Luɔi 13 - JAM DE NHIALIC 2011

Baranaba kekë Thaulo acï Keek Lɔc ku Toc Keek

¹ Ku ɣön ë Nhialic nu Antiokia anu ë tït thïn, ayï kɔc ee wëët, yï Baranaba, kekë Thimon rinkɛn kɔ̈k acɔlke Niger, ku Lukio ë bɔ̈ Kurene, ku Maniin, raan wään cï muk kekë Ɣerod ëtök Ɣerod bɛ̈ny, ku Thaulo.

² Na wën, të looi kek ka ke bɛ̈nydït, ku reeckï cäm, ke ke yöökë Wëidït ɣer an, “Pɔ̈ckï yɛn Baranaba kekë Thaulo në këde luɔi cän ke caal thïn.”

³ Na wën, aa cïk cäm bɛ rɛɛc, ku lɛ̈ŋkï, gokï kecin thany ë kenïïm, ku tɔkï ke jël.

Në Thaiperuth

⁴ Ku keek, të cï keek tooc ë Wëidït ɣer, ke ke jël lek Theleukia, ku jëlkï ëtɛ̈ɛ̈n, ke ke cath në abël lek Thaiperuth.

⁵ Na wën, aa cïk ɣet Thalami, ke ke jɔ jam ë Nhialic guiir ë ɣööt ke Nhialic ye Judai ke lɔ̈ŋ thïn. Ku cath Jɔn ke keek, ee raan bï këden aa looi.

⁶ Gokï tuur caathic ëbɛ̈n aɣeet kek Papo, ku yökkï bɛ̈ny ee kɔc thuëëth ëtɛ̈ɛ̈n, ee raan ë Judai, ku ye tiët alueeth, rinke acɔl Bar-Yecu.

⁷ Ku ye tɔ̈u kekë bɛ̈ny cɔl Thergio Paulo, ee raan pel nɔm. Na wën, ke cɔl Baranaba ku Thaulo, yen bɛ̈ny, akɔɔr luɔi bï en jam de Nhialic piŋ.

⁸ Na wën, ke Eluma bɛ̈ny ee kɔc thuëëth (yen aye rinke në thoŋ de Girikii), ke cak ater ke keek, akɔɔr luɔi bï en bɛ̈ny wɛl piɔ̈u wei ke cï bï gam.

⁹ Go Thaulo, rinkɛn kɔ̈k acɔlke Paulo aya, wën cï en thiäŋ ke Wëidït ɣer go toom guöp,

¹⁰ ku yöök an, “Yïn, raan cï yic thiäŋ ke ruëëny ku de yïguöp aciɛɛn, yïn wën ë jɔŋdït rac, raan man piathëpiɔ̈u ëbɛ̈n, cïï bï pɔ̈l anandu në yal ee yïn kuɛɛr ke Bɛ̈nydït tɔ yal röt, kuɛɛr lɔ cit?

¹¹ Ku ënɔɔnë, tïŋ ciin ë Bɛ̈nydït atɔ̈u ë yïguöp, ku yïn bï cɔɔr, ku cïï akɔ̈l bï tïŋ aköölkë.” Na wën, ee tëthiinë, ke ke cït ruu ku cuɔlëpiny ke ke lööny ë yeguöp, go yiëëm, akɔɔr raan bï e dɔm cin thel.

¹² Na wën, aacï bɛ̈ny kë cï looi tïŋ, ke gäm, acï gäi në wëët ë Bɛ̈nydït.

Në Antiokia në Pithidia

¹³ Na wën, aa cïk jäl ë Papo në abël, kek yï Paulo ku kɔc cath ë ke, gokï ɣet Perga nu Pampulia: ku päl Jɔn keek ëtɛ̈ɛ̈n, le yenɔm dɔ̈k Jeruthalem.

¹⁴ Na wën, aa cïk jäl ë Perga, ke ke bɔ̈ Antiokia nu Pithidia, gokï lɔ Luaŋ ë Nhialic ë kööl ë Thabath, lek ku nyuckï.

¹⁵ Na wën, të cï löŋ guɔ thök ë kuɛ̈n kekë tït, ke bɛ̈ny ë luaŋ ë Nhialic ke tuc raan keek an, “We wäthii, na de jam bäk guiëër kɔc, luɛlkï këdun.”

¹⁶ Go Paulo rɔt jɔt, go nieu ë yecin, ku lueel an: “Week röör ke Yithriɛl, ku week kɔc riëëu Nhialic, jakï piŋ!

¹⁷ Nhialic de kɔc ke Yithriɛl acï wärkuɔ lɔc, ku jɔt kɔc nhial, të ɣɔn rëër kek cït man ë kamaan paan ë Rip, go keek bɛ̈ɛ̈i bei ëtɛ̈ɛ̈n në köŋ ril.

¹⁸ Go yepiɔ̈u tɔ lir në ciɛɛŋdɛn rac acït run kathiërŋuan ë jɔ̈ɔ̈ric.

¹⁹ Na wën, aacï juöör riɔ̈ɔ̈k kadhorou paan ë Kanaan, ke ke tek pinyden në deeny cï kek gɛk dɛɛny.

²⁰ Na wën, ee kakë cök, ke jɔ keek gäm bäny ee löŋ guiir acït bot kaŋuan ku thiërdhiëny ë run, aɣet akööl ke tiët Thamwɛl.

²¹ Na wën, ke ke kɔɔr melik. Go Nhialic ke gäm Thaulo wën de Kic, raan ë dhiën ë Benjamin, ë run kathiërŋuan.

²² Ku të cï en e nyaai, ke jɔt Debid nhial abï aa melikden, go lueel në këde, an, ‘Yɛn cï Debid wën ë Jethe yök, raan nu ë yapiɔ̈u, raan bï këde yɛnpiɔ̈u looi ëbɛ̈n.’

²³ Në käu de raanë, yen aa jɔtë Nhialic Konydewëi, yen Yecu, ku gëm Yithriɛl, acït man cï en e kɔn lueel.

²⁴ Të cï Jɔn baptinh ë puŋdepiɔ̈u kɔn guiëër kɔc ke Yithriɛl kedhie, wään aŋoot Yecu ke kën bɛ̈n.

²⁵ Na wën, aacï aköölkë duɛ̈ɛ̈r thöl, ke Jɔn thiëc kɔc an, ‘Yak lueel, an, aa ŋa? Yɛn cie yen. Ku tiëŋkï, ade raan bɔ̈ ë yacök, ku yɛn cï röŋ wo luɔi bän wɛɛrke dɔ̈k ë yecök.’

²⁶ “Wek wäthii, mïth ke baai de Abraɣam, ku kɔc nu ë weyiic ëbɛ̈n kɔc riëëu Nhialic, jamë acï tuöc week, jam de Konydewëiyë!

²⁷ Ku kɔc rɛ̈ɛ̈r ë Jeruthalem kekë bäny ceŋ keek, në kuny kuc kek en, ku kuckï jam ë tït, jam ye cool ë kueenë yeyic ë akööl ke Thabath kedhie, acïk jamden tɔ ye yic, në mäny cï kek e mäc yeth kërac.

²⁸ Ku na ciɛk ciën cöök cïk yök cöök duëërëye nɔ̈k, ke ke läŋ Pilato tei, an, bï nɔ̈k.

²⁹ Na wën, aa cïk käŋ thöl kedhie ka cï gɔ̈ɔ̈r në këde, ke jɔkï bɛ̈ɛ̈i bei ë tim kɔ̈u, tɛ̈ɛ̈ukï ë raŋic.

³⁰ Ku jötë Nhialic bei ë kɔc cï thou yiic,

³¹ ago tïŋ ë kɔc ë akööl juëc kɔc wään bɔ̈ ë Galili në yen ëtök lek Jeruthalem, ku kek aye cäätɔɔ lëk kɔc në këde.

³² Ku wek guïïrku wëlpiɛth an, Löŋ cïï Nhialic kɔn mac ke kuarkuɔ,

³³ yen acïï Nhialic tɔ ye yic tëde wook wok mïthken, në jön cï en Yecu bɛ jat nhial, acït man cï ë gɔ̈ɔ̈r ë Diɛt ye kek rou yiic an, ‘Yïn ee Wëndï, ee köölë yïn cä dhiëëth.’

³⁴ Ku në këde jön cï en e jat nhial ë kɔc cï thou yiic, ku cïï enɔm bï bɛ dhuöny ë dhiapic, ke lueel alë an, ‘Yïn bä miɔɔc ë ɣɛɛrë yic ku athiɛɛi de Debid agɔk.’

³⁵ Ago lueel aya në diɛt kɔ̈k yiic an, ‘Yïn cïï Raanduön ɣeric bï pɔ̈l abï dhiap tïŋ.’

³⁶ Ku Debid, të cï en remden kony në këde piɔ̈n ë Nhialic, ke jɔ thou, go jɔ tɔ̈ɔ̈u kekë kuarken ëtök, go dhiap.

³⁷ Ku raan cïï Nhialic bɛ jat nhial acïn dhiap cï tïŋ.

³⁸ Yen ŋiɛc wek en, wek wäthii an päl ë kërac aguïïrë week në ee raanë.

³⁹ Ku në yen, kɔc gam en kedhie aye ke tɔ piɛthpiɔ̈ɔ̈th në këriëëc ëbɛ̈n, ku we cïï duëërë tɔ piɛthpiɔ̈ɔ̈th në keyiic në löŋ de Mothe.

⁴⁰ Jakï röt tïŋ, ke kënë cïï bï bɛ̈n tëde week, kë cï lueel ë tït yiic an,

⁴¹ Tiëŋkï, wek kɔc ee käŋ caany ë ɣɔ̈ric, abäk gäi, ku thuɔukï! Yɛn bï luɔi looi në kööldun, Luɔi cäkï bï gam anandun, të ciɛkë raan e guiëër week!”’

⁴² Na wën, aacï Judai jäl luaŋ ë Nhialic, ke Juöör ë ke läŋ an, bï jam ë Nhialic guiëër keek akööl ke Thabath bï bɛ̈n.

⁴³ Na wën, aacï kɔc pɔ̈k kɔc wën ë guëër, ke Judai juëc kekë Juöör cï röt tɔ ye Judai, kɔc riëëu Nhialic, ke ke kuany Paulo cök kekë Baranaba. Gokï jam në keek, yöökkï keek aläl an, bïk a cool ë tɔ̈u në dhuëëŋ de Nhialic yic.

⁴⁴ Na wën, ëkööl ë Thabath lɔ ë köölë cök, ke pänydït guëër ëbɛ̈n bï jam ë Nhialic bɛ̈n piŋ, adɔ̈ŋ kɔc töktöök tei.

⁴⁵ Ku të cï Judai kuut ë kɔc tïŋ, ke ke dɔm tiɛɛl, ku jänykï ka lueel Paulo, ku latkï.

⁴⁶ Go Paulo kekë Baranaba agokï nyïïn riɛl, ku jɔkï lueel an, “Jam ë Nhialic acï dhil kɔn guiëër week. Ku ënɔɔnë, luɔi cä wek e nyaai, ku cäk röt tɔ ye kɔc cïï rɔ̈ŋ në pïïr athɛɛr, tiëŋkï, wo ë röt yal të nu Juöör.

⁴⁷ Yen aye kë cï Bɛ̈nydït thɔ̈n wo an: ‘Yïn cä tääu bä ya këɣeer bï Juöör aa riaau, ku bä ya këde kunydewëi aɣet të le piny thar guut.”’

⁴⁸ Të cï Juöör kënë piŋ, agokï piɔ̈ɔ̈th miɛt, ku leckï jam ë Nhialic, ago kɔc ëbɛ̈n kɔc cï kɔn lɔc an, bïk dɛ pïïr athɛɛr, agokï gam.

⁴⁹ Go jam ë Bɛ̈nydït go piny kiët nɔm pinyë ëbɛ̈n.

⁵⁰ Na wën, ke Judai ke ke këëk diëër dït diëër riëëu Nhialic, ku röör dït ke pänydït, ku riirkï kenïïm bïk Paulo yɔŋ kekë Baranaba, gokï ke cieec pinyden.

⁵¹ Ku keek, të cï kek abuui tɛŋ wei ë kecök në jäny bï kek ke jɔ̈ɔ̈ny, ke ke bɔ̈ Yikoniom.

⁵² Go kɔcpiööcë piɔ̈ɔ̈th miɛt aläl, ku thiëŋkï në Wëidït ɣer.