Luɔi 28 - JAM DE NHIALIC 2011

Në Malita

¹ Na wën, aa cuk guɔ poth, ke wo jɔ lɔ tuur ŋic nɔn cɔlë yen Malita.

² Go kɔc de pinyë agokï wo muk apiɛth. Acïk mac kooth, ku tɔkï wook ee kamaan wodhie, luɔi cï deŋ tuɛny, ku de piny wiir.

³ Go Paulo dut töŋ ë tiim kuany, na wën, aacï ke tääu mɛɛc, ke deŋakook jɔ bɛ̈n bei në tuöc de mac, go rɔt dɛɛr ë yecin.

⁴ Na wën, aacï kɔc ke pinyë kërac tïŋ, ke lɔ nornor ë Paulo cin, ke ke jɔ röt yɔ̈ɔ̈k kapäc an, “Raanë ë raan däŋ dhil nɔ̈k, ku ciɛk, an, cï ban ë wɛ̈ɛ̈ric, ka ŋoot ke bï aciɛɛnde nɔ̈k.”

⁵ Na wën, ke jɔ kërac tɛŋ mɛɛc tei, ku cïn kërɛɛc cï yök.

⁶ Gokï tiit, nɔn bï lɔ̈ɔ̈k but, ku nɔn bï en wïïk, ku jɔ thou ënɔnthiinë. Na wën, aa cïk tiit ëcaŋawën, ku acïn kërɛɛc cï yök cïk tïŋ, ke ke jɔ kenïïm bɛ cät, ku luelkï an, “Ee yath!”

⁷ Ku ade duum ke raandït de tuur raan cɔl Pubilo, thiääk ëtɛ̈ɛ̈n, raanë acï wo nyuööc apiɛth, tɔ wook ee kamaanke ë nïn kadiäk.

⁸ Ku dhɔt wun Pubilo piny ke juäi, ku cïï thiën ë yäc dɔm aya, ago Paulo lɔ neem, le ɣön nu yen thïn, le ku lɛ̈ŋ, ku jɔ ecin thany ë yeguöp, go tɔ waar.

⁹ Na wën, ke kɔc de gup juäi ë tuuric ke ke jɔ bɛ̈n, agokï dem.

¹⁰ Agokï wo miɔɔc apiɛth në kajuëc, na wën, ëkööl ë jël wok, ke ke jɔ wo gäm ka kɔɔrku kedhie.

Jäl në Malita le Roma

¹¹ Na wën, aa cuk pɛ̈i lɛɛr kadiäk, ke wo jɔ jäl ë Alekandaria, abël wään mäi tuur, abël de wɛ̈ɛ̈t Acuek cï guaŋ ë yenɔm tueŋ.

¹² Agoku lɔ piny ë Thurakoutha, ku jɔku rëër ëtɛ̈ɛ̈n ë akööl kadiäk.

¹³ Na wën, aa cuk jäl ëtɛ̈ɛ̈n, ke wo jɔ röt yal, ɣetku Regio. Na ɣɔn amiäk, ke wöuwic lëu, agoku bɛ̈n Putoli ëkööl tök.

¹⁴ Ade wɛ̈ɛ̈tamäthkuɔn cuk yök ëtɛ̈ɛ̈n, acïk wo cɔɔl an, buk rëër ë keek ë akööl kadhorou, ku jɔku ɣet Roma aya.

¹⁵ Na wën, ke wɛ̈ɛ̈tamäthkuɔn nu Roma, të cï kek këda piŋ, ke ke jɔ bɛ̈n bei bïk wo bɛ̈n loor aɣet Thuuk de Apio, ku Luëk kadiäk. Na wën, aacï Paulo ke tïŋ, ke jɔ Nhialic leec, go yepiɔ̈u rom.

Në Roma

¹⁶ Na wën, aa cuk ɣet Roma, ke bɛ̈ny de rem jɔ kɔc cï mac yiɛ̈n bɛ̈ny ee alooc tiit, go Paulo pɔ̈l a rɛ̈ɛ̈r etök, ke tiit raan töŋ de rem tei.

¹⁷ Na wën, aacï nïn kadiäk wan, ke Paulo cɔl röördït ke Judai bïk bɛ̈n guëër të nu yen. Të cï kek guëër, ke jɔ ke yɔ̈ɔ̈k an, “Wäthii, ciɛk an, cïn ater cä cak wokë kɔc, ayï ciɛɛŋ de wärkuɔ, ke yɛn cï yiɛ̈n Romai ë Jeruthalem ke ya mac.

¹⁸ Na wën, aa cïk a thiëëc, ke ke kɔɔr luɔi bï kek a pɔ̈l, luɔi cïn en kërɛɛc cä looi, ke bï ya nɔ̈k.

¹⁹ Na wën, aa cï Judai ye ŋäk ater, ke ya jɔ dhil lɔ̈ŋ an, bä këdï lɛɛr ë Kaithar nɔm, ku acïn kë bän jurdï lɔ gaany tei.

²⁰ Kë ë caal ɛn week ka, ee tïŋ bän week tïŋ, aguɔ jam wo week, në baŋ de aŋäth de Yithriɛl, yen a mɛcë yɛn ë jothë.”

²¹ Gokï yɔ̈ɔ̈k an, “Acïn awereek cuk yök në këdu awereek bɔ̈ Juda, ku acïn raan tök ë wɛ̈ɛ̈takëckuɔ cï bɛ̈n eenë, raan cath ke jam rac në këdu.

²² Wo de piɔ̈ɔ̈th tei, luɔi bï wok kë bä lueel piŋ, ku na ee remë, aŋicku nɔn lueelë kɔc ater ë yen ë baai nɔm ëbɛ̈n.”

²³ Gokï akööl lueel, akööl bï kek bɛ̈n, na wën, ke kɔc juëc ë ke bɔ̈ ɣön rëër en thïn, ago keek guiëër wël, ku lëk keek ka ke ciɛɛŋ de Nhialic, ciɛk ɣɔn amiäk aɣet thëën, anyuth keek ka ke Yecu, ë löŋ de Mothe yic ayï tït yiic aya.

²⁴ Go kɔc ka lueel gam, ku reec kɔ̈k.

²⁵ Na wën, akën jamden rɔ̈m, ke ke jɔ jäl, të cï Paulo jam tök lueel, an, “Ee yic yen kë cïï Wëidït ɣer lɛ̈k wärkuɔ në tiët Yithaya,

²⁶ lueel an, ‘Lɔ tëde kɔckë, lɔ ku luel an: Ciɛk an, piɛŋkï, ka bäk piŋ, ku acäk bï yökic: Ku ciɛk an, tiëŋkï, ka bäk tïŋ, ku acäkï bï gɔɔk:

²⁷ Piɔ̈n ë kɔckë acï guɔ cuai, Ku acïkï ee piŋ apiɛth ë keyïth, ku acïk kenyïïn niɛɛn, Ke ke cïï bï daai ë kenyïïn, Ku pïŋkï ë keyïth, Ku yökkï jam ë kepiɔ̈ɔ̈th, Ku jɔkï kepiɔ̈ɔ̈th puk, Aguɔ keek tɔ dem.”’

²⁸ Yen ŋiɛc wek cöökë, an, “Jam ë Nhialic ë biäk de kunydewëi acï tɔ yïnë Juöör, ku abïk dhil piŋ!”

²⁹ Na wën, aacï kakë lueel, ke Judai ë ke jël, ke ke teer arëët kapäc.

³⁰ Ago Paulo rëër ɣönde guöp ɣön cï kïïr ë wëu, ku jɔ run thöl kaarou, ke ye kɔc nyuööc kedhie kɔc ee bɛ̈n tëde yen.

³¹ Aaye keek guiëër ciɛɛŋ de Nhialic, ku ye ke wɛ̈ɛ̈t në ka ke Bɛ̈nydït Yecu Kërtho ke ye nyin riɛl, ku acïn raan ë ye pɛ̈n guiëër.