek woi, ke ŋɔ̈th an, de kë bï yiɛ̈n yök tëde keek.

⁶ Go Petero lueel an, “Yɛn cïn nɔm ateek ku ciën nɔm adhääp, yïn miaac tei në kë cath ke yɛn: në rin ke Yecu Kërtho de Nadhareth, jɔt rɔt cathë!”

⁷ Go ciin cuëc dɔm, jɔt nhial: na wën, ënɔnthiin manë ke cökke ku yom ke awodhoor nyïïn ke ke yök riɛl.

⁸ Na wën, ke gɔp rɔt nhial, ku kɛ̈ɛ̈c, ku ciɛth, go lɔ ë Luaŋdïtic ke keek ëtök, ke cath ku ye kɛɛc nhial, leec Nhialic.

⁹ Ago kɔc tïŋ kedhie ke cath ke lec Nhialic:

¹⁰ ku aŋickï nɔn ee yen raan wään ë rëër ke lip ë kal ë luaŋdïït ë Nhialic thok, kal thoŋ cɔl Läkëläk: agokï gäi arëët abïk nïïm mum në kë cï tïc tëde ye.

Wëët de Petero në Luaŋdïtic

¹¹ Ago raan wën cï dem go Petero dɔm kekë Jɔn, ago kɔc kedhie kat ëtök lek ë gɔ̈ɔ̈lic të nu kek, gɔ̈ɔ̈l cɔl Göl ë Tholomon, ke ke gäi arëët.

¹² Na wën, aacï Petero ke tïŋ, ke yöök kɔc an, “Week, wek röör ke Yithriɛl, eeŋö gäi wek ee kënë? Ku eeŋö tuɔɔm wek wogup wäkya, abï ciët wok ë tɔ ee raanë cath në riɛlda wogup, ku në riëëu ee wok Nhialic riëëu? Acie yen.

¹³ Nhialic de Abraɣam ku Yithaak ku Jakop, Nhialic de kuarkuɔ, yen acï wëndɛn Yecu gäm dhuëëŋ, raan wään cäk yiɛ̈n miric, ku cäk rɛɛc ë Pilato nɔm, wään cï en löŋde teem an, pɛ̈l.

¹⁴ Ee raan ɣeric en acäk rɛɛc, Raan piɛthpiɔ̈u, ku raan cï raan däŋ luc yen acäk lɔ̈ŋ an, bï yiɛ̈n week.

¹⁵ Bɛ̈nydït ë Wëi acäk nɔ̈k, raan cïï Nhialic jɔ̈t bei ë kɔc cï thou yiic, ku wok ee cäätɔɔ në cöökë.

¹⁶ Ku rin ke yen, në gäm cï wo rinke gam, yen aa tɔ raanë ril, raan wɔikï ku ŋiɛckï: yeka, gäm bɔ̈ tëde yen acï raanë gäm guöp cï dikëdik ë wenyïïn wedhie.

¹⁷ “Ku ënɔɔnë, mïthëkɔckuɔ, aŋiɛc nɔn cä wek kënë looi në kuny kuöc wek en, ayï bänykun aya.

¹⁸ Ku kakë, ka cïï Nhialic tɔ luel tueŋ në thook ke tïtke kedhie an, bï Kërtho käŋ dhil guum, kek acï ke tɔ ye yith.

¹⁹ Yen ja wek wepiɔ̈ɔ̈th puk, ku bɛkï wepiɔ̈ɔ̈th wɛ̈l Nhialic, ke bï karɛckun cuöth bei, ago akööl bɛ̈n ë Nhialic nyin akööl ke döm ë wëi ke kɔc,

²⁰ ago Kërtho tooc, raan wään cï kɔn guiëër week, yen Yecu:

²¹ raan bï dhil ceŋ paannhial aɣɔ̈l kööl ë puŋ bï käŋ puk nïïm kedhie, kööl cïï Nhialic tɔ luel në thook ke tïtkɛn ɣeriic kedhie, gɔl ɣɔn thɛɛr ciɛkë piny.

²² Mothe ë kuarkuɔ yɔ̈ɔ̈k ë yic an, tiët tök abïï Bɛ̈nyduöndït Nhialic jat nhial ë mïthëkɔckun yiic, acït man ë yɛn, jamde abäk piŋ, jam bï lɛ̈k week ëbɛ̈n.

²³ Ku ëyic, raan ëbɛ̈n raan bï këde tiët rɛɛc piŋ, ka bï määr ëtaiwei ë kɔc yiic.

²⁴ Yeka, ku tït kedhie aya, gɔl ë Thamwɛl kekë tït biɔth e, tït ɣɔn ee wël lueel, acïk kɔn lueel ë këde aköölkë, keek kedhie.

²⁵ Wek ee mïth ke tït, ku yak mïth ke löŋ, löŋ cïï Nhialic mac kekë kuarkuɔ, wään yöök en Abraɣam an, ‘Ku në käu de yïnguöp abï dhiëën ke piny nɔm aa thieei kedhie.’

²⁶ Ku Nhialic, luɔi cï en Wëndɛn Yecu jat nhial, acï kɔn tuöc week, bï week bɛ̈n thieei, në döŋ bï en we dak wei ë luɔiduön racic, week wedhie.”