Luɔi 15 - JAM DE NHIALIC 2011

Amat ë Jeruthalem

¹ Na wën, ke kɔc kɔ̈k ë ke bɔ̈ ë Juda, bïk ku wëëtkï wäthii an, “Të kënë we cueel cït man ë täu de ciɛɛŋ de Mothe, ke we cïï duëërë kony wei.”

² Gokï teer cak në Paulo ku Baranaba, teer dït ë wël juëc bɛ̈ɛ̈i, na wën, ke lueel kɔc an, bï Paulo lɔ Jeruthalem kekë Baranaba, ku kɔc kɔ̈k ë keyiic, lek të nu tuuc ku röördït, lek jamë guiir.

³ Go kɔc ke ɣön ë Nhialic ke ruac kueer, ku jɔkï tëëk në Poiniki kekë Thamaria, ke ke lëk kɔc puŋ cï Juöör kepiɔ̈ɔ̈th pɔ̈k Nhialic, gokï wäthii tɔ mit piɔ̈ɔ̈th aläl.

⁴ Na wën, aa cïk ɣet Jeruthalem, ke ke loor ɣön ë Nhialic ayï tuuc ku röördït, ku jɔkï ke guiëër këriëëc ëbɛ̈n ka cïï Nhialic looi kekë keek.

⁵ Ku jɔt kɔc röt, kɔc ke rem ë Parithai kɔc cï gam, ku jɔkï lueel an, “Juöör abï ke dhil cueel, ku abuk keek dhil yɔ̈ɔ̈k, bïk löŋ de Mothe dhil aa muk ëbɛ̈n.”

⁶ Go tuuc ku röördït gokï guëër bïk jamë bɛ̈n woi yic ëtök.

⁷ Na wën, aacï kɔc teer ëteer dït, ke Petero jɔt rɔt, ku lueel an, “Wäthii, aŋiɛckï löny cï Nhialic a lɔc wään ë weyiic an, bï Juöör wëlpiɛth piŋ ë yathok, ku gamkï.

⁸ Ku Nhialic, Raan ŋic kɔc piɔ̈ɔ̈th, acï aa cäätɔden, në miɔ̈c cï en keek miɔɔc në Wëidït ɣer, acït man cï en wo miɔɔc.

⁹ Ku acïn puny cï en wo pɔ̈ɔ̈c yiic, wook në keek, wään cï en keek waak piɔ̈ɔ̈th në gäm.

¹⁰ Na ënɔɔnë, eeŋö thɛ̈mkï Nhialic, bäk këthiek tääu ë kɔcpiööcë yiëth, këthiek cï wärkuɔ dhal ë jöt ayï wook?

¹¹ Wok gam tei nɔn bï wo kony wëi në dhuëëŋ ë Bɛ̈nydït Yecu Kërtho piɔ̈u, acït man ë kek aya.”

¹² Na wën, ke amatnɔm ëbɛ̈n ke ke jɔ mim, ku piŋkï këde Baranaba ku Paulo, ke ke guiir göök ku ka ye kɔc ke gäi, ka cïï Nhialic looi ë Juöör yiic në kecin.

¹³ Na wën, aa cïk jamden thöl, ke Jakop bëër, lueel an, “Wäthii, piɛŋkï këdï!

¹⁴ Thimon acï week guiëër në nɛ̈m tueŋ cï Nhialic Juöör kɔn neem, bï kɔc bɛ̈n bɛ̈ɛ̈i bei ë keyiic, në baŋ de rinke.

¹⁵ Ku wël ke tiët arɛ̈mkï në kënë, acït man cï e gɔ̈ɔ̈r, an,

¹⁶ ‘Na ëlë e kake cök, ke yɛn bï a nɔm dhuny, Guɔ paany de Debid wën cï wïïk aguɔ bɛ yïk. Ku pɛɛny cï riääk abä ke bɛ yïk, Ku ta ke be kɔ̈ɔ̈c.

¹⁷ Luɔi bï kɔc Nhialic kɔɔr, kɔc cï döŋ, Ayï Juöör kedhie Juöör cï cɔl në rinkï, Jam de Bɛ̈nydït kï, Bɛ̈nydït loi kake kedhie.

¹⁸ Luɔi looi ëbɛ̈n aŋic Nhialic të ɣɔn gɔlë käŋ.’

¹⁹ “Ënɔɔnë dï, löŋdï kï, an, Duku kɔc ee jut kɔc cï kepiɔ̈ɔ̈th wɛ̈l Nhialic në Juöör yiic,

²⁰ ku abuk keek gäär tei an, bïk luɔi de yiëth pɔ̈l luɔi nhiany, ku pälkï dhööm, ku cäm de läi cï dec, ku riɛm.

²¹ Mothe ade kɔc ee löŋde guiir ëcaŋɣɔn ë wuöt ëbɛ̈n yiic, jamde aye kueenic ë ɣööt ke Nhialic yiic ë akööl ke Thabath kedhie.”

Awerek Gɛ̈ɛ̈rë Juöör

²² Go tuuc ku röördït ku ɣön ë Nhialic ëbɛ̈n agokï löŋ mat ë kepiɔ̈ɔ̈th, an, bïk kɔc cï lɔc në remdenic tuɔɔc Antiokia, bïk cath ë Paulo kekë Baranaba, ke yï Judath cɔl Barthaba, ku Thila, röördït ë kɔc yiic,

²³ gokï awerek gɔ̈ɔ̈r tɔkï luɛthkï, awerek lueel en, an: “Wek thiëëc tuuc ku röördït ku wäthii, wek mïthëkɔckuɔn nu ë Juöör yiic, kɔc tɔ̈u në Antiokia, ku Thiriya, ku Kilikia:

²⁴ Acuk piŋ nɔn de kɔc kɔ̈k cï jäl ë woyiic, kɔc cï week jut në wël wëëtë ke, ku liëëpkï wenïïm, luelkï, an, bï we dhil cueel, ku bäk löŋ aa döt, ku acïn kë cuk thɔ̈n keek.

²⁵ Agoku löŋ mat ë wopiɔ̈ɔ̈th në guëër cï wo guëër në piɔ̈n tök, an, buk kɔc cuk lɔc tuöc week bïk cath ë Baranaba ku Paulo, kɔc nhiaarku,

²⁶ kɔc cï wëiken kuɔɔn në baŋ de rin ke Bɛ̈nydan Yecu Kërtho.

²⁷ Yen a toc wok Judath ku Thila, kɔc bï we lɛ̈k wëlmankë në kethook.

²⁸ Apiɛth tëde Wëidït ɣer ayï wook an, acïn däŋ buk tääu ë weyiëth, ee kakë tei kek bäk dhil looi,

²⁹ an, bäk cäm ë rïŋ cï gam yiëth pɔ̈l, ku riɛm, ku ka cï dec, ku dhööm, të cä wek kakë pɔ̈l, ka we ye këpiɛth looi. Niɛnkï apiɛth.

³⁰ Na wën, aacï ke tɔ jël, ke ke bɔ̈ Antiokia, ku të cï kek akutnɔm ë kɔc tɔ guëër, ke ke jɔkï gäm awerek.

³¹ Agokï kueen, ku jɔkï piɔ̈ɔ̈th miɛt në muŋ cï ke muk piɔ̈ɔ̈th.

³² Go Judath ku Thila, luɔi ee kek tït aya, agokï wäthii guiëër wël juëc, ku ritkï kepiɔ̈ɔ̈th,

³³ Na wën, aa cïk nïn lɛɛr ëtɛ̈ɛ̈n, ke ke tɔ jël apiɛth në wäthii bïk lɔ të nu tuuc.

³⁴ Ku Thila amit piɔ̈u në rëër rëër en ëtɛ̈ɛ̈n.

³⁵ Ku dɔ̈ŋ Paulo ku Baranaba Antiokia, ke ke ye kɔc wɛ̈ɛ̈t ku guïïrkï keek jam de Bɛ̈nydït, në kɔc juëc kɔ̈k aya.

Pɔ̈k de Paulo kekë Baranaba

³⁶ Na wën, aa cïk nïn lɛɛr, ke Paulo yöök? Baranaba an, “Jɔku wonïïm bɛ dhuny lok mïthëkɔckuɔ bɛ neem ë pänydït yiic ëbɛ̈n të wään ee wok jam ee Bɛ̈nydït guiir thïn, ke wo bï täu tɔ̈u kek tïŋ.”

³⁷ Ago Baranaba piɔ̈u dɛ luɔi bï kek Jɔn lɛɛr bï lɔ cath ke keek, rinkɛn kɔ̈k acɔlke Mak.

³⁸ Ku lueel Paulo an, cïï piɛth luɔi bï kek raan lɛɛr raan wään ë jël ë kelɔ̈m ë Pampulia, ku reec cath ke keek ë luɔiyic.

³⁹ Agokï teer aläl apɔ̈k kek, ku jɔ Baranaba Mak lɛɛr, jël abëlic le Thaiperuth,

⁴⁰ Ku lɔc Paulo Thila, ku jël, acïï wäthii ke kɔn tɔ̈ɔ̈ŋ an, bï dhuëëŋ ë Nhialic piɔ̈u cath ke keek.

⁴¹ Go tëëk në Thiriya ku Kilikia, ke tɔ ɣööt ke Nhialic kääc aril.