3 Jɔn 1 - JAM DE NHIALIC 2011

¹ Yɛn monydït, Awerek en gäär Gayo, raan nhiaar arëët, anhiaar në yic.

² Mɛnh nhiaar, yɛn ee lɔ̈ŋ luɔi bï yïn këriëëc aa tiiŋic, ku bä tɔ̈u ke yï piɔl guöp, cït man ee piɔ̈ndu tɔ̈u apiɛth.

³ Yɛn ë piɔ̈u miɛt aläl, wään cï mïthëkɔckuɔ bɛ̈n, bïk ku lëkkï yɛn yicdu, cït man ee yïn rëër ë yicic.

⁴ Acïn kën ee ya tɔ mit piɔ̈u kë wär piŋ cän e piŋ nɔn rɛ̈ɛ̈rë mïthkï në yicic.

Gayo acï Leec

⁵ Mɛnh nhiaar, yïn ee luɔi ŋiëc döt në luɔidu yic ëbɛ̈n luɔi ee luöi mïthëkɔckuɔ ayï kamaan kɔ̈k.

⁶ Kek acïk aa cäätɔɔ lëk ɣön ë Nhialic nhiëërdu: ku të ye yïn keek nyuööc apiɛth në kenyden në nyuuc rɔ̈ŋ ke nyuuc ë kɔc ke Nhialic, ke yïn bï këpiɛth aa looi:

⁷ luɔi ee yen biäk de rinke yen ë keny kek, ku cïn kë cïk nööm tëde Juöör.

⁸ Yen a duëër wok kɔc cït keek dhil aa tɔ ye kamaan, ke wo bï aa kɔc ee luui në keek ëtök në baŋ de yic.

Diotrepe kekë Demeturio

⁹ Yɛn cï ɣön ë Nhialic gäär awerek: ku Diotrepe raan kɔɔr luɔi bï en lɔ tueŋ ë keyiic, areec këda gam.

¹⁰ Yen abän a nɔm tak ë luɔidɛn looi, të cän bɛ̈n, ee wo lɛ̈k jam rɛɛc ɣɔ̈ric: ku acie kuɛth ë luɔiyë, yenguöp ee mïthëkɔckuɔ rɛɛc tɔ ye kamaan, ku jɔ kɔc aa pëën aya, kɔc kɔɔr luɔi bï kek ke tɔ ye kamaan, arëk abï ke ciɛɛc wei ë ɣön ë Nhialic yic.

¹¹ Mɛnh nhiaar, du luɔi rac ee dɔmic, ee luɔi piɛth en ee dɔmic. Raan ee këpiɛth looi ee këde Nhialic: ku raan ee kërac looi akën Nhialic tïŋ.

¹² Demeturio piathde aye lueel ë raan ëbɛ̈n, ku ye yic lueel aya: yeka ayï wook aya, wok ee cäätɔɔ luel këde, ku we ŋic kë luelku nɔn ee yen yic.

Thiëc Ciëën

¹³ Yɛn aa de kajuëc bä gɔ̈ɔ̈r, ku yɛn cïn piɔ̈u luɔi gäär ɛn yïn në miök de gäär agalam:

¹⁴ ku tïŋ bän yïn dap tïŋ yen aŋääth, agoku jam ke wo tuum wonïïm.

¹⁵ Ë mät ë ye tɔ̈u ke yïn. Yïn thiëëc määthkuɔ. Thiëc määthkuɔ në rinken.