Luɔi 22 - JAM DE NHIALIC 2011

¹ “Week, wɛ̈ɛ̈tkewäär ku wärkuɔ, piɛŋkï këdiën luɛɛl ë wenïïm ënɔɔnë.

² Na wën, aa cïk e piŋ nɔn jiɛɛm en ke keek në thoŋ de Ɣeberuu. Ke ke lɔ lik aläldïïtë, go lueel an:

³ “Yɛn ë Judai nɔm ëgɔk, ku yɛn aa dhiëëth ë Tartho ë Kilikia, ku yɛn aa muk ë pänydïïtëyic, ke ya piɔ̈ɔ̈c ë Gamaliɛl, ku ye ya wɛ̈ɛ̈t ë täu de löŋ de kuarkuɔ, täu a gɔk, aguɔ yic lɛ̈th në këde Nhialic, acït man ë wek wedhie ëköölë.

⁴ Yɛn aaye kɔc cath ë Kueerë yɔŋ athou kek, ku aake ya duut, ku mac keek ë aloc yiic, röör ayï diäär.

⁵ Bɛ̈nydïït ë kake Nhialic ee cäätɔdï në ëcöökë aya, ayï röördït ëbɛ̈n. Awereek acä ke nööm tëde keek aya, awerek bä yiɛ̈n wäthii, guɔ lɔ Damathko, la kɔc ë tɔ̈u ëtɛ̈ɛ̈n lɔ bɛ̈ɛ̈i Jeruthalem, ke ke rɛk, abïk këdɛn tuc bɛ̈n yök.

Paulo Ajam në Biäk de Gämde

⁶ “Na wën, aa cath kueer, ku cä ɣeet tëthiɔ̈k kekë Damathko, të kɛ̈ɛ̈c akɔ̈l cil, ke këdïït ɣeer ë piny riaau go tuöl ë yalɔ̈ɔ̈m ëthiäu, këɣeer bɔ̈ nhial.

⁷ Guɔ wïïk, ku piɛŋ röl lëkkë yɛn an, ‘Thaulo, Thaulo! Eeŋö yöŋë yɛn?’

⁸ Guɔ thiëëc an, ‘Ee yïn ŋa, Bɛ̈nydït?’ Go an, ‘Ee Yɛn Yecu de Nadhareth, raan yɔŋë.’

⁹ Go kɔc cath ë yɛn gokï këɣer tïŋ, agokï riɔ̈ɔ̈c, ku kënkï röl ë raan jam ke yɛn piŋ.

¹⁰ Go thiëëc an, ‘Eeŋö bä looi, Bɛ̈nydït?’ Go Bɛ̈nydït lueel an, ‘Jɔt rɔt, lɔ Damathko, ka bä dhil looi abï ke lɛ̈k yïn ëtɛ̈ɛ̈n, käŋ kedhie.’

¹¹ Na wën, aa cä ciën të daai në riaau cï këɣeerë a riaau nyin, ke ya dɔm cin ë kɔc wën cath ë yɛn, thelkï ya, guɔ jɔ bɛ̈n Damathko.

¹² “Ku ade raan cɔl Anania, raan riëëu Nhialic ku döt löŋ, ku ye raan piɛth rin tëde Judai wään rɛ̈ɛ̈r ëtɛ̈ɛ̈n kedhie,

¹³ raanë ë jɔ bɛ̈n tëde yɛn, bï ku kɛ̈ɛ̈c ë yalɔ̈ɔ̈m, go a yɔ̈ɔ̈k an, ‘Thaulo, mɛnhkäi, bɛyë yïn!’ Guɔ yïn ënɔnthiinë, ku wɔi guöp.

¹⁴ Go lueel an, ‘Nhialic de wärkuɔ acï yï lɔc, bä këde piɔ̈nde bɛ̈n ŋic, ago Raan piɛthpiɔ̈uwë tïŋ, ku jɔ jam ë yenthok piŋ.

¹⁵ Yïn bï aa cäätɔde ë kɔc yiic kedhie, në ka cï tïŋ ku piŋ ke.

¹⁶ Ku ënɔɔnë, eeŋö gäu yï? Jɔt rɔt, ke yï baptith, abä karɛcku waak wei, ku jɔ rin ke Bɛ̈nydït cɔɔl.’

Paulo acï Cɔɔl bï Juöör lɔ Wɛ̈ɛ̈t

¹⁷ “Na wën, të cän a nɔm bɛ dhuöny Jeruthalem, ke ya läŋ ë Luaŋdïtic, ku ja käŋ tïŋ ke ya nyuöth,

¹⁸ guɔ Bɛ̈nydït tïŋ ke yöök ɛn an, ‘Dap jäl ë Jeruthalem ënɔnthiinë, jamduön ee lueel ë këdï acïkï bï gam.’

¹⁹ Guɔ lueel an, ‘Bɛ̈nydït, aŋickï nɔn cän kɔc gam yïn tɔ mac, ku ya ke dui ë ɣööt ke Nhialic yiic kedhie.

²⁰ Ku wään lëuwë riɛm ë Thepano cäätɔduön wään cï nɔ̈k, ke yɛn aa kääc ëtɛ̈ɛ̈n aya, ku gam thönde, guɔ lupɔɔ ke kɔc näk en tiit.’

²¹ Go ya yɔ̈ɔ̈k an, ‘Jël tei, yïn bä tuɔɔc tëmec ya të nu ë Juöör.”’

²² Gokï ka lueel Paulo piŋ aɣet jamë, na wën, ke ke jɔt keröt, aluelkï an, “Nyaaiyë raan cït ee kënë ë piny nɔm, acïï piɛth luɔi bï en pïïr!”

²³ Na wën, ke ke cöt arëët abïk lupɔɔken cuat piny, ku deenykï abuui nhial aya.

²⁴ Ku jɔ bɛ̈nydït de rem de tɔŋ lueel an, bï Paulo lɛɛr në aloocic, ku lueel, an, bï luɔp në dui bï e dui ë waat, ke bï thar ë kë ye kɔc cööt aya ŋic.

²⁵ Na wën, aa dutkï yen ë wïïn, ke Paulo thiëc bɛ̈ny de rem, bɛ̈ny kääc ë yelɔ̈ɔ̈m an, “Cï päl week nɔn bä wek raan dui ë waat ku ye Romai, të ŋoot en ke kënë yiëk yeth gääk?”

²⁶ Të cï en ee kënë piŋ, ke bɛ̈ny de rem jɔ lɔ lɛ̈k bɛ̈nydïït de rem de tɔŋ an, “Tïŋ rɔt ë kë loi, raanë ee Romai!”

²⁷ Go bɛ̈nydïït de rem de tɔŋ bɛ̈n, ku jɔ thiëëc an, “Lɛ̈kë yɛn, ye Romai?” Go an, “Ɣɛɛ.”

²⁸ Go bɛ̈nydïït de rem de tɔŋ bɛ̈ɛ̈r an, “Yɛn ë wëu juëc tääu piny në biäk bän aa dïl.” Go Paulo lueel an, “Ku yɛn ë dhiëth ke ya ye dïl.”

²⁹ Go kɔc jäl ë yelɔ̈ɔ̈m ënɔnthiinë, kɔc wën, an, bïk e luɔp në dui, go bɛ̈nydïït de rem ë tɔŋ riɔ̈ɔ̈c aya, të cï en e ŋic nɔn ee yen Romai, wën cï en ë tɔ dutë.

Paulo anu në Gɔny Nɔm

³⁰ Na ɣɔn amiäk, nɔn de yen piɔ̈u luɔi bï en thar ë këdäŋ ŋic ëgɔk, kë gɔɔnyë Judai ye, ke jɔ Paulo lony ë joth yiic, ku cɔɔl bänydït ke ka ke Nhialic kekë kɔc ke löŋ kedhie an, bïk bɛ̈n. Go Paulo bɛ̈ɛ̈i, ku tɛ̈ɛ̈uwë ë kenïïm.