Luɔi 12 - JAM DE NHIALIC 2011

Yaaŋdït

¹ Na wën, ë aköölkë, ke melik Ɣerod dɔm kɔc kɔ̈k ke ɣön ë Nhialic bï ke bɛ̈n kuur.

² Go Jakop mänhë ë Jɔn tɔ näk ë abätäu.

³ Na wën, aa cï luɔiyë tïŋ nɔn mit en ë Judai piɔ̈ɔ̈th, ke löök Petero dɔm aya. Aköölkë ayek akööl ke Dhuëëŋ de Kuïn Cïnic Luɔu.

⁴ Na wën, acï Petero dɔm, ke tɛ̈ɛ̈u aloocic, ku yïn alathkëër kathiëër ku dhetem bïk aa wɛ̈ɛ̈r ë tiët, ŋuɛɛnë pei ku ŋuɛɛnë pei, ke lueel ë yepiɔ̈u an, bï bɛ̈ɛ̈i bei yïn kɔc, të cï Winythok thök.

⁵ Ku yok Petero a tït aloocic. Ku ɣön ë Nhialic aa ye cool ë läŋ Nhialic në biäkde.

Petero acï Lony ë Aloocic

⁶ Na wën, ee wɛ̈ɛ̈r wakɔ̈uwë guöp, ke Ɣerod an, bï bɛ̈ɛ̈i bei miäk, ku nin Petero ë kaam de kɔc ee tïït kaarou, ke amac ë joth kaarou, ku nu kɔc tit alooc thok biic ke ke yiɛ̈n.

⁷ Na wën, ke tunynhial ë Bɛ̈nydït ke go tuöl ë yelɔ̈ɔ̈m, ku jɔ ɣɛɛr alooc riaauwic: go Petero biɔ̈ɔ̈k lɔ̈ɔ̈m, ku jɔ pɔ̈ɔ̈c an, “Dap rɔt jɔt!” Go joth lööny piny ë yecin.

⁸ Go tunynhial yɔ̈ɔ̈k, an, “Dut yïyic, ku tääuwë war ë yïcök.” Go looi. Go lueel an, “Cuatë lupɔdu e yïkɔ̈u, ku kuany a cök.”

⁹ Go lɔ biic ke kuɛny cök, ku kuc kë looi e tunynhial nɔn ee yen yic, aa ye tɔ ye nyuöth.

¹⁰ Na wën, aa cïk kɔc tït nu tueŋ kɔn waan, ku wankï kɔc tïït nu ciëën aya, ke ke ɣet athïn ë wëëth, athïn nu të lɔ kueer lɔ pänydït. Go athïn rɔt tueer yetök, gokï lɔ biic, ku tëkkï ë kueer tök, go tunynhial dap jäl ë yelɔ̈ɔ̈m.

¹¹ Na wën, aacï nɔm jɔ bɛ̈n, ke jɔ Petero lueel an, “Acä jɔ ŋic ëgɔk ënɔɔnë, nɔn cï Bɛ̈nydït tunynhialde tooc, ago a luök ë Ɣerod cin, ku aŋäth ŋɛ̈ɛ̈thë kɔc ke Judai ëbɛ̈n.”

¹² Go enɔm cät, ku bï ɣön ë Meri man Jɔn, rinkɛn kɔ̈k acɔlke Mak, ɣön cï kɔc juëc guëër thïn bïk bɛ̈n lɔ̈ŋ.

¹³ Na wën, aacï Petero kal tɔɔŋ thok, ke nyan lïm cɔl Roda bɔ̈ bï bɛ̈n piŋ.

¹⁴ Na wën, aacï Petero ŋic röl, ke cïï kal tuer thok në miɛtëpiɔ̈u, acï bɛ kat ke lɔ ɣöt, le kɔc yɔ̈ɔ̈k an, Petero kï, kääcë ë kal thok.

¹⁵ Gokï jɔ̈ɔ̈ny an, “Yïn mum nɔm!” Go ŋak an, Ee yen ë yic, ku jɔkï lueel, an, “Ee tunydɛn bɔ̈ nhial.”

¹⁶ Ku ŋoot Petero ke tɔŋ kal thok: na wën, ke ke tuer kal thok, ku jɔkï tïŋ, gokï gäi aläl.

¹⁷ Go ke nieu ë yecin, an, Miɛmkï. Go ke guiëër në bïï cï Bɛ̈nydït e bɛ̈ɛ̈i bei në aloocic. Go an, “Lakkï guiëërkï Jakop kakë ayï wɛ̈ɛ̈t kɔ̈k.” Na wën, ke jɔ jäl, le tëdäŋ.

¹⁸ Na wën, aa cï piny ruu, go anuɔɔn dït cak ë kɔc ee tïït yiic an, cï Petero yɛ̈ɛ̈dï?

¹⁹ Go kɔɔr ë Ɣerod, ku cïï yök, go kɔc tït thiëëc aläl, ku jɔ lueel an, bï ke nɔ̈k. Na wën, ke lɔ Juda le Kaitharia, ku jɔ lɔ rëër ëtɛ̈ɛ̈n.

Thon de Ɣerod

²⁰ Ku Ɣerod acï piɔ̈u gɔ̈ɔ̈i kekë kɔc ke Tayer kekë Thidon, gokï bɛ̈n ë piɔ̈n tök të nu yen, lek mät lueel, acïk Bulathetho tɔ ye mɛ̈thëden, yen aye bɛ̈nydïït ee ɣön yee melik nin thïn tiit, pinyden aa muk piny ë melik në këcam.

²¹ Na wën, ëkööl cï kɔn lueel, ke Ɣerod jɔ alulut ë melik tääu ë yekɔ̈u, ku nyuuc ë thöönydɛn ë bɛ̈ɛ̈ny nɔm, jiëëm keek.

²² Go kɔc cööt an, “Ee röl ë Nhialic, acie röl ë raan!”

²³ Na wën, ee tëthiinë, ke yup tunynhial de Bɛ̈nydït, luɔi kën en Nhialic leec, go käm cam, go thou.

²⁴ Go jam de Nhialic piny kiët nɔm ku ŋuɛk e nyin aläl.

²⁵ Na wën, ke Baranaba kekë Thaulo ke ke dhuny kenïïm Jeruthalem, të cï kek luɔiden thöl, ku cath Jɔn kekë keek, rinkɛn kɔ̈k acɔlke Mak.