Luɔi 14 - JAM DE NHIALIC 2011

Në Yikoniom

¹ Na wën, të nu kek Yikoniom, ke ke lɔ luaŋ ee Judai lɔ̈ŋ thïn, keek kaarou ëtök, ku jɔkï kɔc guiëër, ago kut dïït ë kɔc gam, Judai ayï Girikii aya.

² Go Judai reec gäm gokï Juöör kɛ̈ɛ̈k, ku tɔkï ke nhiany piɔ̈ɔ̈th në wäthii.

³ Agokï ceŋ ëtɛ̈ɛ̈n ë akööl juëc ku yek wël guiir ke ke ye nyïïn riɛl ë Bɛ̈nydïtic, ago Bɛ̈nydït aa cäätɔ de jam de dhuëëŋ de yenpiɔ̈u, go göök tɔ loi ë kecin, ku ka gɛ̈iyë kɔc.

⁴ Ku kut ë kɔc nu pänydït acïk röt tek, kɔc kɔ̈k acïk mat ë Judai, ku mät kɔc kɔ̈k ë tuuc.

⁵ Na wën, ke Juöör kekë Judai ku bäny ceŋ keek, të cï kek tɔŋ lɛɛr ë ke riŋ, lek ke kuur, ku biöökë keek ë kur.

⁶ Agokï ŋic kek tuuc, ku kɔtkï, lek ë pɛ̈ɛ̈nydït kɔ̈k, yï Luthura ku Derbe, kek pɛ̈ɛ̈nydït ke Lukonia, ku lekï ë bɛ̈i nu ë kekëc aya.

⁷ Agokï wëlpiɛth guiir ëtɛ̈ɛ̈n.

Në Luthura ku Derbe

⁸ Ku ade mony nu Luthura, mony cïn riɛl ë yecök, ku ye cool ë rɛ̈ɛ̈r, ke ye aduany kën kɔn cath anande ëcaŋɣɔn dhiëëthë ye.

⁹ Monyë acï Paulo piŋ të guïïr en wël. Na wën, ke toom Paulo guöp aläl, ku tïŋ nɔn ciɛth en ke gäm bï e tɔ dem,

¹⁰ go yɔ̈ɔ̈k ë röl dït an, “Kääcë ke yï kim rɔt piny!” Go kɛɛc nhial ku ciɛth.

¹¹ Na wën, aacï kut ë kɔc luɔi ë looi Paulo tïŋ, ke ke jɔt keröt, jamkï në thoŋdɛn ë Lukaonia, luelkï an, “Yiëth acïk lööny piny tëde wook ke ke cït gup kɔc!”

¹² Gokï Baranaba tɔ ye Dhio, ku tɔkï Paulo ye Ɣereme, luɔi ee yen raan ee wël dap guiir.

¹³ Na wën, ke guny de Dhio, raan nu ë luaŋde ë kal thok kal ë pänydït, ke bïï miöör gööl ë kal thok an, bïï bɛ̈n lam kekë kut ë kɔc, ku nɛ̈kkï keek tuuc.

¹⁴ Na wën, aacï tuuc e piŋ, ke yï Paulo kekë Baranaba, ke ke ret lupɔɔken yiic, ku kɔtkï lek ë kɔc yiic cil, ke ke cöt,

¹⁵ an, “Wek röör, eeŋö luɔɔi wek kakë? Wok ee kɔc tei, wok kït piɔ̈ɔ̈th ë week! Ku wek guïïrku wëlpiɛth, ke we bï röt yal wei ë kaɣäär yiic cït ee kakë, ku jakï wepiɔ̈ɔ̈th wël Nhialic pïïr, Raan ë cak nhial ku piny ku wɛ̈ɛ̈r, ku ka nu ë keyiic kedhie.

¹⁶ Ku acï juöör kedhie päl cäth ë kuɛɛrken ɣɔn nu rɛm thɛɛr.

¹⁷ Ku akën rɔt pɔ̈l të cïn cäätɔde tei, aaye cool ë loi luɔi piɛth, ee wo miɔɔc në deŋ bɔ̈ nhial ayï pɛɛi ee käŋ luɔk, go wo tɔ kueth ë këcam abuk piɔ̈ɔ̈th miɛt.”

¹⁸ Ku ciɛk an, cïk kake lueel, ke pɛ̈n pën kek kɔc luɔi lam kek keek, acï dhal.

¹⁹ Na wën, ke Judai bɔ̈ ë Antiokia kekë Yikoniom ke ke ɣet ëtɛ̈ɛ̈n: agokï kut ë kɔc wëŋ, ku biöökkï Paulo në kur, ku thelkï biic ë pänydït këc, aluelkï, an, cï yiɛ̈n thou.

²⁰ Ku të cï kɔcpiööcë ye geeu, ke jɔt rɔt le pänydït, na ɣɔn amiäk, ke jël kekë Baranaba lek Derbe.

Apukï Röt Antiokia në Thiriya

²¹ Na wën, aa cïk wëlpiɛth guiëër pänydïïtë, ku wëëtkï kɔc juëc abïk aa kɔcpiööcë, ke ke dhuny kenïïm Luthura, ku Yikoniom, ku Antiokia në Pithidia.

²² Ku ritkï kɔcpiööcë piɔ̈ɔ̈th, yöökkï keek an, “Bïk aa tɔ̈u ë gämic apiɛth, ku an, në guöm ee wok katuc juëc guum en abï wo dhil lɔ ë ciɛɛŋ de Nhialicic.”

²³ Agokï röördït lɔc ë ɣööt ke Nhialic yiic ëbɛ̈n, ku të cï kek lɔ̈ŋ në rɛɛc reec kek cäm, ke ke pɛ̈lkï ë Bɛ̈nydït cin, Bɛ̈nydïït cïk gam.

²⁴ Ku të cï kek Pithidia reetic, ke ke bɔ̈ Pampulia.

²⁵ Na wën, aa cïk wël guiir ë Perga, ke ke lɔ Atalia,

²⁶ ku jëlkï ëtɛ̈ɛ̈n në abël lek Antiokia, paan cï wäthii ke kɔn tɔ̈ɔ̈ŋ thïn wään an, bïk cath në dhuëëŋ de Nhialic piɔ̈u në këde luɔiden, luɔi cïk guɔ thöl ënɔɔnë.

²⁷ Na wën, aa cïk bɛ̈n, ke ke tɔ kɔc ke ɣön ë Nhialic tɔ guëër, ku guïïrkï keek këriëëc cïï Nhialic looi kekë keek, ku luɔi cï en ɣön ë gäm liëp Juöör.

²⁸ Ku jɔkï rëër ëtɛ̈ɛ̈n ë akööl juëc në kɔcpiööcë.