Luɔi 2 - JAM DE NHIALIC 2011

Bɛ̈n de Wëidït

¹ Na wën, aacï kööl ë Thiërdhïc guɔ bɛ̈n, ke ke tɔ̈u tëtök kedhie.

² Ago awuööu dap bɛ̈n ëthiäu paannhial, acït awuööu de yom dïït put, ku thiëëŋ ɣöt ëbɛ̈n ɣön rëër kek thïn.

³ Na wën, ke liëp ë ke tul, liëp cït mac, cï keyiic tek: ku jɔkï nyuc ë kegup kedhie.

⁴ Agokï thiäŋ në Wëidït ɣer kedhie, ku jɔkï jam në thok lei, acït man cï Wëidït ɣer e gäm keek bï kek jam.

⁵ Ku ade Judai rɛ̈ɛ̈r ë Jeruthalem, kɔc riëëu Nhialic, kɔc ë bɔ̈ bei ë juöör yiic juöör ke pinynɔm ëbɛ̈n.

⁶ Na wën, aacï jamë piŋ ë kɔc, ke kut ë kɔc ë guëër, gokï nïïm mum, raan ëbɛ̈n ë keek piŋ ke ke jam ë thoŋde guöp.

⁷ Ago ke liääp nïïm kedhie ku gɛ̈ikï, ku jɔkï lueel kapäc an, “Tiëŋkï kɔckë, kɔc jam ënɔɔnë, cïkï ye kɔc ke Galili kedhie?

⁸ Ku eeŋö piŋku ënɔɔnë, raan ëbɛ̈n, ŋɛk ë thoŋ ë dhiëëth ë ye thïn piŋ?

⁹ Wo Parthoi, ku Medo, ku Eelam, ku kɔc tɔ̈u ë Methopotamia, ku Juda, ku Kapadokia, ku Ponto, ku Athia,

¹⁰ ku Purugia, ku Pampulia, ku Rip, ku bɛ̈i ke Libya thiɔ̈k ke Kurene, ku kamaan ë bɔ̈ Roma, ayï Judai ayï kɔc ë cï röt tɔ ye Judai,

¹¹ ku kɔc ke Keret, ku kɔc ke Arabia, kek a piŋku ke ke jam në thookkuɔ ë kagöök ë looi Nhialic!”

¹² Agokï gäi kedhie, acï ke dhal, ku thiëckï röt kapäc an, “Ee käŋö ee kënë?”

¹³ Ku lueel kɔ̈k agɛɛt an, “Kɔckë acïk kuɛth ë mɔ̈n ë piac dhiim!”

Jam de Petero

¹⁴ Na wën, ke Petero jɔt rɔt kekë kɔc kathiëër ku tök, ku jiëëm keek ë röl dït, an, “Wek juöör ke Judai, ku wek kɔc rɛ̈ɛ̈r ë Jeruthalem wedhie, jakï kënë ŋic, ku piɛŋkï wëlkï.

¹⁵ Kɔckë akën mɔ̈u ke wit, në ke wën cäk lueel, ee thaar kadiäk aköl tei,

¹⁶ ku kënë ee kë ɣɔn lueel ë tiët Jowɛl,

¹⁷ An, ‘Acï Nhialic lueel an, Miäk wadäŋ, Wëikï abä ke luööŋ ë kɔc gup kedhie. Ku wɛ̈ɛ̈tkun ku nyïïrkun abïk käŋ aa caar, ku röörkuöndït abïk aa nyuöth ë käŋ.

¹⁸ Acakaa lïïmkun aya, Wëikï abä ke luööŋ ë kegup në aköölkë, Lïïmkuön röör ku lïïm duet, agokï käŋ aa caar.

¹⁹ Ku kake gäi abä ke tɔ tiëc tënhial, Ku ta göök tiëc ë piny nɔm, Riɛm, ku mac, ku toltool ë piny:

²⁰ Akɔ̈l abï rɔt puk aye cuɔlëpiny, ku bï pɛɛi rɔt puk aye riɛm, Të ŋoot ëkööldïït ë Bɛ̈nydït ke kën bɛ̈n, kööl bï tïc ëgɔk:

²¹ Ku ë yic, raan ëbɛ̈n raan ë Bɛ̈nydït cɔɔl rin, ka bï dhil kony wëi.’

²² “Wek röör ke Yithriɛl, piɛŋkï wëlkë: Yecu de Nadhareth, raan cï nyuöth week nɔn ë bïï yen tëde Nhialic në luɔi dït ku kake gäi ku göök cï Nhialic ke looi në yen ë weyiic, acït man ŋiɛc wek en ayadäŋ,

²³ yen acäk nööm, të cï e yiɛ̈n week në këde löŋ cïï Nhialic lueel ë yepiɔ̈u, ku në ŋïny cï en e kɔn ŋic, aguɔkï piäät ë tim cï rïïu nɔm kɔ̈u në ciin rac, ku näkkï abï thou.

²⁴ Yen acïï Nhialic jat nhial, të cï en e luöny bei ë thuɔɔuwic: luɔi dhɛlë thuɔɔu muŋ bï en e muk.

²⁵ Ku Debid ë jam luel në këde an, ‘Yɛn aaye Bɛ̈nydït tïŋ ë a nyin tueŋ ëcaŋɣɔn, ke ye tɔ̈u ë baŋ cuënydï, ke ya cïï bï nyaai tëdï.

²⁶ En acä yɛn piɔ̈u miɛt, abä piɔɔny ë liemdï, ku guöpdï aya abï yök ke lɔ̈ŋ në aŋäth ŋääth:

²⁷ Luɔi cïï yïn wëikï bï nyääŋ paan ë thuɔɔu, ku cïï raanduön ɣeric bï tɔ tïŋ dhiap.

²⁸ Yïn cï a tɔ ŋic kuɛɛr ke pïïr, Yïn bï a tɔ mit piɔ̈u në nyindu abä piɔ̈u a yum.’

²⁹ “Wek wäthii mïthëkɔckuɔ, acïn kë pën ɛn guiëër guiëër ɛn week në këde Debid kuɛɛrdan thɛɛr an, abï thou, ku acï thiɔ̈k, ku raŋde atɔ̈u kekë wook aɣet cï ëköölë.

³⁰ Ku yen aaye tiët, ku aŋic nɔn cï Nhialic e lɛ̈k en, abï gutguut lueel an, Në mïth ke thardu yïguöp, yɛn bï Kërtho jat nhial, raan bï rëër ë thöönydu nɔm.

³¹ Ago Debid, luɔi cï en kënë kɔn tïŋ, ago jam në këde jön bï Kërtho rɔt jɔt, an, ‘Wëike akënë ke nyääŋ paan ë thuɔɔu, ku kën guöpde dhiap tïŋ.’

³² Yen Yecu manë, yen acïï Nhialic jat nhial, ku wook wodhie wok ee cäätɔɔ në ee cöökë.

³³ Ku ënɔɔnë, nɔn cï e tɔ dït ë ciin cuëny de Nhialic, ago Wëidït ɣer nööm ku cï Wun kɔn lueel an, bï ke gäm en, yen a luuŋ en ee kënë piny, ke wɔikï ku piɛŋkï ënɔɔnë.

³⁴ Ku Debid akën guɔ lɔ paannhial: yenguöp, yen aa lueel en an, ‘Bɛ̈nydït ë Bɛ̈nydiëndït yɔ̈ɔ̈k an: Nyuc ë baŋ cuënydï,

³⁵ Aɣet kööl bän kɔc dɛ wek ater tɔ ye kën ee yïn yïcök dhɔ̈ɔ̈r.’

³⁶ “Na ënɔɔnë, tɔ baai de Yithriɛl ëbɛ̈n tɔ ŋic cöökë ëgɔk an, Yecu manë, raan wään cäk piäät ë tim cï rïïu nɔm kɔ̈u, yen acïï Nhialic tɔ ye Bɛ̈nydït ku tɔ ye Kërtho aya!”

³⁷ Na wën, aa cïk jamë piŋ, ke ke guutë piɔ̈ɔ̈th, ku thiëckï Petero kekë kɔc kɔ̈k ë piööcë an, “Wäthii mïthëkɔckuɔ, eeŋö buk looi?”

³⁸ Go Petero ke yɔ̈ɔ̈k an, “Pɔ̈kkï wepiɔ̈ɔ̈th, ku takï röt baptith wedhie në rin ke Yecu Kërtho, ke bï karɛckun pɔ̈l, ke we bï miɔɔc në Wëidït ɣer.

³⁹ Kë cï lueel an, bï gäm kɔc, ee këdun week, ku ye këde mïthkun, ku ye këde kɔc nu tëmec kedhie, kɔc bïï Bɛ̈nydït Nhialicda cɔɔl.”

⁴⁰ Ago ke lɛ̈k wël juëc kɔ̈k ku guïïr kek an, “Kuɔnykï röt ee remë rem cï piɔ̈u ŋɔl.”

⁴¹ Go kɔc cï wëlke gam ë piɔ̈nmit ago ke baptith, aake cït aguum kadiäk de kɔc.

⁴² Agokï aa cool ë tɔ̈u ë wëëtic wëët ë tuuc, ku yek cool ë abärɔ yic, ku wäŋ ee kuïn wökic, ku lɔ̈ŋic.

Pïïr në Kɔc cï Gam Yiic

⁴³ Ago riɔ̈ɔ̈c kɔc dɔm kedhie: ku tuuc acïk ka ke gäi juëc looi, ayï göök.

⁴⁴ Ku tɔ̈u kɔc cï gam ëtök, agokï kaken rɔm ëtök kedhie.

⁴⁵ Go kɔc duumken ɣaac ayï kaken, gokï ke tɛ̈k kɔc kedhie, të de yen raan dɛkë käŋ.

⁴⁶ Agokï aa cool ë Luaŋdïtic aköölnyïïn kedhie në piɔ̈n tök, ku yek kuïn wääkic ɣönë ku ɣönë, ku yek këden cam në piɔ̈nmit cïnic ruëëny,

⁴⁷ ke ke ye Nhialic leec, ku mit kɔc piɔ̈ɔ̈th kedhie në keek. Go Bɛ̈nydït ɣön ë Nhialic ŋuak nyin ë kɔc ë aköölnyïïn kedhie kɔc kony wëi.