Luɔi 10 - JAM DE NHIALIC 2011

Petero ku Korunelio

¹ Ku ade raan nu Kaitharia, cɔl Korunelio, ee bɛ̈ny de rem de Romai, “Rem cɔl Tiliyan.”

² Ee raan rïïu Nhialic, ku ye ka ke Nhialic kɔɔr, yen kekë dhiënde ëbɛ̈n, ku ye adhuɛ̈ŋ ee kɔc miɔɔc aya, ku ye cool ë läŋ Nhialic ë aköölnyïïn kedhie.

³ Na wën, të cït thaar kadhoŋuan aköl, ke tïŋ tunynhial ë Nhialic ke tiëc ëgɔk, ke bɔ̈ tëde yen, bï ku yöök an, “Korunelio!”

⁴ Na wën, aacï woi guöp, ke päu piɔ̈u, ku lueel an, “Ee käŋö Bɛ̈nydït?” Go ë tunynhial yɔ̈ɔ̈k an, “Lɔ̈ŋdu ku miɔ̈cduön ë kɔc kuanynyïïn acïk ɣet nhial ë Nhialic nɔm an, bïk aa ka bï Nhialic aa tak.

⁵ Ku ënɔɔnë, tuöcë kɔc Jopa, lek raan cɔl Thimon lɔ diëc, rin kɔ̈k acɔlke Petero.

⁶ Arɛ̈ɛ̈r kekë raan cɔl Thimon atën ee biök coŋ, ɣönde anu ë wɛ̈ɛ̈r yɔu, yen abï yï lɛ̈k kë bä dhil looi.”

⁷ Na wën, aacï tunynhial wën jam ke yen jäl, ke cɔl kɔc lui ɣönde kaarou, kekë raan töŋ ë rem de tɔŋ, raan ee cool ë loi këde, ku ye raan riëëu Nhialic.

⁸ Ago ke guiëër käŋ kedhie, ku jɔ ke tuɔɔc Jopa.

⁹ Na ɣɔn amiäk, të ŋoot kek kueer, ku cïk thiääk ë pänydït, të cï akɔ̈l kɔ̈ɔ̈c cil, go Petero lɔ nhial ë ɣöt nɔm le lɔ̈ŋ.

¹⁰ Na wën, ke jɔ cɔk nɔ̈k arëët, ago cäm kɔɔr, ku të ŋoot kek ë ke guik këcam, ke jɔ nyuöth.

¹¹ Ku jɔ nhial tïŋ a ɣɔ̈ɔ̈r, go këdäŋ lööny piny ë yelɔ̈ɔ̈m, acït gök dïït ë lupɔ, cï mac ë cin kaŋuan, ke luɛɛiyë piny.

¹² Ku ade yic läi de cök kaŋuan ëbɛ̈n ku läi roor ku kak ee mol piny ku diɛt nhial.

¹³ Go röl tuöl an, “Jɔt rɔt, Petero, näk, ku cuet!”

¹⁴ Go Petero jai an, “Ei, Bɛ̈nydït, kërac ayï kënhiany akɛ̈n ke kɔn cam anandï!”

¹⁵ Go röl bɛ nyɔk raanrou, ku yöök an, “Kë cïï Nhialic tɔ piɛth, du tɔ rac, yïn.”

¹⁶ Kënë acï looi raandiäk: ku jɔ këdäŋ bɛ jat nhial.

¹⁷ Na wën, aŋoot Petero ke dhɛl kë wën cï tïŋ ke ee nyuöth, akën yökic, ke kɔc cï tooc ë Korunelio ke ke dap bɛ̈n, acïk ɣön ë Thimon luɔp, ku kɛ̈ɛ̈ckï ë kal thok.

¹⁸ Gokï cööt, thiëckï nɔn de raan ëtɛ̈ɛ̈n, raan cɔl Thimon, ku cɔl Petero aya.

¹⁹ Ku të ŋoot Petero kë ciët kë cï tïŋ e yepiɔ̈u, ke yöök ë Wëidït an, “Tïŋ, ade kɔc kɔɔr yïn kadiäk.

²⁰ Jɔt rɔt, lɔ piny ku lɔ we keek, du piɔ̈u be cɔ̈m, ee yɛn ë toc keek.”

²¹ Go Petero lɔ piny të nu kɔc ë tucë yen ë Korunelio, le ku lueel an, “Ya kï, yɛn ee raan wën, kaarkï: ee käŋö kë bä wek?”

²² Gokï lueel an, “Korunelio, bɛ̈ny ë rem de tɔŋ, raan piɛthpiɔ̈u, ku ye Nhialic riëëu, ku ye raan piɛth rin ë jur ë Judai yic ëbɛ̈n. Go tunynhial ɣeric a yöök an, bï yï tuöc kɔc an, bä lɔ ɣönde, ke bï wël piŋ tëde yïn.”

²³ Go ke caal ɣöt, tɔ keek ee kamaan. Na ɣɔn amiäk, ke jël ke keek, ku cath wäthii kɔ̈k në yen, kɔc ke Jopa.

²⁴ Na ɣɔn amiäk, ke ke ɣet Kaitharia. Ku tit Korunelio keek, acï kɔcken cɔɔl ku määthkɛn nhiɛɛr, bïk bɛ̈n guëër.

²⁵ Na wën, aa bɔ̈ Petero ɣöt, ke loor Korunelio, le ku cuɛt rɔt piny ë yecök, ku lɛm.

²⁶ Go Petero jat nhial, ku lueel an, “Jɔt rɔt, yɛn guöp aya yɛn ee raan tei.”

²⁷ Na wën, aŋoot ke jam ke yen, ke jɔ lɔ ɣöt, ku yök kɔc juëc cï guëër.

²⁸ Go keek yɔ̈ɔ̈k an, “Aŋiɛckï nɔn rɛɛc en, të mɛ̈të raan ë Judai kekë raan ë jur däŋ, ayï të neem en en, ku yɛn cïï Nhialic nyuööth an, cä raan däŋ bï tɔ rac ku ta nhiany.

²⁹ Yen aa bä yɛn, ke ya kën göök, të wään cɔɔlë ya. Wek luɔp ënɔɔnë, ë kë ë tuöc wek ɛn?”

³⁰ Go Korunelio lueel, an, “Nïn wäänë kaŋuan, yɛn ë këcam theek aɣet të cït ee kaamë, ku thaar kadhoŋuan yɛn aa läŋ Nhialic, na wën, ke raan kääc ë yanɔm ke ceŋ lupɔ lɔ riauriau,

³¹ ku lueel, an, ‘Korunelio, lɔ̈ŋdu acï piŋ, ku miɔ̈cduön ë kɔc kuanynyïïn amuk ë Nhialic ë yepiɔ̈u.

³² Yen tooc yïn kɔc Jopa, lek Thimon cɔɔl ee tënë, rinkɛn kɔ̈k acɔlke Petero, arɛ̈ɛ̈r ɣön e Thimon atën ee biök coŋ në wɛ̈ɛ̈r yɔu, të cï en bɛ̈n, ka bï jam ke yïn.’

³³ Yen aa dap ɛn kɔc tuöc yïn ënɔnthiinë, ku yïn ë këpiɛth looi nɔn cï yïn bɛ̈n. Na ënɔɔnë, wok kï ee tënë ë Nhialic nɔm wodhie, buk käŋ bɛ̈n piŋ kedhie, ka cïï Nhialic thɔ̈n yïn.”

Jam de Petero

³⁴ Na wën, ke Petero tuer e thok, ku lueel an, “Yɛn ë Nhialic tïŋ ë yic, nɔn cïï en ee raan ee kɔc kuany yiic.

³⁵ Ku në juöör yiic ëbɛ̈n, raan riëëu en ku ye këpiɛth looi, yen anu ë Nhialic piɔ̈u.

³⁶ Jam cïï Nhialic tuöc kɔc ke Yithriɛl, ke guiir mät në Yecu Kërtho, yen aye Bɛ̈nydït nu ë kɔc nïïm kedhie.

³⁷ Jamë aŋiɛckï, jam cï tai piny ë Juda ëbɛ̈n, le gɔl Galili, ë baptith cök baptith cïï Jɔn guiir.

³⁸ Jam në këde Yecu de Nadhareth, luɔi cï Nhialic e tɔc në Wëidït ɣer, ku gɛ̈m riɛl. Ago piny aa caath ke ye këpiɛth looi, ku tɔ kɔc dem kɔc cïï jɔŋdït rac cieŋ ë ciɛɛŋ rac, luɔi ciɛthë Nhialic ke yen.

³⁹ Ku wook ee cäätɔɔ në ka cï looi ëbɛ̈n paan ë Judai, ayï Jeruthalem, ku acïk nɔ̈k abï thou, në nök cï kek e nöök në tim nɔm.

⁴⁰ Ku yen acïï Nhialic jat nhial ëkööl ee kek diäk, ku tɔ tiëc ëgɔk,

⁴¹ ku acie tëde kɔc kedhie, yen ë tïc en, ee tëde cäätɔɔ cïï Nhialic kɔn lɔc, kek wook, kɔc wën ee cam në yen ku dëkkï, të cï en rɔt jɔt ë kɔc cï thou yiic.

⁴² Ku acï wo yɔ̈ɔ̈k an, buk kɔc aa guiëër ku yok cäätɔɔke an, ee yen ee raan cïï Nhialic dɔm aye Bɛ̈ny ee löŋ guiir löŋ de kɔc pïïr ayï kɔc cï thou.

⁴³ Ku tït ëbɛ̈n acïk aa cäätɔɔ në këde an, në rin ke yen raan ëbɛ̈n raan gam en abï miɔɔc në nyiɛɛi bï karɛcke nyaai.

Juöör Ayökkï Wëidït

⁴⁴ Na wën, të ŋootë Petero ke luel wëlke, ke Wëidït ɣer lööny ë kɔc gup kedhie kɔc piŋ jam.

⁴⁵ Go kɔc cï gam kɔc cï cueel, ke kɔc wën bɔ̈ në Petero ëtök, agokï gäi kedhie, luɔi cï Juöör miɔɔc në Wëidït ɣer ayadäŋ, luuŋëke ë kegup.

⁴⁶ Acïk ke piŋ ke ke jam ë thook lei, ke ke lec Nhialic. Go Petero bɛ̈ɛ̈r, an:

⁴⁷ “De raan duëër pïïu pëën an, cïï kɔckë baptith, kɔc wën cï Wëidït ɣer yök cït man ë wokë?”

⁴⁸ Go ke yɔ̈ɔ̈k an, bïke baptith në rin ke Yecu Kërtho. Na wën, ke läŋkï, an, bï rëër ke keek ë akööl likë.