Luɔi 1 - JAM DE NHIALIC 2011

¹ Yɛn ë jam wään gɔ̈ɔ̈r, Yïn Theopilo, jam de ka cï Yecu gɔl ë luɔi ku wëët, käŋ kedhie,

² aɣet kööl cï e jat nhial, të cï en tuuc cï lɔc kɔn yiɛ̈n thön në Wëidït ɣer:

³ ɣɔn cï en käŋ thöl ë guöm, ke jɔ rɔt nyuöth keek ke pïïr. Në kajuëc bïk ŋic ëgɔk, aaye tuöl tëde keek ë nïn kathiërŋuan, ku jɔ ya cool ë luel jam ë ka ke ciɛɛŋ de Nhialic.

⁴ Na wën, aa cïk guëër, ke ke yöök an, “Duökï jël ë Jeruthalem, tiɛtkï kë cïï wäär lueel an, bï gäm week, kë cäk piŋ tëde yɛn.

⁵ Jɔn ee kɔc baptith ë pïïu në yic, ku week, we bï baptith ë Wëidït ɣer acïn nin juëc bï lɛɛr.”

Yecu Aleerë Nhial

⁶ Na wën, aa cïk guëër, ke thiëckï an, “Bɛ̈nydït, bä Ciɛɛŋ bɛ pɔ̈k nɔm Yithriɛl ënɔɔnë?”

⁷ Go keek yɔ̈ɔ̈k an, “Ŋïny bä wek akööl ŋic ayï run, akööl ku run cïï Nhialic tääu ë yecin etök, acie këdun.

⁸ Ku we bï riɛl yök, të cï Wëidït ɣer bɛ̈n ë wegup, ku we bï aa cäätɔɔkï ë Jeruthalem, ku Juda ëbɛ̈n, ku Thamaria, ku aɣet të guutë piny thar.”

⁹ Na wën, aacï kakë lueel, ke jɔtë nhial ke woikï, go luät thiaan ë kenyïïn.

¹⁰ Ku të ŋoot kek ë ke nɛɛk kenïïm nhial të wën jël en, gokï kɔc kaarou tïŋ akɛ̈ɛ̈ckï ë kelɔ̈m ke ke ceŋ lupɔɔ ɣer,

¹¹ ku luelkï ayadäŋ, an, “Wek röör ke Galili, eeŋö kääc wek ke we woi nhial? Yen Yecuyë, raan wën jɔtë nhial ë weyiic, abï enɔm bɛ dhuny acït nɔn cä wek e tïŋ alɔ paannhial.”

Raan lɔ ë Nyin de Judath yic

¹² Na wën, ke ke dhuny kenïïm Jeruthalem në kuur nɔm kuur cɔl Olip, kuur thiääk ke Jeruthalem, ee cäth de kööl ë Thabath tei.

¹³ Na wën, aa cïk bɛ̈n ɣöt, ke ke lɔ ɣön nu nhial, ɣön rëërë Petero thïn, ku Jɔn, ku Jakop, ku Andereya, ku Pilip, ku Thoma, ku Bartholomayo, ku Mathayo, ku Jakop wën ë Alapayo, ku Thimon Dhelote, ku Judath wën ë Jakop.

¹⁴ Kɔckë kedhie ayek cool ë lɔ̈ŋ ku pɛlkï në piɔ̈n tök, ke ke cïï bäp, në diäär ëtök, ayï Meri man Yecu, ku mïthëkɔcken ë Yecu.

¹⁵ Ë aköölkë ke Petero jɔt rɔt ë kɔc yiic cil kɔcpiööcë (kuën ë rinken kedhie acït bɔt tök ku thiërrou),

¹⁶ ku jɔ lueel an, “Wek mïthëkɔckuɔ, këcïgɔ̈ɔ̈r acï dhil aa yic, kë cïï Wëidït ɣer luel ë Debid thok ɣɔn thɛɛr në këde Judath, raan ë wat kɔc wään dɔm Yecu.

¹⁷ Ku acï rɔt tɔ kuen ke wook ëtök, ku acï biäkde yök ë luɔiyë yic.”

¹⁸ (Ku raanë ë dom ɣɔɔc në ariöp de kërɛɛcde, na wën, ke wiëëk, go yäc rɛɛt ë ciɛɛlic, abï cïïn wët bei kedhie.

¹⁹ Go kënë ŋic ë kɔc rɛ̈ɛ̈r ë Jeruthalem kedhie, en a cɔlë domë Akeldama në thoŋden, yen aye “Dom de Riɛm.”)

²⁰ “Luɔi cï e gɔ̈ɔ̈r në awerek de Diɛtic an, ‘Tɔ paande e jɔ̈ɔ̈ric, Ku du tɔ de raan bï ɣap thïn.’ Ku an, ‘Luɔidɛn e yen kɔc tiit tɔ nööm raan däŋ.’

^21-22 Ku ënɔɔnë, në röörkë yiic röör ë cool ë mät ë wook ë caŋɣɔn ciɛthë Bɛ̈nydït Yecu ë woyiic, ee cool ë bɛ̈n ku lek biic, gɔl ë baptinh ë Jɔn ɣet ë kööl manë guöp, kööl cï e jat nhial ë woyiic, në röörkë yiic abï raan tök dhil aa cäätɔ kekë wook ëtök në jön cï en rɔt jɔt.”

²³ Agokï kɔc kaarou tääu ë kɔc nïïm, Jothep cɔl Barthaba, ku ye cɔɔl Juthutho aya, ku Mathiath.

²⁴ Agokï lɔ̈ŋ an, “Yïn Bɛ̈nydït, yïn ŋic piɔ̈n ë kɔc kedhie, nyuöthë wook raan cï lɔc ë kɔckë kaarou yiic,

²⁵ raan bï biäk de luɔiyë lɔ̈ɔ̈k nööm, ku bï aa tuc ë nyin ë Judathic, raan cï bɛ̈n bei në wäc cï en käŋ wööc, ago lɔ tëde guöp.”

²⁶ Na wën, ke ke deeny gɛk në këden kaarou, go gɛk lööny ë Mathiath nɔm, ago mɛt ë tuuc yiic tuuc kathiëër ku tök.