Luɔi 27 - JAM DE NHIALIC 2011

Paulo alɔ Roma

¹ Na wën, aacï lueel an, buk cath në abël lok Yitalia, ke ke jɔ Paulo kekë kɔc kɔ̈k cï mac yiɛ̈n raan cɔl Julio, ee bɛ̈ny de rem cɔl rem de Augutho.

² Goku lɔ ë abëlic, abël ë Adramutium, ku jɔku yup, ayok lueel an, buk cath ke wo kuany wɛ̈ɛ̈r nɔm piny de Athia, ku ciɛthku në Aritharko, raan ë Makedonia bɔ̈ Thethalonike.

³ Na ɣɔn amiäk, ke wo jɔ kɔ̈ɔ̈c ë Thidon. Ku Julio acï Paulo luöi apiɛth ëtɛ̈ɛ̈n, go pɔ̈l a lɔ tëde määthke, bïk en lɔ kony.

⁴ Na wën, aa cuk lony ëtɛ̈ɛ̈n, ke wo jɔ cath ë Thaiperuth yɔu, në luɔi cï yom abël pɛ̈n cäth arëët.

⁵ Na wën, aa cuk tëëk ë wɛ̈ɛ̈r ë Kilikia kekë Pampulia, ke wo jɔ ɣet Mura, ee paan töŋ nu Lukia.

⁶ Go bɛ̈ny de rem abël yök ëtɛ̈ɛ̈n, abël ë Alekandaria lɔ Yitalia, ku jɔ wo tääu thïn.

⁷ Na wën, ke wo ye cath ë dïïrdïïr ë nïn juëc, acï wo duɛ̈ɛ̈r dhal ë yiit bï wo yiit piny në Kinido, në pɛ̈n cï yom wo pëën, goku tëëk ë Kerete yɔu, ku jɔku yiit piny ë Thalmone.

⁸ Ku të ŋoot wok ke wo kën tuurë winy thok, ke wo jɔ ɣet të cɔl Wanh Lɔdïp, athiɔ̈k kekë pänydït cɔl Lathia.

⁹ Na wën, aa cuk nïn juëc lɛɛr, abï riɔ̈ɔ̈c guɔ nu ënɔɔnë në cäth ë abëlic, dhuëëŋ ee cäm rɛɛc ë guɔ thök aya, ke Paulo jɔ kɔc yɔ̈ɔ̈k alë,

¹⁰ an: “Bäny, yɛn ë cäthë tïŋ, cäth ciɛth wok, nɔn bï wo dak arëët, ku riääk abï nu, acie riääk de wëu tei ayï abël, ee wëikuɔ ayadäŋ.”

¹¹ Go bɛ̈ny de rem ago jam de raan kuath abël gam ayï jam de wun abël, ku reec ka lueel Paulo.

¹² Ku luɔi rɛɛcë wanhë në mäi bï abël mäi thïn, ku jɔ tëdït ë kɔc guɔ lueel an, buk yup ku themku nɔn duëër wo ɣet Poiniki, buk lɔ mäi ëtɛ̈ɛ̈n, Poiniki ee wanh ë Kerete, wanh ee abëël mac thïn, ku cï e yic wɛl wöuwic ku aköl athɛ̈i, ku të lɔ rut ku aköl athɛ̈i.

Amaŋ ku Wɛ̈ɛ̈r

¹³ Na wën, aacï wöuwic pɔ̈t ëmääth, ke jɔkï lueel an, kë nu ë wopiɔ̈ɔ̈th ka, acuk yök, gokï abël yup, ku jɔkï tëëk ë Kerete yɔu, ke ke kuany wɛ̈ɛ̈r yɔu.

¹⁴ Na wën, aa cïn tëdïït cïk lɛɛr, ke amaŋdït bɔ̈ në kenïïm tueŋ, amaŋ cɔl Eurakulo.

¹⁵ Go abël dɔm ë yom, acï e nɔm duɛ̈ɛ̈r cɔ̈k ë yomic, goku pɔ̈l, a kuɛɛth yom.

¹⁶ Goku riŋ ë tuur yɔu, tuur thiin cɔl Kauda, ku acï wo duɛ̈ɛ̈r dhal në thël bï wok abël thiinë thɛl thïn.

¹⁷ Na wën, aa cïk abël thiinë jat nhial, ke ke jɔ wïïn a tɛ̈ɛ̈k abël thar, duut kek en, ke bï riɛl, ku luɔi riɔ̈ɔ̈c kek ë cot bï abël cot ë liɛɛt kɔ̈cic, ke ke jɔ lupɔ de abël däk bei, bï yom ke kuaath tei.

¹⁸ Ku na ɣɔn amiäk, luɔi cï amaŋ abël tɔ lɔ jäŋjäŋ aläl, ke ke jɔ wëu kɔ̈k dhil dɛɛny wei ë abëlic,

¹⁹ ku ëkööl ee kek diäk wok cï ka ke abël cuat wei ë wocin.

²⁰ Ku jɔku nin juëc lɛɛr ke akɔ̈l ayï kuɛl ke ke cïï tiëc kedhie, ku ŋoot amaŋ ke put aläl, ago aŋäth ë ŋäthku an, bï wo kony, go jäl ë wopiɔ̈ɔ̈th.

²¹ Na wën, aacï kɔc cäm rɛɛc ë nïn juëc, ke Paulo jɔt rɔt ë kɔc yiic cil, ku jɔ lueel an, “Week bäny, tëë we ë jamdï piŋ wään ku tëë wo kën lony Kerete, adï cï ŋuän, ku kërɛɛcë adï kën nu ënɔɔnë ayï ë riääkkë.

²² Ku wek yɔ̈ɔ̈k ënɔɔnë an, ruɔmkï wepiɔ̈ɔ̈th tei! Acïn määr bï kɔc määr ë weyiic, ee abël tei en abï määr.

²³ Tunynhial aa kääc ë yalɔ̈ɔ̈m wënakɔ̈u, tuny de Nhialic, Nhialic a yɛn lïmde ku ee yen ya lam,

²⁴ ku jɔ lueel an, ‘Du riɔ̈c, Paulo, yïn bï dhil lɛɛr ë Kaithar nɔm. Ku tïŋ, Nhialic acï yï gäm pïïr pïïrë kɔc cath wek kedhie ayadäŋ.’

²⁵ Yen ruɔm wek wepiɔ̈ɔ̈th, bäny! Yɛn gam Nhialic, nɔn bï en aa yic aya, cït man cï en e lɛ̈k ɛn.

²⁶ Wo bï dhil cuat ë tuur tök nɔm tei.”

²⁷ Na wën, aacï nïn guɔ thiëër ku ŋuan, ke wo ye biäk tɛ̈ɛ̈n ku biɛ̈ɛ̈kë wo tɛ̈ɛ̈n në abäpdit yic, të cï piny dït, ke jɔ kɔc lui abëlic lueel an, de piny cï guɔ thiɔ̈k.

²⁸ Agokï them ë wiën, ku yökkï acït bɛ̈ɛ̈r ë kɔc kathiërrou, na wën, aa cïk lɔ tueŋ ëmääth, ke jɔkï bɛ them, ku yökkï acït bɛ̈ɛ̈r ë kɔc kathiëër ku dhïc.

²⁹ Na wën, ke ke riɔ̈c nɔn bï wo ɣääl ë kur yiic, agokï wëu ke abël kaŋuan cuat piny ë wɛ̈ɛ̈ric në abël thar ciëën, wëu ë abël mɔ̈k piny, ku jɔkï runëpiny tiit aläl.

³⁰ Na wën, ke kɔc lui abëlic an, kɔtkï abëlic, gokï abël thiinë luaai piny wïïr, ke loikï ë cuëër an, cuɛtkï wëu ë abël mɔ̈k piny wïïr, ë abël nɔm tueŋ.

³¹ Go Paulo bɛ̈ny de rem yɔ̈ɔ̈k, ku yöök rem de tɔŋ kɔ̈k an, “Të kënë kɔckë rëër ë abëlic, ke we cïï duëërë kony.”

³² Go rem de tɔŋ wïïn ke abël thiinë ŋuith kɔ̈ɔ̈th, ku pälkï alööny wïïr.

³³ Na wën, aa kɔɔr piny ruu, ke Paulo jɔ kɔc lɔ̈ŋ kedhie an, bïk këcam thiëëp an, “Nïn kathiëër ku ŋuan ke we rɛ̈ɛ̈r ëcaŋwään, ke we cïï cäm.

³⁴ Jakï cam, wek läŋ, yen abä wek pïïr. Acïn nhiëm töŋ ë raan tök bï määr ë weyiic.”

³⁵ Na wën, aacï kënë lueel, ke jɔ kuïn cï pam nööm, ku jɔ Nhialic yɔ̈ɔ̈k, an, Thieithieei, ë kenïïm kedhie, na wën, ke wɛ̈kic ciɛm.

³⁶ Gokï kepiɔ̈ɔ̈th rom, ku nömkï këcam ayadäŋ, ciɛmkï.

³⁷ Wok kɔc ë nu abëlic wodhie, wok ee bot kaarou ku thiërdhorou ku dhetem.

³⁸ Na wën, aa cïk cam acïk kuɛth, ke ke jɔ agamɔ cuat wïïr, ke abël bï pial.

Dhuɔɔŋ de Abël

³⁹ Të cï piny guɔ ruu, agokï piny kuc, nɔn ee yen pinyou, acïk nyin thiinë yök, nyin de yɔu liɛɛt, gokï lueel an, bïk them nɔn duëër kek abël yiɛ̈n yal thïn.

⁴⁰ Na wën, aa cïk wëu wën ë abël mɔ̈k piny ŋuiɛth wei, pɛ̈lkï wïïr, ku däkkï wïïn wën ee abël puk, ku jɔtkï lupɔ nhial lupɔ nu ë abël nɔm tueŋ, bï yom kuaath, goku cath lok të nu piny de liɛɛt.

⁴¹ Na wën, aa cïk lëu të nu kiɛɛr kaarou, ke ke jɔ abël tɔ lɔ biic, go abël nɔm nuɛt piny ku jɔ kɔ̈ɔ̈c aril, ku dhoŋ abël thar në riɛl ë apiöök.

⁴² Go rem de tɔŋ löŋden lueel an, bï kɔc cï mac nɔ̈k, ke bï ciën raan bï kuaŋ ke lɔ biic, go ban.

⁴³ Go bɛ̈ny de rem ke pëën, akɔɔr luɔi bï en Paulo kony, go lueel an, bï kɔc ŋic kuaŋ röt kɔn cuat wïïr, lek biic,

⁴⁴ ku bï kɔc cï döŋ lɔ biic, kɔ̈k ë pɛɛm nïïm, ku kɔ̈k ë ka ke abël nïïm. Gokï lɔ biic aya, acïk jɔ poth kedhie.